દાહોદની ગર્લ્સ હોસ્ટેલમાં ફૂડ પોઈઝનિંગ, 60 કરતાં વધુ વિદ્યાર્થીનીઓ અસ્વસ્થ, તબીબી ટીમ દોડી આવી

દાહોદ જિલ્લામાં લીમખેડા મોડેલ સ્કૂલમાં રહેતી મંડોર લુખડિયાની ગર્લ્સ રેસિડેન્શિયલ સ્કૂલમાં ફૂડ પોઈઝનિંગની ગંભીર ઘટના સામે આવી છે. શાળામાં ભોજન બાદ એક પછી એક 60થી વધુ વિદ્યાર્થીનીઓની તબિયત લથડી હતી. શાળાની હાલની વ્યવસ્થા અન્ય કેમ્પસમાં ચાલી રહી છે કારણ કે મૂળ બિલ્ડિંગનું બાંધકામ ચાલી રહ્યું છે. ભોજન બાદ વિદ્યાર્થીનીઓને પેટ દુખાવા અને ઉલટી થવાની ફરિયાદો શરૂ થઈ હતી.

108 એમ્બ્યુલન્સની મદદથી 56 વિદ્યાર્થીનીઓને લીમખેડા આરોગ્ય કેન્દ્રમાં ખસેડવામાં આવી હતી જ્યારે કેટલીકની હોસ્ટેલમાં સારવાર શરૂ થઈ હતી. ઘટનાની ગંભીરતાને પગલે જિલ્લા આરોગ્ય વિભાગ, પ્રાંત અધિકારીઓ અને આરોગ્ય ટીમો તાત્કાલિક ઘટનાસ્થળે દોડી ગઈ હતી. દાહોદ ઝાયડસ હોસ્પિટલમાં પણ આરોગ્ય સુવિધાઓ સજ્જ કરવામાં આવી હતી.

હોસ્ટેલના વોર્ડન મુજબ, પ્રથમ રાઉન્ડમાં 330 વિદ્યાર્થીનીઓએ ભોજન લીધું હતું અને ત્યાર બાદ ફરીથી 40 વિદ્યાર્થીનીઓ માટે ભોજન બનાવાયું હતું. તે પછી જ તબિયત લથડવાની ઘટના શરૂ થઈ હતી. તુરંત પાણી બંધ કરાયું અને ચોખ્ખા પાણીની વ્યવસ્થા કરવામાં આવી. તબીબી તપાસ અને દવાઓનો પુરવઠો ઝડપી ગતિએ શરૂ થયો. અધિકારીઓ દ્વારા તમામ વિદ્યાર્થીનીઓનું મેડિકલ ચેકઅપ કરાયું છે અને હાલ તમામની તબિયત સ્થિર છે.