Ahmedabad Youth Murder Near Gulbarg Society: શહેરમાં ગુનેગારો બેફામ બન્યા હોય તેમ કાયદો અને વ્યવસ્થાની સ્થિતિને પડકારતી એક અત્યંત હચમચાવી દેતી લોહિયાળ ઘટના સામે આવી છે. શહેરના મેઘાણીનગર વિસ્તારમાં આવેલી ગુલબર્ગ સોસાયટીની બહાર, જાહેર રસ્તા પર જ એક યુવકની તીક્ષ્ણ હથિયારોના આડેધડ ઘા ઝીંકીને ઘાતકી હત્યા કરવામાં આવી છે. મંગળવારે (2 જૂન, 2026) સવારે ધોળા દિવસે સામાન્ય નાગરિકોની નજર સામે કરાયેલા આ કરપીણ હત્યાકાંડને પગલે સમગ્ર પંથકમાં ભારે અરેરાટી અને ફફડાટ વ્યાપી ગયો છે. ઘટનાને પગલે આસપાસના રહીશોના ટોળેટોળાં રોડ પર એકત્રિત થઈ જતાં પોલીસ પ્રશાસન દ્વારા તકેદારીના ભાગરૂપે થોડા સમય માટે વાહનવ્યવહાર બંધ કરવાની ફરજ પડી હતી.
ઉગ્ર બોલાચાલી બાદ જાહેર માર્ગ પર ખેલાયો લોહિયાળ ખેલ સ્થાનિક સૂત્રો પાસેથી મળતી વિગતો મુજબ, મૃતક યુવકની ઓળખ લક્ષ્મીનગરના રહેવાસી હરેશભાઈ પટણી તરીકે થઈ છે. મંગળવારે સવારે આશરે 11:00 વાગ્યાની આસપાસ હરેશ પોતાના ઘરની બહાર નીકળીને રિક્ષામાં બેસી ગુલબર્ગ સોસાયટી પાસે આવ્યો હતો. તે દરમિયાન અચાનક કેટલાક અજાણ્યા શખ્સો ત્યાં ધસી આવ્યા હતા અને હરેશ સાથે કોઈ બાબતે બોલાચાલી શરૂ કરી હતી. જોતજોતામાં આ વિવાદ એટલો ઉગ્ર બન્યો કે સામે આવેલા શખ્સોએ પોતાની પાસે રહેલી છરીઓ કાઢી હરેશ પર હુમલો કરી દીધો હતો.
પરિજનોના આક્રંદથી વાતાવરણ ગમગીન બન્યું લોહીલુહાણ હાલતમાં જીવ બચાવવા માટે હરેશ ભાગ્યો હતો, પરંતુ હત્યારાઓએ પાછળ દોડીને તેના પર તીક્ષ્ણ હથિયારના આડેધડ ઘા ઝીંકી દીધા હતા. ગંભીર ઇજાઓના કારણે હરેશ અસારવા ગુજરાતી સ્કૂલ નજીક મુખ્ય માર્ગ પર જ ચક્કર ખાઈને ઢળી પડ્યો હતો અને ઘટનાસ્થળે જ તેના પ્રાણપંખેરૂ ઊડી ગયા હતા. જાહેર રોડ ઉપર જ ભાઈની હત્યા થઈ જતાં ઘટનાસ્થળે દોડી આવેલી બહેન અને પરિજનોના આક્રંદથી વાતાવરણ ગમગીન બન્યું હતું.
પોલીસનો કાફલો ઘટનાસ્થળે&nbsp; જાહેર માર્ગ પર ધોળા દિવસે બેખોફ બનીને હત્યાની ઘટનાને અંજામ અપાતા સ્થાનિક પોલીસના પેટ્રોલિંગ સામે ગંભીર સવાલો ઊભા થયા છે. ઘટનાની જાણ થતાં જ મેઘાણીનગર પોલીસ મથકનો ઉચ્ચ અધિકારીઓ સહિતનો મોટો કાફલો તાત્કાલિક ઘટનાસ્થળે દોડી આવ્યો હતો. પોલીસે રોડ પર જમા થયેલા ઉશ્કેરાયેલા લોકટોળાંને વિખેરીને પરિસ્થિતિ કાબૂમાં લીધી હતી અને મૃતદેહને પોસ્ટમોર્ટમ અર્થે સિવિલ હોસ્પિટલ ખસેડ્યો હતો.
સીસીટીવીના આધારે હત્યારાઓની શોધખોળ શરૂ આ કરપીણ હત્યા કયા અંગત મનદુઃખ, નાણાકીય લેણદેણ કે જૂની અદાવતના કારણે કરવામાં આવી છે તેનું ચોક્કસ કારણ હજુ સત્તાવાર રીતે જાણી શકાયું નથી. મેઘાણીનગર પોલીસે ગુનો નોંધી, અસારવા ગુજરાતી સ્કૂલ અને ગુલબર્ગ સોસાયટીની આજુબાજુના માર્ગો પર લાગેલા સીસીટીવી (CCTV) કેમેરાના ફૂટેજ મેળવીને ફરાર થઈ ગયેલા હત્યારાઓને ઝડપી પાડવા અલગ-અલગ ટીમો બનાવીને ચક્રો ગતિમાન કર્યા છે.

અમદાવાદમાં ધોળા દિવસે યુવકની હત્યા

કાયદો-વ્યવસ્થાની સ્થિતિ કથળી, પોલીસના પેટ્રોલિંગ સામે ગંભીર ઊભા થયા સવાલો

June 2, 2026 | 14:26 IST