કચ્છ જિલ્લાના કંડલામાં આવેલા સ્પેશ્યલ ઇકોનોમિક ઝોન (KASEZ) માં આજે બપોરના સમયે આગની એક મોટી દુર્ઘટના સર્જાઈ છે. બુધવાર, 25મી માર્ચના રોજ ઝોનની અંદર આવેલી એક કંપનીમાં અચાનક આગ ભભૂકી ઉઠતા સમગ્ર વિસ્તારમાં અફરાતફરી મચી ગઈ હતી. આગ એટલી ભીષણ હતી કે તેના કાળા ડિબાંગ ધુમાડાના ગોટેગોટા કિલોમીટરો દૂર સુધી આકાશમાં દેખાઈ રહ્યા હતા.
મધ્યાહ્ને આગનું તાંડવ અને અફરાતફરી :&nbsp;
મળતી માહિતી અનુસાર, બપોરના સમયે જ્યારે કંપનીઓમાં કામકાજ ચાલી રહ્યું હતું ત્યારે અચાનક એક એકમમાંથી ધુમાડો નીકળવાનું શરૂ થયું હતું. જોતજોતામાં આગે વિકરાળ સ્વરૂપ ધારણ કરી લીધું હતું. પ્રાથમિક અંદાજ મુજબ, આ આગ એક ગાર્મેન્ટ (કપડાં બનાવતી) કંપનીમાં લાગી છે. કાપડનો જથ્થો હોવાને કારણે આગ ઝડપથી પ્રસરી હતી અને તેને કાબૂમાં લેવી મુશ્કેલ બની હતી. આ ઘટનાને પગલે આસપાસની અન્ય કંપનીઓમાં કામ કરતા શ્રમિકો અને સ્થાનિક રહીશોમાં ભયનો માહોલ ફેલાયો હતો.
ફાયર બ્રિગેડનું મેગા ઓપરેશન :&nbsp;
ઘટનાની જાણ થતા જ કંડલા ફ્રી ટ્રેડ ઝોન અને આસપાસના ફાયર સ્ટેશનોમાંથી ફાયર ફાઈટરોનો કાફલો ઘટનાસ્થળે દોડી આવ્યો હતો. ફાયર વિભાગના અનેક જવાનોએ વિવિધ ગાડીઓ સાથે આગ પર કાબૂ મેળવવા માટે મોરચો સંભાળ્યો છે. સતત પાણીનો મારો ચલાવવામાં આવી રહ્યો છે, પરંતુ ગાર્મેન્ટ યુનિટમાં રહેલા જ્વલનશીલ પદાર્થો અને કાપડના કારણે આગ પર કાબૂ મેળવવામાં ભારે મુશ્કેલી પડી રહી છે.
વહીવટી તંત્ર અને નુકસાનનો અંદાજ :&nbsp;
કંડલા સ્પેશ્યલ ઇકોનોમિક ઝોન (KASEZ) ના પ્રશાસન દ્વારા હજુ સુધી સત્તાવાર રીતે કઈ ચોક્કસ કંપનીમાં આગ લાગી છે તેની પુષ્ટિ કરવામાં આવી નથી. હાલમાં તંત્રની પ્રાથમિકતા આગને વધુ પ્રસરતી અટકાવવાની અને જાનહાનિ ટાળવાની છે. આગ પર સંપૂર્ણ કાબૂ મેળવ્યા બાદ જ નુકસાનનો સાચો આંકડો અને આગ લાગવાનું ચોક્કસ કારણ બહાર આવશે. સદનસીબે, હજુ સુધી કોઈ જાનહાનિના સમાચાર પ્રાપ્ત થયા નથી.&nbsp;

કંડલા SEZ આગની ઘટના

25મી માર્ચના રોજ કંડલા સ્પેશ્યલ ઇકોનોમિક ઝોનમાં આગ ફાટી નીકળી, આકાશમાં ધુમાડાના ગોટા છવાયા

March 25, 2026 | 18:18 IST