સુરત એરપોર્ટ પર આગની ઘટનાથી અફરાતફરી, ફ્લાઇટ્સ ડાયવર્ટ

સુરત ઇન્ટરનેશનલ એરપોર્ટ ખાતે આજે બપોરે રનવે નજીકના ઘાસવાળા વિસ્તારમાં અચાનક આગ ફાટી નીકળતાં અફરાતફરીનો માહોલ સર્જાયો હતો. આ ઘટનાને પગલે એરપોર્ટની કામગીરી પર અસર પડી, અને ફ્લાઇટ્સની અવરજવરમાં વિલંબ થયો હતો. ઘટનાની જાણ થતાં જ ફાયર બ્રિગેડની ગાડીઓએ પાણીનો મારો ચલાવી આગને કાબૂમાં લેવાનો પ્રયાસ કર્યો હતો, અને થોડા સમય બાદ આગ પર કાબૂ મેળવી લેવાયો હતો.   ઘટના સમયે રનવે પર એર ઇન્ડિયા એક્સપ્રેસની સુરત-દિલ્હી ફ્લાઇટ (IX 1123) ટેકઓફની તૈયારીમાં હતી, પરંતુ આગની ઘટનાને કારણે તે 2 કલાક 51 મિનિટના વિલંબ સાથે રવાના થઈ. આ ઉપરાંત, ત્રણ ફ્લાઇટ્સ અને એક હેલિકોપ્ટરને ડાયવર્ટ કરવાની ફરજ પડી હતી. એક હેલિકોપ્ટરને હજીરા હેલિપેડ ખાતે, વેન્ચુરાની ફ્લાઇટને અમદાવાદ, એર ઇન્ડિયા એક્સપ્રેસની સુરત-હૈદરાબાદ ફ્લાઇટને અમદાવાદ અને બેંગ્લોર-સુરત ફ્લાઇટને વડોદરા ડાયવર્ટ કરવામાં આવી હતી. આગના કારણે રનવે પર ટેકઓફ અને લેન્ડિંગ શક્ય ન હતું, જેના પગલે આ ફ્લાઇટ્સને આકાશમાં ચક્કર લગાવ્યા બાદ ડાયવર્ટ કરવી પડી હતી.   એરપોર્ટના ડિરેક્ટર આનંદ શર્માએ જણાવ્યું કે, બપોરે લગભગ 1:30 વાગ્યે ઓપરેશનલ એરિયામાં ઘાસવાળા વિસ્તારમાં આગ લાગી હતી. આગનું કારણ બર્ડ હિટ ટાળવા માટે વપરાતી ગેસ ગનમાંથી નીકળેલો સ્પાર્ક હોવાનું પ્રાથમિક તપાસમાં જાણવા મળ્યું છે. આગ રનવે સુધી ન ફેલાય તે માટે તાત્કાલિક પગલાં લેવાયા હતા, અને રનવેને બપોરે 2:45 વાગ્યા સુધી બંધ રાખવામાં આવ્યો હતો. ત્યારબાદ રનવે ઓપરેશનલ થઈ જતાં ફ્લાઇટ્સની અવરજવર ફરી શરૂ થઈ હતી.   આ ઘટનાને કારણે મુસાફરોને થયેલી અગવડતા બદલ એરપોર્ટ ઓથોરિટીએ ખેદ વ્યક્ત કર્યો છે અને ભવિષ્યમાં આવી ઘટનાઓ ન બને તે માટે વધુ સાવચેતી રાખવાની ખાતરી આપી છે.