Chotila Rajkot Highway Accident: સૌરાષ્ટ્રની જીવાદોરી સમાન રાજકોટ-ચોટીલા નેશનલ હાઈવે પર સાંગાણી ગામ નજીક મોડી રાત્રે એક અત્યંત ભયાનક અને રક્તરંજિત દુર્ઘટના સર્જાઈ છે. એક ખાનગી લક્ઝરી બસ અને ડામર ભરેલા ટેન્કર વચ્ચે થયેલી જોરદાર ટક્કર બાદ બસમાં વિકરાળ આગ ફાટી નીકળતા 4 મુસાફરોના ઘટનાસ્થળે જ કરુણ મોત નીપજ્યા છે. આ અકસ્માતમાં અન્ય 10 જેટલા મુસાફરો ગંભીર રીતે ઈજાગ્રસ્ત થયા છે.
કેવી રીતે સર્જાઈ દુર્ઘટના? પ્રાપ્ત વિગતો અનુસાર, આ અકસ્માત બુધવારે મોડી રાત્રે આશરે 1:30 વાગ્યાના સુમારે સર્જાયો હતો. હાઈવે પરથી પસાર થઈ રહેલા ડામર ભરેલા ટેન્કરનું ટાયર અચાનક ફાટતા ટેન્કર ચાલકે સ્ટીયરિંગ પરથી કાબૂ ગુમાવ્યો હતો અને ટેન્કર ત્યાં જ થંભી ગયું હતું. આ દરમિયાન પાછળથી પૂરઝડપે આવી રહેલી ખાનગી ટ્રાવેલ્સની લક્ઝરી બસ ટેન્કરના પાછળના ભાગે ધડાકાભેર અથડાઈ હતી. અથડામણ એટલી પ્રચંડ હતી કે બસમાં તાત્કાલિક શોર્ટ સર્કિટ થયું અને ગણતરીની સેકન્ડોમાં જ આગે વિકરાળ સ્વરૂપ ધારણ કરી લીધું હતું. બસમાં સવાર મુસાફરો જ્યારે ગાઢ નિદ્રામાં હતા ત્યારે અચાનક થયેલા ધડાકા અને આગને કારણે ચીસાચીસ મચી ગઈ હતી.
4 મુસાફરો જીવતા સળગ્યા, ઓળખ માટે DNA ટેસ્ટનો આશરો આ ભીષણ આગમાં 4 મુસાફરોને બહાર નીકળવાની તક સુધ્ધાં મળી નહોતી અને તેઓ બસની અંદર જ જીવતા ભુંજાયા હતા. મૃતદેહો એટલી હદે બળી ગયા છે કે તેમની ઓળખ કરવી અશક્ય બની છે, જેથી હવે વહીવટી તંત્ર દ્વારા તેમની ઓળખ સ્થાપિત કરવા માટે DNA ટેસ્ટની મદદ લેવામાં આવશે. બીજી તરફ, બસની પાછળ આવતી અન્ય એક ખાનગી બસને પણ નુકસાન પહોંચ્યું હતું, પરંતુ તેમાં કોઈ જાનહાનિના સમાચાર નથી.
BSF જવાનની બહાદુરી અને જીવ બચાવવા માટેના વલખાં આ ભયાનક દુર્ઘટનામાં અનેક લોકોએ બારીના કાચ તોડીને નીચે કૂદકો મારી પોતાના જીવ બચાવ્યા હતા. આ મુસાફરોમાં આસામના મણિપુરમાં ફરજ બજાવતા BSF જવાન નરેન્દ્રભાઈ રાઠોડ પણ સામેલ હતા, જેઓ રજા પર ઘરે આવ્યા હતા. અકસ્માત સમયે પોતે દાઝી ગયા હોવા છતાં, તેમણે બહાદુરી બતાવી અન્ય મુસાફરોને પણ સુરક્ષિત રીતે બસમાંથી બહાર કાઢવામાં મદદ કરી હતી. પ્રત્યક્ષદર્શીઓના જણાવ્યા મુજબ, કેટલાક મુસાફરો બારીમાંથી કૂદ્યા ત્યારે નીચે ટેન્કરમાંથી ઢોળાયેલા ગરમ ડામર પર પડ્યા હતા, જેના કારણે તેઓ ગંભીર રીતે દાઝી ગયા હતા. સ્થાનિક પેટ્રોલ પંપના કર્મચારીઓએ પણ ફાયર સેફ્ટીના સાધનો અને ધોકા વડે બસના કાચ તોડી અંદાજે 20 થી 25 લોકોના જીવ બચાવ્યા હતા.
ઈજાગ્રસ્તોની યાદી અને સારવાર અકસ્માતમાં ઈજાગ્રસ્ત થયેલા મુસાફરોને તાત્કાલિક ધોરણે ચોટીલા રેફરલ હોસ્પિટલ ખાતે પ્રાથમિક સારવાર આપ્યા બાદ વધુ સારવાર માટે રાજકોટ સિવિલ હોસ્પિટલ ખસેડવામાં આવ્યા છે. ઈજાગ્રસ્તોમાં મુખ્યત્વે નીચે મુજબના નામ સામે આવ્યા છે: વિધિ પટોડીયા (18 વર્ષ): રહે. મેંદરડા, જુનાગઢ નરેન્દ્ર રાઠોડ (50 વર્ષ): રહે. લીમડી, સુરેન્દ્રનગર (BSF જવાન) નાગરાજ રાણા (30 વર્ષ): રહે. તાલાળા, ગીર સોમનાથ
વહીવટી તંત્રની કાર્યવાહી અને લોકોનો આક્રોશ ઘટનાની જાણ થતા જ ચોટીલા SDM એચ.ટી. મકવાણા અને પોલીસનો કાફલો ઘટનાસ્થળે પહોંચ્યો હતો. ફાયર ફાઈટરની ટીમોએ ભારે જહેમત બાદ આગ પર કાબૂ મેળવ્યો હતો. SDM ના જણાવ્યા અનુસાર, બસમાં સવાર 35 થી 40 મુસાફરોને સુરક્ષિત રીતે બચાવી લેવામાં આવ્યા છે. આ ઘટનાને પગલે સ્થાનિકોમાં ભારે આક્રોશ જોવા મળી રહ્યો છે. પ્રત્યક્ષદર્શીઓ અને મુસાફરોના સગા-સંબંધીઓએ આક્ષેપ કર્યો છે કે હાઈવે પર અનેક જગ્યાએ બંધ પડેલા ટેન્કરો કે ટ્રકની પાછળ રેડિયમ પટ્ટી હોતી નથી, જેના કારણે રાત્રિના સમયે તે દેખાતા નથી અને આવા જીવલેણ અકસ્માતો સર્જાય છે. હાલમાં પોલીસે આ મામલે અકસ્માતનો ગુનો નોંધી વધુ તપાસ હાથ ધરી છે.

રાજકોટ-ચોટીલા હાઈવે અકસ્માત

ડામરના ટેન્કર સાથે લક્ઝરી બસ અથડાતા 4 મુસાફરો જીવતા ભુંજાયા

May 14, 2026 | 11:55 IST