ગાંધીનગરમાં વિકાસની પોલ ખુલીઃ 2 અંડરપાસનો પાણીમાં ગરકાવ, રસ્તાઓ બંધ

રાજ્યભરમાં 18 જૂન બુધવારે મોડી રાતથી વરસાદ શરૂ થયો છે. મેઘરાજાની મહેરબાની વચ્ચે ગાંધીનગર મહા નગરપાલિકા દ્વારા દાવાઓ કરાયેલું વિકાસકાર્ય હવે નાગરિકો માટે મુશ્કેલીનું કારણ બની રહ્યું છે.

20 દિવસ પહેલાં અંડરપાસનો પાણીમાં ગરકાવ

ગાંધીનગરમાં માત્ર 20 દિવસ પહેલાં ખુલ્લો મૂકાયેલો એક અંડરપાસ બ્રિજ વરસાદના થોડા જ સમયમાં પાણીથી લથપથ થઈ ગયો, જેના કારણે વાહનચાલકોને ભારે હાલાકીનો સામનો કરવો પડ્યો હતો.

સ્વર્ણિમ પાર્ક નજીકના ભરાયું અંડરપાસમાં પાણી

સ્વર્ણિમ પાર્કના નજીક આવેલા નવા અંડરપાસમાં પણ પાણી ભરાતા ટ્રાફિકજામ સર્જાયો. પોલીસ દ્વારા રસ્તા બંધ કરીને ટ્રાફિક અટકાવવો પડ્યો હતો. મહાત્મા મંદિરથી વિધાનસભા ગાર્ડન જોઈ શકાય તે માટે બનાવાયેલા અંડરપાસોની વાસ્તવિક જરૂરિયાત વિશે હવે નાગરિકો પ્રશ્ન ઉઠાવી રહ્યા છે. નાગરિકોનો ખુલ્લો આક્ષેપ છે કે, “આ વિકાસ દેખાડાવા માટે છે, ઉપયોગ માટે નહીં.”

અન્ય વિસ્તારોમાં પણ હાલાકી

ગાંધીનગર પોલીસ હેડક્વાર્ટર તરફ જતાં માર્ગ પર, સેક્ટર-27ની પ્રાથમિક શાળાની બાજુમાં આવેલા ચિલ્ડ્રન પાર્ક નજીકના રસ્તા પર પણ ખાડા અને પાણી ભરાવાની સમસ્યા સર્જાઈ હતી. નાગરિકોએ આક્ષેપ કર્યો છે કે, શહેરના 'વિકાસ' માટે હજારો વૃક્ષો કાપવામાં આવ્યા છે, પણ વરસાદ આવે એટલે રસ્તાઓ પર કીચડ, પાણી ભરાવા અને અંડરપાસો બંધ થાય છે. ચોમાસા પૂર્વે તૈયારીઓના પાલિકા દ્વારા કરાયેલા દાવાઓ હવે પોકળ સાબિત થઈ રહ્યા છે.