દેશના ઇતિહાસમાં પ્રથમવાર, ગુજરાતમાં વ્યાજખોરોની ₹63.46 લાખની મિલકત જપ્ત, ગુજરાતે દાખલો બેસાડ્યો!

ગુજરાતે વ્યાજખોરીના દૂષણને ડામવા માટે ઐતિહાસિક પગલું ભર્યું છે. દેશના ઇતિહાસમાં પ્રથમવાર, ગુજરાત પોલીસે વ્યાજખોરી દ્વારા મેળવેલી મિલકતો જપ્ત કરી છે. કચ્છ પૂર્વ પોલીસે ચાર મકાન, બે પ્લોટ અને એક સ્કોર્પિયો ગાડી સહિત લગભગ ₹63.46 લાખની મિલકત જપ્ત કરી છે. આ કડક કાર્યવાહી બદલ ગૃહ રાજ્ય મંત્રી હર્ષ સંઘવીએ કચ્છ પૂર્વના એસ.પી.  સાગર બાગમાર અને તેમની સમગ્ર ટીમને અભિનંદન પાઠવ્યા છે.

CM અને ગૃહ રાજ્ય મંત્રીના દિશાનિર્દેશથી કાર્યવાહી...

રાજ્યમાં નિર્દોષ નાગરિકોને રંજાડતા વ્યાજખોરો સામે CM  ભૂપેન્દ્ર પટેલના નેતૃત્વમાં અને ગૃહ રાજ્ય મંત્રી  હર્ષ સંઘવીની સૂચનાથી ગુજરાત પોલીસે અત્યંત કડકાઈ સાથે આકરાં પગલાં ભર્યા છે. આ કાર્યવાહીનો મુખ્ય ઉદ્દેશ્ય વ્યાજખોરોને ભવિષ્યમાં આવા ગુના આચરવાનો વિચાર પણ ન આવે તેવો દાખલો બેસાડવાનો છે. આ નોંધપાત્ર કાર્યવાહીએ ગુજરાત પોલીસની કાર્યક્ષમતા અને ગુનાહિત પ્રવૃત્તિઓ સામે ઝીરો ટોલરન્સની નીતિને રેખાંકિત કરી છે.

અંજારમાં ઐતિહાસિક કાર્યવાહી, GCTOC કાયદાનો ઉપયોગ...

ગુજરાતમાં કચ્છ જિલ્લાના અંજાર શહેરમાં વ્યાજખોરીની ગેરકાયદેસર પ્રવૃત્તિઓ પર અંકુશ લાવવા અંજાર પોલીસે આ ઐતિહાસિક કાર્યવાહી હાથ ધરી છે. ગુજરાત પોલીસના ઉચ્ચ અધિકારીઓના માર્ગદર્શન હેઠળ, ગુજરાત કંટ્રોલ ઓફ ટેરરિઝમ એન્ડ ઓર્ગેનાઈઝ્ડ ક્રાઈમ (GCTOC) કાયદા અન્વયે વ્યાજખોરીની ગુનાહિત પ્રવૃત્તિમાં સંડોવાયેલા આરોપીઓ સામે કડક પગલાં લેવામાં આવ્યાં છે.

મંત્રી  હર્ષ સંઘવીના દિશાનિર્દેશથી રાજ્યના પોલીસ વડા  વિકાસ સહાય દ્વારા રાજ્યભરના પોલીસ સ્ટેશનોને વ્યાજખોરો સામે કડક કાર્યવાહી કરવા અને તેમની ગેરકાયદેસર મિલકતો જપ્ત કરવા સૂચના આપવામાં આવી હતી. આ અંતર્ગત, સરહદી રેન્જ ભુજના પોલીસ મહાનિરીક્ષક  ચિરાગ કોરડિયા અને પૂર્વ કચ્છ ગાંધીધામના પોલીસ અધિક્ષક  સાગર બાગમારના માર્ગદર્શન હેઠળ અંજાર પોલીસે સંગઠિત ગુનાહિત ટોળકીઓ સામે કાયદેસરની કાર્યવાહી હાથ ધરી.

જપ્ત કરાયેલી મિલકતો અને આરોપીઓનો ગુનાહિત ઇતિહાસ...

પોલીસ ટીમે વ્યાજખોરીની ગુનાહિત પ્રવૃત્તિમાં સંડોવાયેલા ત્રણ આરોપીઓ – રિયાબેન ઈશ્વરગર ગોસ્વામી, આરતીબેન ઈશ્વરગર ગોસ્વામી અને તેજસ ઈશ્વરગર ગોસ્વામી, રહે. મંકલેશ્વર, અંજાર – સામે કાર્યવાહી કરી. આ આરોપીઓએ "Organized Crime Syndicate" બનાવી, આર્થિક ફાયદા માટે વ્યાજખોરીના ગુનાઓ આચર્યા હતા.

જપ્ત કરાયેલી મિલકતોમાં શામેલ છે...

રિયાબેનના નામે : મેઘપર બોરીચીમાં એક પ્લોટ (₹2.52 લાખ), મહિન્દ્રા સ્કોર્પિયો ગાડી (₹14.79 લાખ), અને અંજારમાં દેવનગરમાં પ્લોટ (₹12.42 લાખ).

આરતીબેનના નામે : અંજારના દેવનગરમાં પ્લોટ (₹6.45 લાખ).

આરોપીઓની માતાના નામે : મેઘપર બોરીચીમાં બે પ્લોટ (₹0.60 લાખ અને ₹12.94 લાખ) અને અંજારમાં ગંગોત્રી-02 માં પ્લોટ (₹13.71 લાખ).

આ કુલ મિલકતોની કિંમત ₹63.46 લાખ છે...

આ કાર્યવાહી દરમિયાન, પોલીસે આરોપીઓનો ગુનાહિત ઇતિહાસ તપાસ્યો, જેમાં અનેક ગંભીર ગુનાઓનો સમાવેશ થાય છે. આરોપીઓ સામે ભારતીય ન્યાય સંહિતા, ગુજરાત નાણાં ધીરધાર અધિનિયમ અને GCTOC કાયદા હેઠળ કેસ નોંધવામાં આવ્યા છે. પોલીસે આ મિલકતોની ઝડતી અને જપ્તીની પ્રક્રિયા પૂર્ણ કરી, જેની દરખાસ્ત ગૃહ વિભાગ, ગાંધીનગરને મોકલવામાં આવી હતી. ગૃહ વિભાગના હુકમ આધારે આ મિલકતોને જપ્ત કરવામાં આવી છે.