મોડાસામાં બીભત્સ મેસેજ કરનાર શિક્ષકની ધરપકડ

રાજ્યમાં શિક્ષણજગતને કલંકિત કરતી એક ઘટના સામે છે. અરવલ્લી જિલ્લાના મોડાસામાં આવેલી સરકારી એન્જિનિયરિંગ કોલેજ ફરી એકવાર ગંભીર વિવાદના કારણે ચર્ચામાં આવી છે. પ્રોફેસરે વિદ્યાર્થીનીને કરેલા અશ્લીલ મેસેજના સ્ક્રીનશોટ વાઈરલ થયા છે. 

પ્રોફેસર મનીષ ચૌહાણ દ્વારા વિદ્યાર્થિનીઓને વૉટ્સએપ મારફતે બિભત્સ માંગણી કરતા મેસેજ મોકલવામાં આવ્યા હોવાની ઘટના બહાર આવતા શિક્ષણ જગત શર્મસાર થયું છે.શરૂઆતમાં એક વિદ્યાર્થિનીએ ફરિયાદ કરી હતી, પરંતુ તપાસમાં બહાર આવ્યું કે પ્રોફેસર મનીષ ચૌહાણે માત્ર એક જ અઠવાડિયાના ગાળામાં અન્ય બે છાત્રાઓ સહિત કુલ ત્રણ વિદ્યાર્થિનીઓને આ પ્રકારના બિભત્સ મેસેજ મોકલ્યા હતા.

મેસેજમાં પ્રોફેસર પોતાની બિભત્સ માંગણી સંતોષાય તો વિદ્યાર્થિનીઓને પરીક્ષામાં પાસ કરાવી આપવાની લાલચ આપતો હતો, જે દર્શાવે છે કે વધુ વિદ્યાર્થિનીઓનું શોષણ થયું હોવાની શક્યતા પણ છે.

કોલેજમાં 'વી વોન્ટ જસ્ટિસ'ના સૂત્રોચ્ચાર

આ ગંભીર હકીકત બહાર આવતા જ કોલેજના વિદ્યાર્થીઓમાં ભારે રોષ ફેલાયો હતો. ABVPના સમર્થન સાથે વિદ્યાર્થીઓએ કોલેજ સંકુલ ખાતે ઉગ્ર દેખાવો યોજીને **'વી વોન્ટ જસ્ટિસ'**ના સૂત્રોચ્ચાર કર્યા હતા અને આરોપી પ્રોફેસર સામે કડક કાર્યવાહીની માંગ કરી હતી. વિદ્યાર્થીઓના આક્રોશને કારણે આરોપી અધ્યાપક મનીષ ચૌહાણ વિરોધનો માહોલ જોઈને પાછલા દરવાજેથી કોલેજ છોડીને ફરાર થઈ ગયો હતો.

વિદ્યાર્થીઓના દેખાવોને પગલે કોલેજના પ્રિન્સિપાલે તાત્કાલિક કાર્યવાહીની બાંહેધરી આપતા મામલો થોડો શાંત પડ્યો હતો. જોકે, આ ઘટનાએ હજારો વિદ્યાર્થિનીઓની સુરક્ષા અને શિક્ષણના પવિત્ર માહોલ સામે ગંભીર સવાલો ઊભા કર્યા છે.

પોલીસની તાત્કાલિક કાર્યવાહી

વિદ્યાર્થિનીઓની ફરિયાદ અને વિદ્યાર્થીઓના ભારે રોષને પગલે પોલીસે આ મામલે છેડતીની ફરિયાદ નોંધીને તાત્કાલિક ધોરણે કાર્યવાહી હાથ ધરી હતી. પોલીસે ફરાર થયેલા પ્રોફેસર મનીષ ચૌહાણની ગણતરીના કલાકોમાં ધરપકડ કરી લીધી છે. પોલીસ હવે આરોપી સામે કાયદેસરની કાર્યવાહી કરી રહી છે, જે આવા લંપટ શિક્ષકો સામે દાખલારૂપ પગલું બની શકે છે. શિક્ષણ વિભાગ અને કોલેજ વહીવટીતંત્ર દ્વારા આરોપી સામે સંસ્થાકીય પગલાં લેવામાં આવે તેવી શક્યતા છે.