ગેનીબેનની સમાજને ટકોર: મૈત્રીકરારથી લગ્ન નહીં ચાલે

બનાસકાંઠાના વિભાજન બાદ નવા બનેલા વાવ થરાદ જિલ્લામાં ઠાકોર સમાજના બંધારણની રચના માટે એક મહત્વપૂર્ણ બેઠક મળી હતી. આ બેઠકનો મુખ્ય ઉદ્દેશ્ય મોંઘવારીના યુગમાં સમાજને બિનજરૂરી ખર્ચાઓથી બચાવવા માટે નવું બંધારણ તૈયાર કરવાનો હતો. આ દરમિયાન, બનાસકાંઠાના કોંગ્રેસના સાંસદ ગેનીબેન ઠાકોરે સમાજને કેટલાક કડક અને સ્પષ્ટ સંદેશા આપીને ટકોર કરી હતી.

મૈત્રી કરાર પર કડક વલણ

સાંસદ ગેનીબેન ઠાકોરે ખાસ કરીને 'મૈત્રી કરાર'થી થતા લગ્નો પર પોતાનું આક્રોશ વ્યક્ત કર્યો હતો. તેમણે સમાજને કહ્યું કે, "મૈત્રી કરારના નિયમો સમાજને બરબાદ કરી રહ્યા છે. જે દીકરીઓ મૈત્રી કરારથી લગ્ન કરે છે તે ચલાવી લેવાનું નથી. જો કોઈ દીકરી મૈત્રી કરાર કરીને લગ્ન કરે, તો તેને ઘરમાં પ્રવેશ ન આપતા."

વધુમાં તેમણે સમાજની દીકરીઓના સન્માન માટે આકરૂં નિવેદન આપતા કહ્યું હતું કે, "તમારો દીકરો વાંઢો મરે તો મરવા દેજો, પણ મૈત્રી કરારની પ્રથા ચલાવશો નહીં." તેમણે સમાજને અપીલ કરી કે કોઈ બીજા સમાજની દીકરીને લાવવી નહીં અને જો આપણી દીકરી કોઈ લઈ જાય તો આકાશ-પાતાળ એક કરીને તેને પાછી લાવવી.

અંધશ્રદ્ધા અને સોશિયલ મીડિયાથી દૂર રહેવા ટકોર

સાંસદ ગેનીબેને સમાજમાં ફેલાયેલી અંધશ્રદ્ધા પર પણ પ્રહાર કર્યા હતા. તેમણે માતાજીના ભૂવાઓને પોતાના સ્વાર્થ માટે સમાજને ગેરમાર્ગે દોરવા બદલ ટકોર કરી હતી. 'દશામાના વ્રત' અંગે તેમણે ચોંકાવનારું નિવેદન આપતા કહ્યું કે, "હવેથી કોઈ બહેન-દીકરીએ દશામાના વ્રત કરવા નહીં. જેને દશામાં નડે તેને મારા ત્યાં મૂકી જજો. દશામાં મારી ગાડીમાં મારી સાથે ફરશે, તમને કોઈને નડશે નહીં." તેમણે લોકોને ભૂવાઓના ચક્કરમાં ન ફસાવા અને કોઈ દુઃખ-દર્દ હોય તો ડોક્ટર પાસે જવા માટે વિનંતી કરી હતી.

યુવા પેઢીને સંદેશ આપતા તેમણે સોશિયલ મીડિયાથી દૂર રહેવાની સલાહ આપી હતી અને કહ્યું કે, પોતાની આબરૂની સાથે સાથે બીજાની આબરૂ ન જાય તેનું પણ ધ્યાન રાખવું જોઈએ.