ગુજરાતમાં છેલ્લાં 24 કલાક દરમિયાન 160 તાલુકામાં સરેરાશ 21 મીમી વરસાદ

રાજ્યમાં છેલ્લાં 24 કલાક દરમિયાન 27 જિલ્લાના 160 તાલુકામાં સરેરાશ 21.24 મીમી વરસાદ થયો છે. જ્યારે 91 તાલુકા કોરાધાકોર રહ્યા છે. 127 તાલુકામાં શૂન્યથી 50 મીમી, 25 તાલુકામાં 51 થી 100 મીમી, 2 તાલુકામાં 101 થી 150 મીમી, 4 તાલુકામાં 151થી 200 મીમી અને 2 તાલુકામાં 201 થી 250 મીમી વરસાદ વરસ્યો છે. સૌથી વધુ ડાંગ જિલ્લાના આહવામાં 250 મીમી, વલસાડના કપરાડામાં 241 મીમી, ડાંગના વઘઈમાં 196 મીમી, સુબીરમાં 180 મીમી, વલસાડના ધરમપુરમાં 168 મીમી વરસાદ નોંધાયો છે. 

રાજ્યમાં તાલુકા વાઈઝ વરસાદની સ્થિતિ જોઈએ તો 54 તાલુકામાં શૂન્યથી 50 મીમી, 122 તાલુકામાં 51 થી 125 મીમી, 53 તાલુકામાં 126 થી 250 મીમી જ્યારે 22 તાલુકામાં 251 થી 500 મીમી સુધીનો વરસાદ ખાબકી ચૂક્યો છે. રાજ્યમાં ઝોન વાઈઝ સરેરાશ વરસાદની વાત કરીએ તો અત્યાર સુધી કચ્છમાં 84.80 મીમી, ઉત્તર ગુજરાતમાં 58.59 મીમી, મધ્ય ગુજરાતમાં 101.38, મીમી, સૌરાષ્ટ્રમાં 150.45 મીમી અને દક્ષિણ ગુજરાતમાં 133.96 મીમી વરસાદ વરસી ચૂક્યો છે. અત્યાર સુધી કુલ 113.63 મીમી વરસાદ એટલે કે 12.87 ટકા વરસાદ થયો છે.

રાજ્યમાં 15 ડેમ હાઈએલર્ટ પર

રાજ્યમાં કુલ 206 ડેમ પૈકી 9 ડેમ 100 ટકા ભરાઈ ગયા છે. 25 ડેમ 70 થી 100 ટકા વચ્ચે, 22 ડેમ 50 થી 70 ટકા વચ્ચે, 57 ડેમ 25 થી 50 ટકા વચ્ચે અને 93 ડેમમાં 25 ટકાથી નીચે પાણી છે. 206 ડેમમાંથી હાલ 15 ડેમ હાઈએલર્ટ ઉપર છે. 10 ડેમ એલર્ટ ઉપર છે અને 9 ડેમ વોર્નીંગ લેવલ ઉપર છે. સરદાર સરોવર ડેમમાં દર કલાકે 16,914 ક્યુસેક પાણીની આવક થઈ રહી છે. જ્યારે 23,844 ક્યુસેક પાણી નર્મદા કેનાલમાં છોડવામાં આવી રહ્યું છે. હાલ ડેમની ભયજનક સપાટી 454.98 ફૂટની સામે 392.22 ફૂટ પાણી ભરાયુ છે. એટલે કે 51.31 ટકા ડેમ ભરાયો છે. અમરેલીનો ધાતરવાડી અને સુરજવાડી, ભાવનગરનો રોજકી, બાગડ, રંઘોળા અને શેત્રુંજી, બોટાદનો ભીમદાદ, સુરેન્દ્રનગરના વણસાલ, લીમ-ભોગાવો-1, સબુરી, ધોળીધજા અને નાયકા, મોરબીનો ઘોડાધ્રોઈ અને બ્રહ્માણી તેમજ કચ્છનો કાલાઘોઘા ડેમ હાઈ એલર્ટ ઉપર છે.

ભારે વરસાદના કારણે 1060 લોકોનું સ્થળાંતર

રાજ્યમાં પડી રહેલા મુશળાધાર વરસાદના કારણે અત્યાર સુધી 1060 લોકોનું સલામત સ્થળે સ્થળાંતર કરવામાં આવ્યુ છે. જેમાં બોટાદ જિલ્લામાં 117, અમરેલી જિલ્લામાં 80, ભાવનગર જિલ્લામાં 729 અને સુરેન્દ્રનગર જિલ્લામાં 134 લોકોનું સ્થળાંતર કરવામાં આવ્યુ છે. જ્યારે બોટાદમાં 24, ભાવનગરમાં 89 અને અમરેલીમાં 69 મળી કુલ 182 લોકોનું રેસ્કયૂ કરવામાં આવ્યુ છે. રાજ્યમાં NDRFની 13 તેમજ SDRFની 20 મળી કુલ 33 ટીમો સ્ટેન્ડ બાય રાખવામાં આવી છે. ભારે વરસાદની આગાહીના પગલે માછીમારોને 19 થી 22 જૂન દરમિયાન દરિયો નહી ખેડવા હવામાન વિભાગે ચેતવણી આપી છે.

રાજ્યમાં 76 ગામડામાં વીજ પુરવઠો ખોરવાયો

જીયુવીએનએલના સૂત્રોના જણાવ્યા અનુસાર રાજ્યના 13,285 ગામડામાં વીજ પુરવઠાને અસર થઈ હતી. જેમાં 13,209 ગામડામાં વીજ પુરવઠો પૂર્વવત કરી દેવામાં આવ્યો છે. જ્યારે હજુ પણ 76 ગામડામાં વીજ પુરવઠો ખોરવાયો છે. રાજ્યમાં 16,967 ફીડરને અસર પહોંચી હતી. જેમાંથી 15,882 ફીડર રીપેર કરી દેવામાં આવ્યા છે. જ્યારે 1,085 ફીડર પૂર્વવત કરવાની કામગીરી ચાલુ છે. ભારે વરસાદમાં 17,005 વીજ થાંભલાને નુકસાન થયુ હતુ. તે પૈકી 16,031 વીજ થાંભલા રીપેર કરવામાં આવ્યા છે. જ્યારે 974 વીજ થાંભલા હજુ પણ રીપેર કરવાના પેન્ડીંગ છે. 912 ટ્રાન્સફોર્મરને નુકસાન થયુ હતુ તે પૈકી 868 ટ્રાન્સફોર્મર રીપેર કરી દેવામાં આવ્યા છે. જ્યારે 44 ટ્રાન્સફોર્મર હજુ પેન્ડીંગ છે.

રાજ્યમાં હજુ પણ 153 રસ્તા બંધ

ભારે વરસાદના કારણે રાજ્યમાં માર્ગ અને મકાન વિભાગ હસ્તકના સ્ટેટ હાઈવે અને ગામડાના રસ્તાને નુકસાન થયુ હતુ. 06 સ્ટેટ હાઈવે, 21 અન્ય રોડ અને 136 પંચાયતના માર્ગોને નુકસાન થયુ હતુ. તે પૈકી 3 સ્ટેટ હાઈવે, 8 અન્ય માર્ગ રીપેર કરી પૂર્વવત કરી દેવામાં આવ્યા છે. જ્યારે 3 સ્ટેટ હાઈવે, 13 અન્ય માર્ગ અને 136 પંચાયતના રસ્તા બંધ કરવામાં આવ્યા છે. જ્યારે એક નેશનલ હાઈવે બંધ હોવાનું માર્ગ અને મકાન વિભાગના સૂત્રો દ્વારા જાણવા મળ્યુ છે.

રાજ્યમાં ચાર દિવસ ભારે વરસાદથી રહેશે રાહત

હવામાન વિભાગના જણાવ્યા અનુસાર 20 અને 21 જૂનના રોજ તાપી, ડાંગ, નવસારી અને વલસાડ જિલ્લામાં હળવાથી મધ્યમ વરસાદ થવાની શક્યતાએ યલો એલર્ટ જાહેર કર્યુ છે. 22 જૂનના રોજ ભરૂચ, નર્મદા, તાપી, ડાંગ, સુરત, ભાવનગર અને અમરેલીમાં યલો એલર્ટ તેમજ નવસારી અને વલસાડ જિલ્લામાં ઓરેન્જ એલર્ટ આપવામાં આવ્યું છે. 23 જૂનના રોજ બનાસકાંઠા અને સાબરકાંઠામાં ઓરેન્જ એલર્ટ તેમજ 11 જિલ્લામાં યલો એલર્ટ આપવામાં આવ્યું છે. 24 જૂનના રોજ 6 જિલ્લામાં હળવાથી મધ્યમ વરસાદની સંભાવના હોવાથી યલો એલર્ટ જાહેર કરાયું છે.