બનાસકાંઠા જિલ્લાનું થશે વિભાજન, ટૂંક સમયમાં થશે સત્તાવાર જાહેરાત

હવે ગુજરાતમાં 34 જિલ્લા અસ્તિત્વમાં આવશે. રાજ્યના સૌથી મોટા બનાસકાંઠા જિલ્લાનું વિભાજન કરવામાં આવશે. જિલ્લા વિભાજન માટે આજે મળેલી ગુજરાત મંત્રીમંડળની કેબિનેટ બેઠકમાં મંજૂરી આપી દેવામાં આવી છે. વિભાજન અંગે ટૂંક સમયમાં જ મુખ્યમંત્રી કક્ષાએથી જાહેરાત કરાશે.

ગુજરાતને લગતા સૌથી મહત્વના સમાચાર ગાંધીનગરથી મળી રહ્યા છે. પ્રાપ્ત માહિતી મુજબ ગુજરાતના સૌથી મોટા જિલ્લા પૈકીના એક એવા  બનાસકાંઠા જિલ્લાના બે ભાગ કરવામાં આવશે. આ માટે આજની કેબિનેટ બેઠકમાં મંજૂરી મળી હોવાની શકયતા વ્યક્ત કરાઇ છે. જો કે, આ મામલે હજું સત્તાવાર જાહેરાત બાકી છે.

જો જિલ્લા વિભાજન થાય તો બનાસકાંઠાના 14 તાલુકામાંથી 7-7 તાલુકાના બે જિલ્લા બનશે જેમાં ડીસાથી દાંતા તરફના તાલુકાનો મૂળ બનાસકાંઠા જિલ્લો રહેશે જ્યારે ડીસાથી સૂઈગામ તરફના તાલુકાનો નવો જિલ્લો બની શકે છે.

ઉલ્લેખનિય છે કે હાલ રાજ્યમાં 33 જિલ્લા છે અને વધુ 3 નવા જિલ્લા બને તેવી ચર્ચા ઘણા સમયથી ચાલી રહી છે. બનાસકાંઠા ઉપરાંત પાટણ અને કચ્છ જિલ્લાનું વિભાજન કરીને વધુ 3 નવા જિલ્લા બનાવાય તેવી શક્યતા છે પણ હાલ બનાસકાંઠા જિલ્લાનું વિભાજન કરાય તેવી શક્યતા છે. મોટા જિલ્લાનું જો વિભાજન કરાય તો સ્થાનિક લોકોને પડતી અગવડો દુર થઇ શકે છે અને તેઓ સહેલાઇથી પોતાના જિલ્લાના વડા મથક ખાતે સરકારી કામકાજ માટે જઇ શકે છે.