ભેસાણમાં વિદ્યાર્થીઓ સાથે અડપલાં કરનાર પ્રિન્સિપાલ અને ગૃહપતિ સામે ફરિયાદ, બંનેની ધરપકડ

જૂનાગઢ જિલ્લાના ભેસાણ ગામમાં આવેલી “માં અમર શૈક્ષણિક સંકુલ” શાળામાં વિદ્યાર્થીઓ સાથે શારીરિક અડપલાંના ગંભીર આક્ષેપો સામે આવ્યા બાદ શાળાના પ્રિન્સિપાલ કેવલ લાખણોત્રા અને ગૃહપતિ હિરેન જોષી સામે પોક્સો સહિતના કાયદાકીય કલમો હેઠળ FIR નોંધાઈ છે. પોલીસે બન્નેની અટકાયત કરી છે.

વિદ્યાર્થીઓ અને વાલીઓએ આ અંગે પહેલાથી આક્ષેપો કર્યાં હતાં, પરંતુ શાળા સંચાલન સમાધાનના પ્રયાસોમાં લાગેલું હતું. જોકે, CCTV ફૂટેજ સામે આવ્યા બાદ સમગ્ર ઘટના ખુલાસે આવી. ટ્રસ્ટીઓએ પોલીસ ફરિયાદ કરતા પોલીસે ત્વરિત કાર્યવાહી કરી.

પોલીસે જણાવ્યું કે, આરોપીઓએ 2 વિદ્યાર્થીઓ સાથે અશ્લીલ હરકતો કરી હતી અને તેમના અંગો સ્પર્શ્યા હતા. બાળકોના નિવેદન, CCTV ફૂટેજ અને બાળ સુરક્ષા સમિતિના નિરીક્ષણ બાદ ફરિયાદ નોંધાઈ હતી. ગુનો પોક્સો, જુવેનાઈલ જસ્ટિસ એક્ટ અને ચાઈલ્ડ પ્રોટેક્શન એક્ટ અંતર્ગત દાખલ થયો છે.

ઘટનાને લઈને ચેરપર્સન ગીતાબેન માલમ પણ પોતાની ટીમ સાથે શાળાએ પહોંચી, વિદ્યાર્થીઓ, શિક્ષકો અને ટ્રસ્ટીઓના નિવેદન લીધા હતા. તેઓએ જણાવ્યું કે, CCTVમાં ગંભીરતા જણાઈ નથી, પરંતુ વધુ તપાસની જરૂર પડશે તો કરવામાં આવશે.

બીજી તરફ, શાળા ટ્રસ્ટી લલિત સાવલિયાએ આરોપોને ખોટા ગણાવ્યા અને દાવો કર્યો કે, વિદ્યાર્થીને ફોસલાવીને બોલાવાયું છે. ટ્રસ્ટી મુજબ CCTV ચેક કર્યા બાદ કોઈ પણ કૃત્ય સાબિત થતું નથી. તેમણે કહ્યું કે, શાળાને બદનામ કરવાનું ષડયંત્ર રચાયું છે. વાલીઓના સંતોષ માટે બન્ને શિક્ષકોને હટાવ્યા છે.

શાળા સંચાલકોના દાવાઓ છતાં પોલીસે ગુનો દાખલ કરી સંપૂર્ણ તપાસ હાથ ધરી છે. અન્ય વિદ્યાર્થીઓ સાથે પણ આવી જ ઘટના થઈ છે કે કેમ તે અંગે તપાસ ચાલુ છે.