ચાંગોદર ઓવરબ્રિજ પર બસનું ટાયર પડતા મોત

અમદાવાદના ચાંગોદરમાં હચમચાવી દેતી દુર્ઘટના :

અમદાવાદના ચાંગોદરમાં આજે એક કમકમાટીભર્યો અકસ્માતનો કિસ્સો સામે આવ્યો છે. ચાંગોદર ઓવરબ્રિજ પરથી પસાર થઈ રહેલી એક ખાનગી કંપનીની સ્ટાફ બસનું ટાયર અચાનક નીકળીને નીચે સર્વિસ રોડ પર પડ્યું હતું. આ અણધારી દુર્ઘટનામાં નીચેથી પસાર થઈ રહેલા એક નિર્દોષ બાઇક ચાલકનું ઘટનાસ્થળે જ કરુણ મોત નીપજ્યું હતું.

ફિલ્મી દ્રશ્યો જેવો ગંભીર અકસ્માત : 

પ્રાપ્ત માહિતી મુજબ, ઓવરબ્રિજ પરથી 'યુનિસન ફાર્મા' કંપનીની સ્ટાફ બસ પસાર થઈ રહી હતી. તે જ સમયે ચાલુ બસનું એક તોતિંગ ટાયર અચાનક નીકળી ગયું હતું. આ ટાયર બ્રિજ પરથી છૂટું પડીને સીધું નીચે સર્વિસ રોડ પર ખાબક્યું હતું.

કમનસીબીની વાત એ છે કે, તે જ ક્ષણે ધોળકા તાલુકાના બદરખા ગામના રહેવાસી ભીખાભાઈ ત્રિકમભાઈ ઝાલા બાઇક લઈને સર્વિસ રોડ પરથી પસાર થઈ રહ્યા હતા. આ કાળમુખું ટાયર સીધું તેમના પર પડતાં તેમનું ઘટનાસ્થળે જ પ્રાણપંખેરું ઊડી ગયું હતું. ભીખાભાઈ ઝાલાની આ અકસ્માતમાં મોત નીપજતાં પરિવારમાં શોકનું મોજું ફરી વળ્યું છે.

ઘટનાને પગલે ઓવરબ્રિજ અને સર્વિસ રોડ પર લોકોના ટોળા ઉમટી પડ્યા હતા અને ટ્રાફિક જામની સ્થિતિ સર્જાઈ હતી. જાણ થતાં જ ચાંગોદર ટ્રાફિક પોલીસની ટીમ તાત્કાલિક ઘટનાસ્થળે પહોંચી હતી અને પરિસ્થિતિ સંભાળીને ટ્રાફિક હળવો કરાવ્યો હતો. પોલીસે બસના માલિક અને ડ્રાઈવર વિરુદ્ધ કાયદેસરની કાર્યવાહી હાથ ધરી છે.