HMPV વાયરસ સામે સતર્ક રહો, રાજ્ય સરકારની ગાઇડ લાઇન

વિશ્વને હચમચાવી દેનાર કોવિડ-19 રોગચાળા બાદ ચીનમાં HMPV નામના વાઈરસે દસ્તક આપી છે. હવે ભારતમાં તેનો પહેલો કેસ સામે આવ્યો છે. બેંગલુરુની એક હોસ્પિટલમાં આઠ મહિનાની બાળકીમાં HMPV વાઈરસ મળી આવ્યો છે તો 3 મહિનાની બાળકીમાં પણ તેના લક્ષણો જોવા મળ્યા છે. આરોગ્ય વિભાગનું કહેવું છે કે અમે અમારી લેબમાં તેનું પરીક્ષણ કર્યું નથી. ખાનગી હોસ્પિટલમાં આ કેસનો રિપોર્ટ આવ્યો છે.

આજે રાજ્યના આરોગ્ય વિભાગે આ મામલે ખાસ ગાઇડ લાઇન જાહેર કરી છે. ગાઇડ લાઇનમાં લોકોને સાવચેતી રાખવા અપીલ કરાઇ છે. ગાઇડ લાઇન મુજબ આ વાયરસને  શિયાળાની ઋતુમાં શ્વસન વાયરસ જેવો વાયરસ જણાવાયો છે અને  આ વાયરસ વૃદ્ધો અને બાળકોમાં ઝડપી ફેલાય છે. વાયરસગ્રસ્ત લોકોમાં સામાન્ય શરદી અને ફલુના લક્ષણો જોવા મળે છે. જો કે આરોગ્ય વિભાગે જણાવ્યું છે કે ગુજરાતમાં શ્વસનને લગતાં ચેપી રોગોમાં કોઈ વધારો જણાયો નથી

શ્વસનને લગતાં ચેપી રોગોના રક્ષણ માટે શું કરવું જોઈએ? 

* જ્યારે ઉધરસ અથવા છીંક આવે ત્યારે મોટું અને નાકને રૂમાલ અથવા ટિસ્યુથી ઢાંકવું.

* નિયમિત રીતે હાથ સાબુ અને પાણીથી ધોવાં કે સેનેટાઈઝરનો ઉપયોગ કરવો.

* ભીડભાડવાળા સ્થળોથી દૂર રહેવું અને ફલૂથી પીડિત લોકોથી ઓછામાં ઓછું એક હાથનું અંતર રાખવું.

* તાવ, ઉધરસ કે છીંક આવે છે તો જાહેર સ્થળો પર જવાનું ટાળવું.

* વધુ પાણી પીવું અને પૌષ્ટિક ખોરાક ખાવો.

* પ્રબળ પ્રતિરોધક શક્તિ માટે પૂરતી ઊંઘ લેવી.

* બીમારીઓ ફેલાતી અટકાવવા માટે યોગ્ય વેન્ટિલેશનવાળા વાતાવરણમાં રહેવું.

* શ્વસનને લગતા લક્ષણો જણાય તો ઘરમાં જ રહેવું

* બીજાઓ સાથે સંપર્ક મર્યાદિત કરવો અને તાત્કાલિક નજીકના સરકારી દવાખાનાનો સંપર્ક કરવો.

શું ના કરવું જોઈએ?

* આવશ્યક ના હોય તો આંખ, નાક કે મોઢાને સ્પર્શ કરવો નહિ.

* ચેપગ્રસ્ત વ્યક્તિએ  ટુવાલ, રૂમાલ અથવા અન્ય વાસણો બીજા વ્યક્તિના સંપર્કમાં કે ઉપયોગમાં ના આવે તેનું ધ્યાન રાખવું.

* જાતે દવા લેવાનું ટાળવું. લક્ષણોમાં વધારો દેખાય તો આરોગ્ય કર્મચારીનો સંપર્ક કરવો.

ગભરાશો નહિ, સાવચેતી એજ સલામતી હોઈ આ માર્ગદર્શિકાનું અવશ્ય પાલન કરવું.