DGVCL ભરતી: આદિવાસી ઉમેદવારો માટે સંઘર્ષ

દક્ષિણ ગુજરાત વીજ કંપની (DGVCL) દ્વારા વિદ્યુત સહાયકોની ભરતીના મુદ્દે હવે રાજકારણ ગરમાયું છે. વીજ કંપની દ્વારા લેવાયેલી પરીક્ષામાં પાસ થવા છતાં 1800 કરતાં વધુ આદિવાસી ઉમેદવારોને નોકરી આપવામાં ન આવતા કોંગ્રેસ અને આમ આદમી પાર્ટી (AAP) ના ધારાસભ્યો આ ઉમેદવારોના સમર્થનમાં મેદાને ઉતર્યા છે.

ધારાસભ્ય અનંત પટેલ (કોંગ્રેસ) અને ધારાસભ્ય ચૈતર વસાવા (AAP) ની આગેવાની હેઠળ કાર્યકર્તાઓ અને ઉમેદવારોએ ફરી એકવાર DGVCL ની મુખ્ય કચેરીનો ઘેરાવ કર્યો હતો અને પોતાનો આક્રોશ વ્યક્ત કર્યો હતો.

ભરતી નહીં, આઉટસોર્સિંગથી કામ લેવાનો આક્ષેપ

પ્રાપ્ત માહિતી મુજબ, અગાઉ જૂન મહિનામાં પણ આ મુદ્દે ઉગ્ર વિરોધ નોંધાવવામાં આવ્યો હતો, જેના પરિણામે 190 કરતાં વધુ ઉમેદવારોને નોકરી આપવામાં આવી હતી. જોકે, હજુ પણ 1600 કરતાં વધુ ITI પાસ ઉમેદવારો વિદ્યુત સહાયક તરીકેની નોકરીથી વંચિત છે.

આક્રોશિત ધારાસભ્યો અને ઉમેદવારોનો મુખ્ય આક્ષેપ એ છે કે DGVCL મેરિટમાં પાસ થયેલા લાયક ઉમેદવારોને નોકરી આપવાને બદલે આઉટસોર્સિંગ દ્વારા ખાનગી એજન્સીઓ પાસેથી કામ લઈ રહી છે. આના કારણે સ્થાનિક અને આદિવાસી વિસ્તારના યુવાનોને રોજગારીથી વંચિત રાખવામાં આવી રહ્યા છે.

એક અઠવાડિયામાં MD સાથે બેઠકનું આશ્વાસન

DGVCL કચેરી ખાતે યોજાયેલી આક્રોશ સભા બાદ કંપનીના અધિકારીઓ સાથે વાટાઘાટો કરવામાં આવી હતી. ધારાસભ્યોએ જણાવ્યું કે કંપની દ્વારા તેમને એક અઠવાડિયાની અંદર મેનેજિંગ ડિરેક્ટર (MD) સાથે બેઠકનું આયોજન કરવાનું આશ્વાસન આપવામાં આવ્યું છે.

આ બેઠકમાં આ સમગ્ર નીતિવિષયક પ્રશ્ન અંગે ચર્ચા કરવામાં આવશે. ધારાસભ્યોએ સ્પષ્ટ ચેતવણી આપી છે કે જો આ બેઠક બાદ પણ આદિવાસી યુવાનોની ભરતીનો યોગ્ય નિરાકરણ નહીં આવે, તો આગામી દિવસોમાં વધુ ઉગ્ર આંદોલનો અને વિરોધ કાર્યક્રમો કરવામાં આવશે. આ મુદ્દે દક્ષિણ ગુજરાતના આદિવાસી વિસ્તારોમાં તણાવ પ્રવર્તી રહ્યો છે.