ગુજરાતમાં સરકારી કચેરીઓમાં સપ્તાહમાં 5 દિવસ કામકાજની માંગ

ગુજરાત રાજ્ય કર્મચારી મહામંડળે સામાન્ય વહીવટી વિભાગને પત્ર લખીને રાજ્યની તમામ સરકારી કચેરીઓમાં શનિવાર અને રવિવાર રજાને લાગુ કરીને માત્ર 5 દિવસ કામકાજનો સપ્તાહ અમલમાં મૂકવાની અરજી કરી છે. આ માંગણીને તેમના પક્ષમાં મજબૂત બનાવતા તેઓએ ભારત સરકારના કચેરી વ્યવસ્થાના ઉદાહરણ અને અન્ય રાજ્યો જેવા કે, રાજસ્થાન, મહારાષ્ટ્ર, દિલ્હી, પંજાબ અને બિહારના મોડલને ટાંક્યું છે.

મહામંડળે આ પત્રમાં જણાવ્યું છે કે, જો શનિવાર અને રવિવારે રજા અપાશે તો કર્મચારીઓને તેમના પરિવાર સાથે વધુ સમય વિતાવવા મળશે, જેના કારણે તેઓનું વર્ક લાઈફ બેલેન્સ સુદ્રઢ થશે. આ ઉપરાંત તેમના પરિવહન ખર્ચમાં ઘટાડો થશે અને માનસિક આરોગ્યમાં પણ સુધારો થશે. ખાસ કરીને મહિલા કર્મચારીઓ માટે આ વ્યવસ્થા વધુ લાભદાયી બનશે. કારણ કે, તેઓ ઘર અને નોકરી વચ્ચે યોગ્ય સંતુલન સાધી શકશે.

મહામંડળે એવી પણ રજૂઆત કરી છે કે, જો કચેરીનો સમય સવારે 9:45થી સાંજે 6:10 સુધી નક્કી કરવામાં આવે તો 2 અઠવાડિયામાં 79 કલાક 10 મિનિટની કામગીરી થશે, જે હાલની 78 કલાક 50 મિનિટ કરતાં વધુ છે. આનાથી નાગરિકો માટે કચેરીઓ વધુ સમય ખુલ્લી રહી શકશે અને જાહેર સેવા વધુ સમય સુધી ઉપલબ્ધ રહેશે.

જાહેર તંત્ર માટે પણ આ પદ્ધતિ લાભદાયી સાબિત થશે. વીજળી, પાણી અને અન્ય સરકારી ખર્ચમાં ઘટાડો થશે, તેમજ કર્મચારીઓમાં ઉત્સાહ અને કાર્યક્ષમતા વધશે. સરકારે જો આ સૂચન અમલમાં મૂકે તો કાર્યસ્થળની સંસ્કૃતિમાં સાથોસાથ અર્થતંત્રમાં પણ સકારાત્મક બદલાવ આવી શકે છે.