તમે જાણો છો, મુખ્યમંત્રી ભૂપેન્દ્ર પટેલ પાસે કેટલી સંપત્તિ છે..? વાંચો આ અહેવાલ

એસોસિએશન ફોર ડેમોક્રેટીક રિફોર્મ્સ એડીઆર દ્વારા રાજ્યના 31 રાજ્યો અને કેન્દ્રશાસિત પ્રદેશોના અત્યારના મુખ્યમંત્રીઓના સોગંદનામાઓનું રસપ્રદ વિશ્લેશણ કરાયું છે જેમાં 31 મુખ્યમંત્રીમાંથી 13 મુખ્યમંત્રી સામે વિવિધ ગુના નોંધાયેલા છે અને આ 13 પૈકી 10 મુખ્યમંત્રી સામે તો ગંભીર ગુના નોંધાયેલા છે. આ સાથે મુખ્યમંત્રીઓની સરેરાશ મિલકત 52.59 કરોડ હોવાનું જણાયુ છે અને તેમાં આંધ્રપ્રદેશ અને અરુણાચલના સીએમની સંપત્તિ 100 કરોડ કરતા વધુ હોવાનું જણાયુ છે. 

આ રિપોર્ટમાં ગુજરાતના મુખ્યમંત્રી આવકના મામલે દેશમાં 15માં ક્રમે રહ્યા છે. ગુજરાતના મુખ્યમંત્રી ભૂપેન્દ્ર પટેલ પાસે 8.22 કરોડની મિલકત છે. ગુનાહિત રેકોર્ડની દ્રષ્ટીએ વાત કરીએ તો ભૂપેન્દ્ર પટેલ કોઇ જ ગુનાઇત ઇતિહાસ ધરાવતા નથી. તેમની શૈક્ષણિક લાયકાત ડિપ્લોમા સુધીની છે અને તેમની સેલ્ફ ઇન્કમ 16.79 લાખ છે. ભૂપેન્દ્ર પટેલ પર 1.53 કરોડની જવાબદારી છે.

જ્યારે આંધ્રપ્રદેશના મુખ્યમંત્રી ચન્દ્રાબાબુ નાયડુ પાસે 931 કરોડ અને અરુણાચલ પ્રદેશના મુખ્યમંત્રી પ્રેમા ખાંડુ પાસે 332 કરોડ અને કર્ણાટકના મુખ્યમંત્રી સિદ્ધારમૈયા પાસે 51 કરોડની મિલકતો છે. પશ્ચિમ બંગાળના મુખ્યમંત્રી મમતા બેનર્જી પાસે 15.38 કરોડ અને જમ્મુ કાશ્મીરના મુખ્યમંત્રી ઓમર અબ્દુલ્લાહ પાસે 55.24 કરોડની મિલકત છે.

દેશના 31 મુખ્યમંત્રીમાંથી માત્ર ગુજરાતના મુખ્યમંત્રી ભૂપેન્દ્ર પટેલ પાસે જ ડિપ્લોમાની શૈક્ષણિક લાયકાત છે.જ્યારે અન્ય રાજ્યમાં 10મું ભણેલા 1, 12મું ભણેલા 3, 10 ગ્રેજ્યુએટ થયેલા તથા 5 ગ્રેજ્યુએટ પ્રોફેશનલ અને 9 ગ્રેજ્યુએટ ડોક્ટરેટની લાયકાત ધરાવે છે.

બીજી તરફ 31 રાજ્યો પૈકી 12 રાજ્યના મુખ્યમંત્રીની ઉમંર 51થી 60 વર્ષ છે. રાજ્યના મુખ્યમંત્રી ભૂપેન્દ્ર પટેલે પણ 60 વર્ષની ઉમંર બતાવી છે. 61થી 70 વર્ષના 5 અને 71થી 80 વર્ષની ઉમંરના 6 મુખ્યમંત્રી છે અને 31થી 40 વર્ષના એક તથા 41થી 50 વર્ષના 7 મુખ્યમંત્રી છે.