અમદાવાદ : તહેવારોમાં મીઠાઈઓ ખરીદવી કે.....

આરોગ્ય વિભાગના ફૂડ ડિપાર્ટમેન્ટ દ્વારા આવનાર તહેવારોની ઉજવણીમાં જે મીઠાઈ અને ફરસાણ લોકો ખરીદશે તેની ગુણવત્તા ચકાસવા હેતુસર શહેરભરમાં જુદા-જુદા ખાદ્યપદાર્થ વેચતા એકમો પર છાપા મારી ખાદ્યપદાર્થોના નમૂના લેવાયા, કેટલાંક એકમો સીલ કર્યા તો ઘણા એકમોને અપાઈ નોટિસ.

 નિરક્ષણ, નોટિસ અને લેવાયેલ નમૂના...... 

ફૂડ ડિપાર્ટમેન્ટ દ્વારા શહેરભરમાંથી 21 થી 30 સપ્ટેમ્બર દરમિયાન કુલ 699 એકમોનું નિરક્ષણ કરવામાં આવ્યું હતું. ખાદ્ય સુરક્ષાના ઉલ્લંઘન કરવા બદલ 244 એકમોને નોટિસ ફટકારવામાં આવી છે. શહેરના વિવિધ એકમોમાંથી દૂધ અને દૂધની બનાવટો, મીઠાઈ, બેકરી આઈટમ, નમકીન, મેંદો, બેસન, ખાદ્ય તેલ અને મસાલાનાં 146 ખાદ્ય પદાર્થોના નમૂના પરીક્ષણ માટે એકત્રિત કરવામાં આવ્યા, જેમાં 18 મીઠાઈઓના નમૂના લેવાયા અને દશેરાના નિમિત્તે ખાસ 6 ફાફડાના અને 11 નમૂના જલેબીના લેવાયા.

 જથ્થાની જપ્તી... 
 
નિરીક્ષણ દરમિયાન કાલુપુરમાં 6 અને વેજલપુના 1 એકમાંથી કુલ 933 કિલો દૂધની બનાવટોનો જથ્થો જપ્ત કરવામાં આવ્યો. કાલપુરના 6 એકમોમાંથી ₹ 1.71 લાખની કિંમતનો 823 કિલો અને વેજલપુરના 1 એકમાંથી ₹ 35 હજારની કિંમતનો 110 કિલો જથ્થો જપ્ત કરવામાં આવ્યો જેમાં એક ડેરીની ડિલિવરીવાનમાંથી ₹ 67 હજારનો 268 કિલો દૂધનો હલવો અને ₹ 50 હજારનો 358 કિલો મીઠાઈનો જથ્થો પણ શામેલ છે.

 સીલ કરેલ એકમો 

નિરીક્ષણ અને નમૂના લીધા બાદ અસ્વચ્છ પરિસ્થિતિમાં કામ કરતા 5 એકમોને સીલ પણ કરવામાં આવ્યા. નિકોલમાં ગાયત્રી ખમણ અને મયૂર ડેરી, ભુંદરપુરામાં એવન ચિકન, નરોડામાં વિજય ભાજીપાવ અને ઇસનપુરમાં ડોમિનોઝ પિઝાને સીલ કરવામાં આવ્યા. જ્યારે નિરક્ષણ કરેલ 5 એકમોના ખાદ્ય પદાર્થોના નમૂના હલકી ગુણવત્તા વાળા હોવાનું પણ જાણવા મળ્યું હતું, જેમાં નોબેલનગરની ડેરીમાંથી લો ફેટ પનીર, શાહીબાગની એક રેસ્ટોરન્ટ માંથી પનીર, બાપુનગરની એક ડેરી અને એક રેસ્ટોરન્ટમાંથી પનીર, અને વસ્ત્રાલની એક રેસ્ટોરન્ટમાંથી સેવ ટમાટરના શાકનો સમાવેશ થાય છે.