કચ્છ જિલ્લામાં વધુ એક હૈયું કંપાવી દે તેવો હત્યાનો સનસનીખેજ બનાવ સામે આવ્યો છે. ભુજ તાલુકાના નાના વરનોરા ગામે 18 વર્ષીય પતિએ તેના અન્ય મહિલા સાથેના આડા સંબંધોમાં નડતરરૂપ બનતી 19 વર્ષીય પત્નીની ઘાતકી હત્યા કરી નાખી હતી. હત્યા બાદ પુરાવા છુપાવવાના ઈરાદે લાશને દૂર એક અવાવરું કૂવામાં ફેંકી દેવામાં આવી હતી.
માધાપર પોલીસ સ્ટેશનમાં ગુલસમ (ઉં.વ. 19)ના પિતા રમજુ મામન (ઉં.વ. 53) દ્વારા ફરિયાદ નોંધાવવામાં આવી હતી, જેમાં જણાવવામાં આવ્યું હતું કે ગુલસમ બે વર્ષ પહેલા મોહસિન મામન સાથે પરણાવી હતી. જોકે, લગ્ન પહેલાં છેલ્લા પાંચ વર્ષથી મોહસિન અન્ય મહિલા સાથે આડા સંબંધો ધરાવતો હતો. 
લગ્ન પછી પણ આ સંબંધો ચાલુ રહેતાં પતિ-પત્ની વચ્ચે અવારનવાર ઝઘડા થતા હતા. મોહસિન તે અન્ય મહિલા સાથે લગ્ન કરવા માંગતો હતો અને તેથી તે ગુલસમને તેના માર્ગમાં અવરોધ માનતો હતો.
પોલીસના જણાવ્યા અનુસાર, શુક્રવારે રાત્રે આરોપી મોહસિને પૂર્વ આયોજન હેઠળ પત્ની ગુલસમનું તીક્ષ્ણ હથિયાર વડે ગળું કાપી નાખ્યું હતું. હત્યા કર્યા બાદ તેણે લાશને એક કોથળામાં ભરી દીધી હતી અને પોતાની મોટરસાયકલ પર લઈ જઈને જે ખેતરમાં કામ કરતો હતો, ત્યાંના એક કૂવામાં ફેંકી દીધી હતી.
શનિવારે સવારે 7 વાગ્યે ગુલસમ ગુમ થયાની જાણ થતાં તેના પિયર પક્ષ, જે માત્ર 200 મીટર દૂર રહે છે, તેમણે શોધખોળ શરૂ કરી હતી. ખેતરના કૂવામાં ગુલસમના કપડાં તરતા જોવા મળતાં આ કેસનો ભેદ ઉકેલાયો હતો. ફાયર અને પોલીસની મદદથી લાશને બહાર કાઢવામાં આવી હતી.
માધાપર પોલીસે ગણતરીના કલાકોમાં જ હત્યાનો ભેદ ઉકેલી નાખ્યો હતો અને ફરાર આરોપી પતિ મોહસીનની ધરપકડ કરી લીધી હતી. પોલીસે હત્યામાં વપરાયેલું હથિયાર અને મોટરસાયકલ પણ કબજે કરી છે. આરોપી પતિ-પત્ની પિતરાઈ ભાઈ-બહેન હતા. પોલીસે ભારતીય ન્યાય સંહિતા (BNS)ની કલમ 103(1) હેઠળ ગુનો નોંધી વધુ તપાસ હાથ ધરી છે.

ગળું કાપી પત્નીની લાશ કૂવામાં ફેંકી

કચ્છમાં આડા સંબંધોના નડતરના કારણે પતિએ 19 વર્ષીય પત્નીની ઘાતકી હત્યા કરી લાશ કૂવામાં ફેંકી

December 15, 2025 | 18:24 IST