વિસાવદરમાં ચૂંટણીનો માહોલ ગરમાયો: કિરીટ પટેલનો પ્રચાર રદ, ખેડૂતોનો આક્રોશ

વિસાવદરના મતદારોમાં આક્રોશનો માહોલ સર્જાયો છે. ભાજપના ઉમેદવાર કિરીટ પટેલનો શુક્રવારે સવારે ભેસાણ તાલુકાના વાંદરવડ ગામે ચૂંટણી પ્રચારનો કાર્યક્રમ હતો. જોકે, સ્થાનિક ખેડૂતો અને સહકારી મંડળીના કૌભાંડથી પીડાયેલા લોકો રજૂઆત કરવા ઉમેદવારની રાહ જોતા હતા. આ ઘટનાની જાણ થતાં ભાજપના આગેવાનોએ પોલીસને બોલાવી લીધી, અને પોલીસે રજૂઆતકર્તાઓને અટકાવ્યા હોવાના આક્ષેપો ઉઠ્યા છે. પરિસ્થિતિ બગડે નહીં તે માટે કિરીટ પટેલે વાંદરવડ જવાનું ટાળ્યું હતું.   ભેસાણ, ધારી ગુંદાળી, છોડવડી સહિતના ગામોમાં સહકારી મંડળીઓમાં થયેલા કૌભાંડોમાં અનેક નિર્દોષ ખેડૂતો ભોગ બન્યા છે. મૃતક ખેડૂતોના નામે લોન લેવાઈ, ખાતા ન હોય તેવા લોકોના નામે પણ લોન ઉઠાવી લેવામાં આવી. આવા કૌભાંડોના કારણે વાંદરવડના એક ખેડૂતે થોડા સમય પહેલાં આત્મહત્યા કરી હતી. આ ઘટનાઓમાં ભાજપના આગેવાનો અને જેડીસીસી બેંકના ચેરમેન કિરીટ પટેલ સામે ગંભીર આક્ષેપો થઈ રહ્યા છે.   કિરીટ પટેલે વાંદરવડથી ચૂંટણી પ્રચાર શરૂ કરવાની યોજના બનાવી હતી, પરંતુ સ્થાનિકોને આની જાણ થતાં આત્મહત્યાનો ભોગ બનેલા ખેડૂતના પરિવારજનો અને અન્ય પીડિત ખેડૂતો રજૂઆત માટે તૈયાર થઈ ગયા. ભાજપના આગેવાનો વાંદરવડ પહોંચ્યા ત્યારે સ્થાનિકોએ સવાલો ઉઠાવ્યા: "કિરીટ પટેલ ક્યારે આવશે? અમારે ન્યાય જોઈએ છે!" આ દરમિયાન પોલીસનો કાફલો આવી પહોંચ્યો અને રજૂઆતકર્તાઓને ધમકાવ્યા હોવાના આરોપો ઉઠ્યા.   માહોલ વધુ બગડે તે પહેલાં કિરીટ પટેલે વાંદરવડનો પ્રવાસ રદ કર્યો, અને ભાજપના આગેવાનો પણ ત્યાંથી નીકળી ગયા. આ ઘટનાની જાણ થતાં ‘આપ’ના ઉમેદવારે વાંદરવડની મુલાકાત લીધી અને પીડિત ખેડૂતો તથા આત્મહત્યા કરનારના પરિવારજનો સાથે ચર્ચા કરી.   આ ઘટનાએ વિસાવદરના ચૂંટણી માહોલને વધુ ગરમાવી દીધો છે, અને મતદારોનો આક્રોશ હવે ચૂંટણીના મુદ્દાઓમાં મહત્વનું સ્થાન લઈ રહ્યો છે.