અમદાવાદમાં મકાનમાં આગ: ગેસ સિલિન્ડર ફાટતા બેના મોત

અમદાવાદના નારોલ વિસ્તારમાં આવેલ કર્ણાવતી નગર પાસેના સત્યમ નગરમાં મોડી રાત્રે એક હૃદયદ્રાવક ઘટના બની, જેમાં ગેસ લીકેજ થવાના કારણે લાગેલી ભીષણ આગમાં બે નિર્દોષ લોકોએ જીવ ગુમાવ્યા છે.

રાત્રે જમવાનું બનાવતી વખતે ગેસ લીકેજ થતાં અચાનક આગ લાગી હતી અને ત્યારબાદ ગેસનો બાટલો જોરદાર ધડાકા સાથે ફાટતાં દુર્ઘટનાએ ગંભીર સ્વરૂપ ધારણ કર્યું હતું.

આ દુર્ઘટનામાં મકાનમાં હાજર એક યુવક અને એક યુવતી ગંભીર રીતે દાઝી ગયા હતા, જેમનું હોસ્પિટલમાં સારવાર દરમિયાન કરુણ મૃત્યુ થયું છે. આ ઉપરાંત, એક 40 વર્ષીય મહિલા પણ ગંભીર રીતે દાઝી જતાં હાલ હોસ્પિટલમાં જીવન-મરણ વચ્ચે ઝોલા ખાઈ રહી છે.

ઘટનાની જાણ થતાં જ ફાયર બ્રિગેડની બે ગાડીઓ અને એમ્બ્યુલન્સ તાત્કાલિક સત્યમ નગર પહોંચી હતી. ફાયર બ્રિગેડના જવાનો ઘટનાસ્થળે પહોંચ્યા ત્યારે ગેસ સિલિન્ડર ફાટવાને કારણે આગ વધુ ફેલાઈ ગઈ હતી, જેના પગલે વિસ્તારમાં અફરાતફરીનો માહોલ સર્જાયો હતો.

ફાયર બ્રિગેડની ટીમે પાણીનો મારો ચલાવીને આગને કાબૂમાં લીધી હતી. ફાયર ટીમે અંદર ફસાયેલા યુવક, યુવતી અને બેભાન હાલતમાં રહેલી મહિલાને બહાર કાઢીને તાત્કાલિક સારવાર માટે હોસ્પિટલમાં ખસેડ્યા હતા. પ્રાથમિક તપાસમાં જાણવા મળ્યું છે કે રાત્રે રસોઈ બનાવતી વખતે ગેસ લીક થવાને કારણે આગ લાગી અને બાદમાં બાટલો ફાટતાં આગનું પ્રમાણ વધ્યું હતું.

બંને મૃતદેહોને પોસ્ટમોર્ટમ માટે મોકલી આપવામાં આવ્યા છે, અને નારોલ પોલીસે આ સમગ્ર મામલે અકસ્માત મોતનો ગુનો નોંધીને વધુ તપાસ હાથ ધરી છે, જેથી આગ લાગવાના ચોક્કસ કારણો જાણી શકાય. આ કરુણ ઘટનાએ ગેસની સલામતી અંગે ગંભીર સવાલો ઊભા કર્યા છે.