1 જૂનથી સસ્તા અનાજની દુકાનો પર વિતરણ બંધઃ સંચાલકોનો સરકાર સામે મોરચો

રાજ્યની સસ્તા અનાજની દુકાનોમાં E-KYCની પ્રક્રિયા પૂર્ણ કરવામાં પુરવઠા વિભાગ સદંતર નિષ્ફળ નિવડ્યો છે. તેવામાં E-KYC પ્રક્રિયાની નિષ્ફળતા માટે સસ્તા અનાજની દુકાનોના સંચાલકો ઉપર દોષનો ટોપલો ઢોળવામાં આવી રહ્યો છે. જ્યારે E-KYCનું 6 મહિનાથી વળતર નહી ચુકવાતા સસ્તા અનાજની દુકાનોના સંચાલકોએ સરકાર સામે બાયો ચઢાવી છે. E-KYC સહિતના પડતર પ્રશ્નો મુદ્દે 1 જૂનથી સસ્તા અનાજની દુકાનો પર વિતરણ બંધ કરીને સરકાર સામે મોરચો માંડવાનો નિર્ણય કરાયો છે.

સસ્તા અનાજની દુકાનોના સંચાલકોના E-KYC સહિત  વિવિધ પ્રશ્નો ન ઉકેલાતાં  હવે  સંચાલકોએ સરકાર સામે મોરચો માંડ્યો છે. રાજ્યની 17 હજાર  સસ્તા અનાજની દુકાનોના સંચાલકોએ 1 જૂનથી અનાજનું વિતરણ નહી કરવાનો નિર્ણય કર્યો છે.  E-KYC પૂર્ણ કરવામાં સરકાર સદંતર નિષ્ફળ રહી છે ત્યારે સંચાલકો પર દબાણ કરવામાં આવી રહ્યું છે. ઘેર ઘેર જઇને E-KYC પ્રક્રિયા કરવાના બદલે સંચાલકો ઉપર જવાબદારી ઢોળવામાં આવી રહી છે.  

E-KYC પ્રક્રિયામાં અનેક વિસંગતતા ઉભી થઇ છે. જેના કારણે પુરવઠા વિભાગ અને સસ્તા અનાજની દુકાનના સંચાલકો આમને સામને આવી ગયા છે. દુકાનદારોને પડતી મુશ્કેલીઓના મામલે ગુજરાત ફેર પ્રાઈસ શોપ એન્ડ કેરોસીન ડિલર્સ એસોસિએશનની બેઠક મળી હતી. આ E-KYC પ્રક્રિયા પૂર્ણ કરવા માટે પુરવઠા વિભાગ દ્વારા સંચાલકો ઉપર કરવામાં આવી રહેલા દબાણ અંગે ચર્ચા કરવામાં આવી હતી. E-KYCની કામગીરી પૂર્ણ કરવાની જવાબદારી પુરવઠા વિભાગની છે. 6 મહિનાથી સંચાલકો E-KYCની કામગીરી કરી રહ્યાં હોવા છતાં હજુ સુધી વળતર ચુકવાયું નથી. E-KYC કરવા માટે પાંચ રૂપિયા વળતર નક્કી કરાયુ છે. હવે સંચાલકોએ E-KYC પ્રક્રિયા માટે 25 રૂપિયા મહેનતાણાની માગ કરી છે.  

સંચાલકોએ ચીમકી ઉચ્ચારી છે કે, પુરવઠા વિભાગ E-KYC પ્રક્રિયા પૂર્ણ નહીં કરે તો 1 જૂનથી અનાજ વિતરણ બંધ કરવામાં આવશે. સરકાર વિરૂદ્ધ કોર્ટ રાહે લડત લડવા તૈયારી દર્શાવી છે. જ્યારે અન્ય પડતર પ્રશ્નો મુદ્દે સંચાલકોનું કહેવું છે કે, દુકાનમાં જેટલાં રાશન કાર્ડ હોય તે તમામ રાશન કાર્ડ ઉપર અનાજ વિતરણ થાય તો જ 20 હજાર રૂપિયાનું કમિશન મળે છે. પુરવઠા વિભાગે આગ્રહ કર્યો છે કે, સંચાલકો બે મહિનાનો અનાજનો જથ્થો એક સાથે ખરીદ કરે. પરંતુ નાની દુકાન ધરાવતાં સંચાલકો માટે અનાજનો જથ્થો મૂકવો શક્ય નહી હોવાથી સંચાલકોએ પુરવઠા વિભાગ સામે સવાલ ઉઠાવ્યા છે.  

સરકારે કરોડો રૂપિયા ખર્ચીને બારકોડ રેશનકાર્ડ સિસ્ટમ અમલી બનાવી છે. પરંતુ સર્વરના ઠેકાણાં નથી. E-KYCના નામે કેટલાક પરિવારોનુ અનાજ બંધ કરાયુ છે. તે ચાલુ કરવા માંગ કરવામાં આવી છે.  ખાસ કરીને નાના બાળકો-વૃદ્ધોની ફિંગર પ્રિન્ટ અને ફોટા આવતા નથી તેમનું અનાજ બંધ કરી દેવામાં આવ્યુ છે. કોરોનામાં મરણ પામેલા સંચાલકોને રૂપિયા 25 લાખની સહાય આપવાનો નિર્ણય કરાયો છે. પરંતુ હજુ સુધી એકપણ સંચાલકને સહાય આપવામાં આવી નથી. તેથી સસ્તા અનાજની દુકાનના પડતર પ્રશ્નો અને E-KYC પ્રક્રિયામાં પડી રહેલી મુશ્કેલીઓને લઈ સંચાલકોએ સરકાર સામે નવેસરથી લડત લડવાનો નિર્ણય કર્યો છે.