વડોદરા શહેરમાં વિશ્વામિત્રી નદીના મગરોનું રહેણાંક વિસ્તારોમાં ઘૂસી આવવાનું જોખમ હજી પણ યથાવત્ છે. હરણી સમા લિંક રોડ પર આવેલી પંચામૃત રેસિડેન્સીના પાર્કિંગમાં મોડી રાત્રે અંદાજે 4 ફૂટનો એક મગર આવી ચડ્યો હતો, જેના પગલે સોસાયટીના રહીશોમાં ભારે દોડધામ અને ગભરાટનો માહોલ સર્જાયો હતો.
પહેલા ટૂ-વ્હીલર, પછી કાર નીચે સંતાયો
સ્થાનિક રહીશોએ રાત્રે ૧૨:૨૫ વાગ્યે મગરને જોતા તુરંત જ વન વિભાગ અને કેનાઈન ગ્રુપના સભ્યોને જાણ કરી હતી. ટીમ ઘટનાસ્થળે પહોંચી ત્યારે મગર પહેલા ટૂ-વ્હીલર નીચે બેઠો હતો. વન વિભાગના જિજ્ઞેશભાઈ, લાલાભાઈ અને કેનાઈન ગ્રુપના વિશાલ ઠાકુર સહિતની ટીમે રેસ્ક્યૂની કાર્યવાહી શરૂ કરી. જોકે, મગર છંછેડાઈ જતાં તે ભાગીને તરત જ નજીકમાં પાર્ક કરેલી એક કાર નીચે સંતાઈ ગયો હતો, જેનાથી રેસ્ક્યૂ વધુ પડકારજનક બન્યું હતું.
મગરની ભારે ઊછળકૂદ
કેનાઈન ગ્રુપના સભ્યોએ ભારે જહેમત બાદ મગરના ગળામાં ગાળિયો નાખ્યો હતો. ગાળિયો નખાતા જ મગરે પોતાને છોડાવવા માટે ભારે ઊછળકૂદ શરૂ કરી દીધી હતી. જોકે, રેસ્ક્યૂ ટીમે સંપૂર્ણ સુરક્ષા સાથે મગરને પકડી પાડ્યો હતો અને તેને વડોદરા વન વિભાગના રેસ્ક્યૂ સેન્ટર ખાતે લઈ જવામાં આવ્યો હતો. આ મગરને ટૂંક સમયમાં તેના કુદરતી આવાસ વિશ્વામિત્રી નદીમાં છોડી દેવામાં આવશે.
વડોદરામાં મગરોનું વધતું જોખમ
નોંધનીય છે કે,1960માં વિશ્વામિત્રી નદીમાં લગભગ 50 મગર હોવાનો અંદાજ હતો, જ્યારે આજે તેની સંખ્યા 400થી વધુ છે. સમગ્ર વડોદરા જિલ્લામાં વિવિધ નદીઓ અને તળાવોમાં મળીને કુલ 1000થી વધુ મગરો વસે છે. ચાર દિવસ પહેલાં જ ભાયલી-સેવાસી કેનાલ રોડ પરની અશ્વમેઘ એવન્યુમાં પણ 6 ફૂટનો મહાકાય મગર કાર નીચેથી મળી આવ્યો હતો, જે રેસિડેન્શિયલ વિસ્તારોમાં મગરોનું જોખમ સતત વધી રહ્યું હોવાનું સૂચવે છે.
વન વિભાગે નાગરિકોને નદી કિનારે સાવચેતી રાખવા અને પાણીમાં છબછબિયાં ન કરવા માટે અનુરોધ કર્યો છે, કારણ કે મગરના હુમલામાં મૃત્યુ થવાના કિસ્સામાં સરકાર તરફથી રૂ. 4 લાખનું વળતર ચૂકવવામાં આવે છે.

સોસાયટીમાં મગર ઘૂસી જતા દોડધામ

ચોમાસું પૂરું છતાં મગર બહાર નીકળવાનો સિલસિલો યથાવત્, પાર્કિંગમાં મગર ઘૂસતાં રહીશોમાં ગભરાટ

November 1, 2025 | 19:05 IST