વડોદરા તાલુકા પોલીસના વિવાદીત PSI ગોહિલની આખરે બદલી

વડોદરા તાલુકા પોલીસ સ્ટેશનના વિવાદીત PSI જે.યુ .ગોહિલની આખરે બદલી કરી દેવાઇ છે. તાલુકા પોલીસ સ્ટેશનની હદમાં વારંવાર સ્ટેટ મોનિટરીંગ સેલ દ્વારા દરોડા પાડવામાં આવ્યા બાદ PSI જે. યુ ગોહિલની બદલી કરી દેવાઇ છે. પીએસઆઇ ગોહિલની બદલીથી પોલીસ તંત્રમાં સન્નાટો છવાઇ ગયો છે. 

સ્ટેટ મોનિટરીંગ સેલ દ્વારા તાજેતરમાં તાલુકા પોલીસ સ્ટેશનની હદમાં દરોડા પાડવામાં આવ્યા હતા જેના કારણે પીએસઆઇ જે.યુ.ગોહિલની બેદરકારી સામે આવી હતી. આ વાત ઉચ્ચ પોલીસ અધિકારીઓના ધ્યાનમાં આવતા આખરે વિવાદીત પીએસઆઇની બદલી કરી દેવાઇ છે. જિલ્લા પોલીસ વડા રોહન આનંદે પીએસઆઇ ગોહિલની બદલી કરીને તેમને લીવ રીઝર્વમાં મુકી દીધા છે અને સાથે તેમને એલઆઇબીની પણ કામગિરી સોંપી છે. 

પીએસઆઇ ગોહિલ  ભાયલી સગીરા પર સામુહિક દુષ્કર્મની ગંભીર ઘટના બાદ પણ નિષ્ક્રિય હતા તથા તેમણે ગણપતિ વિસર્જનની ઉજવણી કરનાર પોલીસ સ્ટાફને પરેડ કરાવી હોવાનો મામલો પણ સામે આવ્યો હતો. તેઓ નાગરિકો સાથે દુર્વ્યવહારની અનેક ફરિયાદોને લઇને પણ વિવાદોમાં સપડાયા હતા. PSI જે.યુ ગોહિલના સ્થાને ડભોઈ PSI મિશ્રાને મૂકાતા હવે સ્થિતિ સુધરે તેવી આશા લોકો વ્યક્ત કરી રહ્યા છે.

જિલ્લા પોલીસ વડાએ ડભોઇના પીએસઆઇ આર.આર.મિશ્રાને મુક્યા છે જ્યારે સેકન્ડ પીએસઆઇ તરીકે સાવલી પોલીસના પીએસઆઇ એન.આર.કદાવાલાને મુક્યા છે. આ સાથે જરોદના પીએસઆઇ એસ.જે.ડામોરને સાવલી બદલી કરી છે જ્યારે વડોદરા ગ્રામ્ય ડિવીઝનના રીડર એ.એમ.પરમારને વરણામા પોલીસ સ્ટેશનમાં મુક્યા છે.