ગુજરાતમાં માર્ગ અકસ્માતોની વધુ એક ગંભીર ઘટના આણંદ જિલ્લાના આંકલાવ નજીક આવેલા અંબાવ ટોલ પ્લાઝા પાસે વાસદ-બગોદરા માર્ગ પર સામે આવી છે. મોડી રાત્રે લગભગ 2 વાગ્યાના અરસામાં આ ભયાનક અકસ્માત સર્જાયો હતો, જ્યારે એક ટ્રક અને પિકઅપ વાહન વચ્ચે ધડાકાભેર ટક્કર થઈ હતી. અકસ્માતનું કારણ એવું હતું કે, રસ્તા પર ઊભેલા પિકઅપ વાહનમાં સમારકામ ચાલી રહ્યું હતું, ત્યારે પાછળથી પૂરઝડપે આવતી ટ્રકે તેને જોરદાર ટક્કર મારી હતી. આ ટક્કર એટલી ગંભીર હતી કે, તેના બાદ તરત જ એક ભયાનક આગ ફાટી નીકળી હતી, જેણે જોતજોતામાં વિકરાળ સ્વરૂપ ધારણ કરી લીધું.
મૃતદેહો સંપૂર્ણપણે સળગી ગયા
આ દુર્ઘટનાનું મુખ્ય કારણ એ હતું કે પિકઅપ વાહનમાં કાર્બામાં જ્વલનશીલ પ્રવાહી ભરેલું હતું. ટક્કર વાગતાં જ આ પ્રવાહીના કારણે આગે ભીષણ સ્વરૂપ ધારણ કર્યું અને થોડી જ વારમાં બંને વાહનો સંપૂર્ણપણે બળીને ખાખ થઈ ગયા હતા. આ આગની લપેટમાં પિકઅપમાં સવાર એક મહિલા અને એક પુરુષ પણ આવી ગયા હતા અને તેઓનું જીવતા ભડથું થઈ ગયા. અકસ્માતની ભયાનકતા એટલી હતી કે, મૃતદેહો સંપૂર્ણપણે સળગી ગયા હોવાથી તેમની ઓળખ કરવી પણ મુશ્કેલ બની ગઈ છે.
મૃતકોની ઓળખ માટે સઘન તપાસ શરૂ કરી
દુર્ઘટનાની જાણ થતાં જ આંકલાવ પોલીસ ટીમ અને 108 એમ્બ્યુલન્સની ટીમ તાત્કાલિક ઘટના સ્થળે દોડી આવી હતી. પોલીસે સૌપ્રથમ માર્ગ પરનો અવરોધ દૂર કરીને ટ્રાફિકને નિયંત્રિત કર્યો. ત્યારબાદ બળી ગયેલા મૃતદેહોનો કબજો લઈને તેમને પોસ્ટમોર્ટમ માટે ખસેડવાની કાર્યવાહી હાથ ધરી છે. પોલીસે આગ લાગવાનું ચોક્કસ કારણ અને મૃતકોની ઓળખ માટે સઘન તપાસ શરૂ કરી છે.
ટક્કર બાદ કેવી રીતે અચાનક આગ ભભૂકી ઉઠી
અહીં નોંધનીય છે કે, માત્ર ત્રણેક દિવસ અગાઉ એટલે કે 12 ડિસેમ્બરના રોજ અંકલેશ્વર-વાલિયા રોડ પર આવેલા કોસમડી ગામ નજીક પણ આવી જ એક ઘટના બની હતી, જેમાં રિક્ષા અને બાઈક વચ્ચેની ટક્કર બાદ ભીષણ આગ ફાટી નીકળતાં રિક્ષામાં સવાર એક મહિલાનું જીવતી ભૂંજાઈ જવાથી કમકમાટીભર્યું મૃત્યુ નીપજ્યું હતું. આ ઘટનાના CCTV ફૂટેજ પણ સામે આવ્યા હતા, જેમાં સ્પષ્ટ દેખાય છે કે, ટક્કર બાદ કેવી રીતે અચાનક આગ ભભૂકી ઉઠે છે.

પિકઅપમાં સવાર 2ના મોત

કેમિકલ ભરેલા પિકઅપ વાહનને ટ્રકે ટક્કર મારતાં ભીષણ બ્લાસ્ટ સાથે આગ લાગી

December 15, 2025 | 20:00 IST