વડોદરામાં નશામાં ધૂત બની અકસ્માત સર્જનારો ડેપ્યુટી મામલતદાર સસ્પેન્ડ

વડોદરામાં ઉતરાયણની રાત્રે નશામાં ધૂત બની અકસ્માત સર્જનારા પાદરાના ડેપ્યુટી મામલતદારને સસ્પેન્ડ કરાયો છે. જાહેર સેવકને શોભે નહિ એવું વર્તન કરવા બદલ પાદરાના નાયબ મામલતદાર નરેશ વણકરને ફરજ મોકૂફ કરવાનો કલેકટર દ્વારા નિર્ણય લેવાયો છે.

ઉલ્લેખનિય છે કે પાદરામાં ડેપ્યુટી મામલતદાર તરીકે ફરજ બજાવતા નરેશ વણકર  ઉતરાયણની રાત્રે જેતલપુર બ્રિજ પાસેથી પસારથઇ રહ્યા હતા ત્યારે તેમણે અકસ્માત સર્જ્યો હતો. 

તેમણે કાર પર કાબુ ગુમાવી દેતાં તેમની કાર રસ્તાની સાઇડમાં અથડાઇ હતી. રસ્તાની સાઇડ પર જ્યાં ખોદકામ ચાલતું હતું ત્યાં જ તેમની કાર સીધી ઉતરી ગઇ હતી.તેમની કાર અથડાઇ હોવા છતાં નરેશ વણકર હોશમાં જ ન હતા. 

ઘટનાની જાણ થતાં સ્થાનિો એકત્ર થઇ ગયા હતા અને કાર ચલાવી રહેલા નરેશ વણકરની તપાસ કરતાં તેઓ કારની સીટ પર ઉંઘતા જોવા મળ્યા હતા. લોકોએ તેમને ઢંઢોળ્યા હતા પણ તેમને હોશ સુધ્ધાં ના હતો. તેમણે નશો કર્યો હોવાનું ધ્યાનમાં આવ્યું હતું. તેમની કારમાંથી નંબર પ્લેટ પણ મળી આવી હતી.

ઘટનાની જાણ થતાં લોકોએ તત્કાળ પોલીસને જાણ કરી હતી. પોલીસે સ્થળ પર પહોંચીને નરેશ વણકરની અટકાયત કરી હતી અને આ મામલે ઉંડી તપાસ શરુ કરી હતી.