Mehsana માં પોલીસ ભરતીની શારીરિક કસોટી દરમિયાન બોગસ ઉમેદવાર પકડાયો

સુરેશ વણોલ, અમદાવાદ

ગુજરાત પોલીસ ભરતીની હાલમાં શારીરિક કસોટી ચાલી રહી છે. મહેસાણા (Mehsana) ખાતે બુધવારે એક બોગસ ઉમેદવારને પકડી પાડવામાં આવ્યો છે. ઉમેદવારે ટેકનોલોજીના માધ્યમથી કોલ લેટરમાં ચેડાં કરી પોતાના નામનો ખોટો કોલ લેટર બનાવ્યો હતો. સમગ્ર મામલે મહેસાણા (Mehsana) એ-ડિવિઝન પોલીસ સ્ટેશનમાં ગુનો દાખલ કરવામાં આવ્યો છે. સતર્કતા દાખવી બોગસ ઉમેદવારને પડકી પાડનાર પોલીસ અધિકારીને રાજ્યના પોલીસ વડા વિકાસ સહાય ઇનામ આપશે.

ગુજરાત પોલીસ ભરતી બોર્ડ દ્વારા રાજ્યભરમાં અલગ-અલગ 15 ગ્રાઉન્ડ ખાતે શારીરિક કસોટી પ્રક્રિયા 8 જાન્યુઆરી 2025થી ચાલી રહી છે. શારીરિક કસોટી દરમ્યાન કોઇપણ પ્રકારની ગેરરીતિ ન થાય અને સંપૂર્ણ પારદર્શિતા સાથે ભરતી પ્રક્રિયા પૂર્ણ થાય તે માટે ઉચ્ચ સ્તરીય મોનીટરીંગ સાથે ભરતી બોર્ડ દ્વારા આધુનિક ટેકનોલોજીનો ઉપયોગ કરવામાં આવી રહ્યો છે. 

22 જાન્યુઆરી 2025ને બુધવારના રોજ મહેસાણા (Mehsana) પોલીસ પરેડ ગ્રાઉન્ડ ખાતે ઉમેદવારોની રજિસ્ટ્રેશન પ્રક્રિયા દરમ્યાન એક બોગસ ઉમેદવાર પકડી પાડવામાં આવ્યો છે. ઉમેદવાર તેના મિત્રના કોલલેટરનો ઉપયોગ કરી ટેકનોલોજીના માધ્યમથી કોલલેટરમાં નામ અને સરનામાની વિગતોમાં એડિટિંગ કરી પોતાના નામનો ખોટો કોલલેટર બનાવી ભરતી પ્રક્રિયામાં ભાગ લેવાનો પ્રયત્ન કરતાં પકડાઈ ગયો છે. 

આ બોગસ ઉમેદવાર વિરૂદ્ધ મહેસાણા (Mehsana) એ-ડિવિઝન પોલીસ સ્ટેશનમાં ગુનો દાખલ કરી કાર્યવાહી હાથ ધરવામાં આવી છે. બોગસ ઉમેદવારને પકડી પાડનાર પોલીસ અધિકારીને રાજ્યના પોલીસ વડા વિકાસ સહાય તરફથી પ્રોત્સાહક ઇનામ આપવામાં આવશે.