રતનગઢ નજીક ફાઇટર જેટ ક્રેશ: 1 પાયલટનું મૃત્યુ, 2 લોકો ઈજાગ્રસ્ત

રાજસ્થાનના ચુરુ જિલ્લામાં બુધવારે એક ફાઈટર જેટ દુર્ઘટનાગ્રસ્ત થયું છે. રતનગઢ વિસ્તારના ભાનુડા ગામ પાસે થયેલા આ દુર્ઘટનામાં એક પાયલટનું ઘટનાસ્થળે જ મોત થયું છે, જ્યારે 2 લોકો ઈજાગ્રસ્ત થયા હોવાની પુષ્ટિ થઈ છે. અકસ્માતની જાણ થતાં જ રાજલદેસર પોલીસ અને વહીવટીતંત્રની ટીમ ઘટનાસ્થળે પહોંચી ગઈ હતી.

આ ઘટનાની માહિતી ગ્રામજનોએ આપતા જણાવ્યું કે, આકાશમાં જોરદાર અવાજ સંભળાતાં ખેતરમાં આગ લાગતી જોવા મળી હતી અને ધુમાડાના ગોટેગોટા ઊઠી રહ્યા હતા. દુર્ઘટનાસ્થળે ભારે કાટમાળ જોવા મળ્યો હતો અને નજીકથી એક પાયલટનો મૃતદેહ મળ્યો હતો, જે સંપૂર્ણ રીતે ક્ષતિગ્રસ્ત સ્થિતિમાં હતો. મૃતદેહની ઓળખ કરવાની કાર્યવાહી ચાલુ છે.

દુર્ઘટનાના સમાચાર મળતા જ ચુરુના કલેક્ટર અભિષેક સુરાણા અને સ્થાનિક પોલીસ અધિકારીઓ તાત્કાલિક સ્થળે પહોંચી ગયા છે. ગ્રામજનોએ આગ બુઝાવવા માટે પ્રારંભિક પ્રયત્નો કર્યા હતા. દુર્ઘટનાના ચોક્કસ કારણો જાણવા માટે વધુ તપાસ શરૂ કરવામાં આવી છે.