જામનગર વસતી ગણતરી તાલીમમાં બોગસ હાજરી કૌભાંડ

જામનગરમાં વસ્તી ગણતરી તાલીમ દરમિયાન બોગસ હાજરીનો વિવાદ

જામનગર શહેરમાં વસતી ગણતરી માટેની તાલીમ દરમિયાન ગંભીર ગેરરીતિ આચરવામાં આવી હોવાના આક્ષેપો થયા છે. તાલીમમાં હાજર ન રહેલા કેટલાક કર્મચારીઓને કાગળ પર હાજર દર્શાવવા માટે બોગસ સહી કરવામાં આવી હોવાનું બહાર આવતા વહીવટી તંત્રમાં ખળભળાટ મચી ગયો છે.

તાલીમ કાર્યક્રમમાં ગેરરીતિનો આક્ષેપ

માહિતી અનુસાર, શહેરની એ.કે. દોશી મહિલા કોલેજ ખાતે વસતી ગણતરી સંદર્ભે તાલીમ કાર્યક્રમ યોજાયો હતો. આ તાલીમમાં વિવિધ વિભાગોના કર્મચારીઓ અને શિક્ષકોને ફરજ સોંપવામાં આવી હતી. કેટલાક કર્મચારીઓ તાલીમમાં હાજર રહ્યા ન હોવા છતાં તેમને સત્તાવાર રીતે હાજર દર્શાવવામાં આવ્યા હોવાનો આરોપ છે.

હાજરી પત્રકમાં બોગસ સહીનો ખુલાસો

આક્ષેપ મુજબ, ગેરહાજર રહેલા કર્મચારીઓના નામ સામે હાજરી પત્રકમાં ખોટી સહીઓ કરીને તેમની હાજરી નોંધવામાં આવી હતી. આ સમગ્ર પ્રક્રિયામાં જવાબદાર અધિકારીઓની ભૂમિકા અંગે પણ પ્રશ્નો ઉઠી રહ્યા છે. મહત્વના રાષ્ટ્રીય કાર્યમાં આવી ગેરરીતિ સામે આવતા અનેક સવાલો ઊભા થયા છે.

જાગૃત શિક્ષકે પુરાવા સાથે કરી રજૂઆત

નગર પ્રાથમિક શિક્ષણ સમિતિ સાથે સંકળાયેલા એક શિક્ષકે સમગ્ર મામલાની વિગતવાર રજૂઆત મ્યુનિસિપલ કમિશનરને કરી છે. રજૂઆત સાથે હાજરી પત્રકોની નકલો અને અન્ય દસ્તાવેજી પુરાવા પણ જોડવામાં આવ્યા હોવાનું જાણવા મળ્યું છે. ફરિયાદમાં જણાવાયું છે કે આશરે 10 જેટલા શિક્ષકો અને કર્મચારીઓ તાલીમમાં ગેરહાજર હોવા છતાં તેમની હાજરી નોંધવામાં આવી હતી.

વહીવટી તંત્રમાં મચ્યો ફફડાટ

મામલો જાહેર થતાં જ જામનગર મહાનગરપાલિકાના વહીવટી તંત્રમાં ચકચાર મચી છે. વસ્તી ગણતરી જેવી મહત્વપૂર્ણ પ્રક્રિયામાં આવી બેદરકારી સામે આવતા સ્થાનિક સ્તરે પણ ચર્ચાઓ શરૂ થઈ ગઈ છે.

તપાસના આદેશ, દોષિતો સામે કાર્યવાહીનો સંકેત

જામનગર મહાનગરપાલિકાના અધિકારીઓએ ઘટનાની તપાસના આદેશ આપ્યા છે. અધિકારીઓના જણાવ્યા મુજબ તપાસમાં ગેરરીતિ સાબિત થશે તો જવાબદાર કર્મચારીઓ અને અધિકારીઓ સામે કડક કાયદેસરની કાર્યવાહી કરવામાં આવશે.

હવે તપાસના પરિણામ પર નજર

હાલ સમગ્ર ઘટનાક્રમની તપાસ શરૂ કરવામાં આવી છે. હવે સૌની નજર એ બાબત પર છે કે તપાસમાં શું હકીકત બહાર આવે છે અને ગેરરીતિમાં સંડોવાયેલા લોકો સામે તંત્ર કેવાં કડક પગલાં ભરે છે.

શું હતો સમગ્ર મામલો?

20 થી 22 મે 2026 દરમિયાન એ.કે. દોશી મહિલા કોલેજ ખાતે વસતી ગણતરીની તાલીમમાં અનેક કર્મચારીઓ ગેરહાજર હોવા છતાં તેમની બોગસ સહીઓ કરીને હાજર બતાવવામાં આવ્યા હતા. આ ગોટાળાની વિગતો એવી છે કે, ગત 20 મે ના રોજ 10 કર્મચારીઓ અને 21 મે ના રોજ 9 કર્મચારીઓ તાલીમમાં ગેરહાજર હતાં. તેમ છતાં તેમણે બીજા દિવસે આવીને પાછલી તારીખમાં સહીઓ કરી હોવાનું હાજરી પત્રક પરથી જણાયું છે.

આ ઉપરાંત હાજરી પત્રકના ક્રમ નંબર 59, 61, 62 અને 63 ના કર્મચારીઓ ચાર્જ ઓફિસરના લાગવગ ધરાવતાં અને અંગત હોવાથી એકપણ દિવસ તાલીમમાં હાજર રહ્યા નહોતાં. તેમ છતાં અન્ય વ્યક્તિ દ્વારા બોગસ સહીઓ કરાવીને કાગળ પર હાજર દર્શાવવામાં આવ્યા છે. આ કેસમાં ગંભીર બાબત એ છે કે, વસતી ગણતરી અધિકારી નિકુંજ શુક્લને રજૂઆત કરવામાં આવી હોવા છતાં તેમના તરફથી કાર્યવાહી નહી થતાં ઉચ્ચ સ્તરે ફરિયાદ કરવાની ફરજ પડી છે.