ગાંધીનગર મેડિકલ રેગિંગ કેસઃ 14 વિદ્યાર્થી સસ્પેન્ડ

ગાંધીનગરની GMERS મેડિકલ કોલેજમાં રેગિંગનો ગંભીર કેસ સામે આવ્યો છે. બોયઝ હોસ્ટેલમાં પહેલું વર્ષ શરૂ થયા બાદ સિનિયર વિદ્યાર્થીઓએ જુનિયર સ્ટુડન્ટ્સ પાસેથી ઇન્ટ્રો લેવડાવી તેમને પરાણે હસી-મજાક કરીને માનસિક રીતે પરેશાન કર્યા હતા. સ્ટુડન્ટ્સની લેખિત ફરિયાદ બાદ તપાસ હાથ ધરાતા બીજા અને ત્રીજા વર્ષના 14 વિદ્યાર્થીઓની સંડોવણી સાબિત થતાં તેમને 6 મહિના થી 2 વર્ષ સુધી માટે હોસ્ટેલમાંથી સસ્પેન્ડ કરવામાં આવ્યા છે.

મેડિકલ કોલેજની પ્રથમ વર્ષની પ્રવેશ પ્રક્રિયા પૂર્ણ થયા બાદ અભ્યાસ શરૂ થઈ ગયો છે. કોલેજની બોયઝ હોસ્ટેલમાં બીજા અને ત્રીજા વર્ષના કેટલાક વિદ્યાર્થીઓએ પ્રથમ વર્ષના વિદ્યાર્થીઓને બોલાવીને તેમને 'ઇન્ટ્રો' આપવાની ફરજ પાડી હતી. બાદમાં તેમની સાથે પરાણે હસી-મજાક કરીને માનસિક રીતે ટોર્ચર કર્યા હતા. જેના કારણે પ્રથમ વર્ષના કેટલાક વિદ્યાર્થીઓએ હિંમત દાખવીને તાત્કાલિક મેડિકલ કોલેજ સત્તાધીશોને લેખિત રજૂઆત કરી હતી. ઘટનાની ગંભીરતાને ધ્યાનમાં લઈને કોલેજ સત્તાધીશોએ તપાસ કરી હતી. તપાસના અંતે બીજા અને ત્રીજા વર્ષના 14 વિદ્યાર્થીઓની રેગિંગની ઘટનામાં સંડોવણી ખુલી હતી.

મેડિકલ કોલેજના સત્તાધીશોએ વિદ્યાર્થીઓનું ભવિષ્ય ન બગડે તે માટે તેમને કોલેજમાંથી કાઢી મૂકવાના બદલે માત્ર હોસ્ટેલમાંથી સસ્પેન્ડ કરવાનો નિર્ણય લઈ ભીનું સંકેલી દીધુ છે. જવાબદાર 14 વિદ્યાર્થીઓને તેમની સંડોવણીના આધારે 6 માસથી લઈને બે વર્ષ સુધીના સમયગાળા માટે હોસ્ટેલમાંથી સસ્પેન્ડ  કરાયા છે. આ ઉપરાંત તમામ 14 વિદ્યાર્થીઓના વાલીઓને કોલેજમાં બોલાવી ગંભીર ઘટના અંગે જાણ કરવામાં આવી હોવાનું જાણવા મળ્યું છે.

મેડિકલ કોલેજના સત્તાધીશોએ સત્તાવાર રીતે કોઈ વિગતો જાહેર કરી નથી. ગાંધીનગર મેડિકલ કોલેજમાં ગત વર્ષે માર્ચ મહિનામાં જુનિયર વિદ્યાર્થીને સિનિયરોએ પટ્ટેથી માર મારી ઉઠક-બેઠક કરાવી હતી. તે સમયે કોલેજ તંત્રએ માત્ર માફીપત્ર લખાવીને મામલો દબાવી દીધો હતો. કોલેજ દ્વારા કડક કાર્યવાહી કરવામાં આવી હોત તો કદાચ રેગિંગની બીજી ઘટના બનતાં અટકી ગઈ હોત અને 14 વિદ્યાર્થીઓ રેગિંગ કરતા પહેલા સો વખત વિચાર કરતાં.

ઉલ્લેખનીય છે કે, પાટણની ધારપુર મેડિકલ કોલેજમાં રેગિંગના કારણે વિદ્યાર્થીના મૃત્યુની ઘટનાએ ચર્ચા જગાવી હતી. બાદમાં તમામ મેડિકલ કોલેજોમાં યુજીસીની એન્ટિ-રેગિંગ માર્ગદર્શિકાનું કડક પાલન કરાવવા અને જાગૃતિ કાર્યક્રમો યોજવાની સૂચના અપાઈ હતી. ગાંધીનગર મેડિકલ કોલેજમાં પ્રથમ વર્ષનો અભ્યાસ શરૂ થઈ ગયો હોવા છતાં હજી એન્ટી રેગિંગ કમિટીની બેઠક મળી નહી હોવાનું જાણવા મળ્યું છે.