વાઘોડિયામાં ભાજપ ધારાસભ્યનએ વીજ કર્મચારીઓને ખખડાવ્યા

વડોદરાના વાઘોડિયા તાલુકામાં ભાજપના ધારાસભ્ય ધર્મેન્દ્રસિંહ વાઘેલાએ મધ્ય ગુજરાત વીજ કંપની લિમિટેડ (MGVCL)ના કર્મચારીઓને લોકોની ફરિયાદોના પગલે આડેહાથ લીધા છે. વાઘોડિયા તાલુકાના વીજ ગ્રાહકો દ્વારા વીજ કનેકશન આપવામાં ઢીલાઈ, અનિયમિત વીજ પુરવઠો અને કર્મચારીઓના ઉદ્ધતાઈભર્યા વર્તનની ફરિયાદો ઉઠતાં ધારાસભ્યએ કડક વલણ અપનાવ્યું હતું.   લોકોની ફરિયાદો સાંભળવા મિટિંગનું આયોજન   વાઘોડિયા ખાતે સરકારી આરામગૃહમાં ધારાસભ્ય ધર્મેન્દ્રસિંહ વાઘેલાએ લોકોની સમસ્યાઓ સાંભળવા માટે ખાસ મિટિંગનું આયોજન કર્યું હતું. આ મિટિંગમાં મોટી સંખ્યામાં ખેડૂતો અને ગ્રામજનો હાજર રહ્યા હતા, જેમણે વીજ કંપનીની કામગીરી અંગે ગંભીર ફરિયાદો રજૂ કરી હતી. ગ્રામજનોએ જણાવ્યું હતું કે, વીજ કનેકશન મેળવવા માટે ધક્કા ખાવા પડે છે અને ફોન કરવા પર MGVCLના અધિકારીઓ ઉદ્ધતાઈભર્યું વર્તન કરે છે. આ ફરિયાદોના પગલે ધારાસભ્યએ ખટંબા અને વાઘોડિયા કચેરીના MGVCL અધિકારીઓને મિટિંગમાં જ ખખડાવ્યા હતા.   ધારાસભ્યની કડક ચેતવણી   મિટિંગ દરમિયાન ધારાસભ્ય ધર્મેન્દ્રસિંહ વાઘેલાએ વીજ કર્મચારીઓને સ્પષ્ટ શબ્દોમાં ચેતવણી આપી હતી. તેમણે કહ્યું, “તમે મફતમાં સેવા નથી આપતા, સરકાર તમને કામના પૈસા આપે છે. આજે છેલ્લી ચેતવણી આપું છું, ગ્રાહકોની સમસ્યાઓ હલ કરો અને વ્યવસ્થિત જવાબ આપો, નહીં તો કાર્યવાહી કરવી પડશે.” આ ઘટનાનો એક વીડિયો પણ સામે આવ્યો છે, જેમાં ધારાસભ્ય અધિકારીઓને આડેહાથ લેતા જોવા મળે છે.   વાઘોડિયા તાલુકામાં વીજ પુરવઠો વારંવાર બંધ થવાની સમસ્યાએ લોકોના ધંધા-રોજગાર, કચેરીઓ અને બેન્કિંગના કામોને અસર કરી છે. ખેડૂતોની ફરિયાદ છે કે, વાવાઝોડા બાદ પણ કેટલાક વિસ્તારોમાં ખેતી માટેનો વીજ પુરવઠો યથાવત થયો નથી, જેના કારણે પાક સૂકાઈ રહ્યો છે અને તબેલામાં પશુધન પાણી માટે તરસી રહ્યું છે. આ ઉપરાંત, અધિકારીઓ ફોન પર દાદાગીરી કરતા હોવાની ફરિયાદો પણ લોકોએ રજૂ કરી હતી.   આ બાબતે MGVCL વાઘોડિયા સબ સ્ટેશનના ડેપ્યુટી એન્જિનિયર આર. કે. ગોહિલે જણાવ્યું કે, લોકોની વીજ સમસ્યાઓ બે-ત્રણ દિવસમાં ઉકેલી લેવામાં આવશે. તેમણે ધારાસભ્યને બાંહેધરી આપી કે, પ્રિ-મોન્સૂનની અધૂરી કામગીરી પણ પૂર્ણ કરવામાં આવશે, જેથી ગ્રાહકોને હેરાનગતિ ન થાય.   નોંધનીય છે કે, ધર્મેન્દ્રસિંહ વાઘેલાએ અગાઉ પણ વાઘોડિયા તાલુકાના વીજ ગ્રાહકોની સમસ્યાઓ અંગે MGVCLને રજૂઆત કરી હતી. જિલ્લા સંકલન સમિતિની બેઠકમાં પણ તેમણે આ મુદ્દો ઉઠાવ્યો હતો. જોકે, આમ છતાં લોકોની સમસ્યાઓ હલ ન થતાં ગ્રામજનોએ ફરી ધારાસભ્ય સમક્ષ રજૂઆત કરી હતી.   આ ઘટના રાજકોટમાં ભાજપ નેતા દ્વારા વીજ કર્મચારીઓ સામે ઉઠાવેલા આક્ષેપો બાદ ચર્ચામાં આવી છે. વાઘોડિયામાં ધારાસભ્યનું આ કડક વલણ લોકોની સમસ્યાઓ પ્રત્યે તેમની ગંભીરતા દર્શાવે છે. હવે રહેવાનું છે કે, MGVCL આશ્વાસનો અનુસાર લોકોની સમસ્યાઓનું નિરાકરણ કેટલી ઝડપે લાવે છે.