GPSCના મૌખિક ઇન્ટરવ્યુમાં ભેદભાવનો ફરી આક્ષેપ

ગુજરાત જાહેર સેવા આયોગ(GPSC)ના મૌખિક ઇન્ટરવ્યુ સામે ફરીથી આક્ષેપો થયા છે. બનાસકાંઠાના રબારી સમાજના અગ્રણી ઠાકરશી રબારીએ GPSCના ચેરમેન હસમુખ પટેલ સામે ઓબીસી ઉમેદવારો સામે ભેદભાવનો ગંભીર આરોપ મૂક્યો છે. માણસાના પૂર્વ ધારાસભ્ય તેમજ અખિલ આંજણા કેળવણી મંડળના પ્રમુખ હરીભાઈ ચૌધરીએ પણ એક વર્ષ પહેલાં GPSCના ઈન્ટરવ્યુમાં ચોક્કસ સમાજના ઉમેદવારોને આયોજનપૂર્વક ઓછા ગુણ આપવામાં આવ્યા હોવાના ચોંકાવનારા આક્ષેપો કર્યા હતા. હરીભાઈ ચૌધરી બાદ ઠાકરશી રબારીએ પણ આક્ષેપો કરતાં GPSCના ચેરમેન હસમુખ પટેલની પારદર્શક ભરતી પ્રક્રિયા સામે સવાલ ઉઠ્યા છે.

ઠાકરશીના દાવા પ્રમાણે, GPSCની ઇન્ટરવ્યુ પ્રક્રિયા પારદર્શક નથી. GPSCની લેખિત પરીક્ષામાં ટોચના ગુણ લાવનાર ઓબીસી ઉમેદવારોને મૌખિક ઈન્ટરવ્યુમાં માત્ર 20 થી 25 ગુણ આપી નાપાસ કરવામાં આવે છે.  જયારે જનરલ કેટેગરીના ઉમેદવારોને લેખિત પરીક્ષામાં ઓછા ગુણ હોવા છતાં વધારે ગુણ આપીને પાસ કરાવવામાં આવી રહ્યા છે.

ઠાકરશી રબારીએ સોશિયલ મીડિયામાં વીડિયો વાયરલ કર્યો છે. આ વીડિયોમાં તેમણે ઉલ્લેખ કર્યો છે કે, રબારી સમાજના નરેશભાઈ આયદાનભાઈ રબારી નામના એક ઉમેદવારે GPSCની લેખિત પરીક્ષામાં ટોચના ગુણ મેળવ્યા હોવા છતાં મૌખિક ઇન્ટરવ્યુમાં ઓછા ગુણ આપીને અન્યાય કરવામાં આવ્યો છે. આ અન્યાય બાબતે ઠાકરશી રબારીએ GPSCના ચેરમેન હસમુખ પટેલ સામે ચોંકાવનારા આક્ષેપ કર્યા છે. રબારી સમાજના ઉમેદવારને અન્યાય બાબતની તપાસ કરીને હસમુખ પટેલને હોદ્દા ઉપરથી હટાવવા વડાપ્રધાન, મુખ્યમંત્રી અને નાયબ મુખ્યમંત્રી સમક્ષ વિનંતી કરી છે.

હરીભાઈ ચૌધરીએ GPSC સામે શું આક્ષેપ કર્યા હતાં?

હરિભાઇ ચૌધરીએ મુખ્યમંત્રી ભૂપેન્દ્ર પટેલને 5 મે 2025ના રોજ પત્ર લખ્યો હતો. જેમાં તેમણે દાવો કર્યો હતો કે, GPSCની ઇન્ટરવ્યુ પ્રક્રિયા પારદર્શક નથી. લેખિત પરીક્ષામાં ટોચના ગુણ લાવનાર ઉમેદવારોને મૌખિક ઈન્ટરવ્યુમાં માત્ર 20 થી 25 ગુણ આપીને નાપાસ કરવામાં આવે છે.  જયારે જનરલ કેટેગરીના ઉમેદવારો લેખિત પરીક્ષામાં ઓછા ગુણ ધરાવતા હોવા છતાં તેવા વધારે ગુણ આપીને પાસ કરાવવામાં આવી રહ્યા છે. તેમણે ઉલ્લેખ કર્યો હતો કે, ચૌધરી સમાજના એક ઉમેદવારે GPSC મુખ્ય પરીક્ષામાં 426 ગુણ મેળવ્યા હતા. તેમ છતાં તેને ઇન્ટરવ્યુમાં માત્ર 26 ગુણ આપીને નાપાસ કરવામાં આવ્યો. ગંભીર બાબત તો એ છે કે, આ ઉમેદવારે UPSC જેવી પ્રતિષ્ઠિત પરીક્ષા પાસ કરી છે.

હસમુખ પટેલના કાર્યકાળ દરમિયાન ચોંકાવનારા આંકડા

હરીભાઈ ચૌધરીએ પત્રમાં આક્ષેપ કર્યો હતો કે, GPSCના પહેલાંના સમયગાળા (હસમુખ પટેલના આગમન પહેલા) દરમિયાન 3400 માંથી માત્ર 11 ઉમેદવારોને મૌખિક ઈન્ટરવ્યુમાં 25થી ઓછા ગુણ મળ્યા હતા. જ્યારે હસમુખ પટેલના કાર્યકાળ દરમિયાન 700 ઉમેદવારોમાંથી 136 ઉમેદવારોને 25 થી ઓછા ગુણ મળ્યા છે. ચોંકાવનારી બાબત તો એ છે કે, EBC અને જનરલ કેટેગરીના ઉમેદવારોના ઓછા લેખિત ગુણ ધરાવનારા ઉમેદવારોને ઇન્ટરવ્યુમાં 70 થી વધુ ગુણ મળ્યા છે.

તેમણે ઉમેર્યુ હતું કે, લેખિત પરીક્ષામાં 400 ઉપર માર્કસ મેળવનાર 10થી વધુ ઉમેદવારોને મૌખિક ઇન્ટરવ્યુમાં 50થી ઓછા માર્કસ આપવામાં આવ્યા. પોલીસ પરીક્ષામાં પણ દોડના 50 માર્ક મળતા હતા તે શૂન્ય કરી દીધા. તેના કારણે અમારા બાળકો દોડમાં સારા માર્કસ લાવતા હતા. તેઓ પાછળ રહી ગયા. બીજી તરફ EBC અને જનર કેટેગરી વર્ગના 400 થી ઓછા માર્કસ લાવનારા અનેક ઉમેદવારોને ઇન્ટરવ્યુમાં 70થી વધારે માર્કસ આપવામાં આવ્યા હતા.

હરીભાઈએ પણ OBC, SC, ST સમાજનો ઉલ્લેખ કર્યો હતો

હરીભાઈ ચૌધરીએ સરકારને લખેલા પત્રમાં જણાવ્યું હતું કે, GPSCમાં મૌખિક ઈન્ટરવ્યુમાં અન્યાયનો મુદ્દો માત્ર એક જ્ઞાતિ પૂરતો નથી. SC, ST, OBC સમાજનો પ્રશ્ન છે. ઉમેદવારો તો એવું કહે છે કે તમે કહો તો અમે પાંચેક હજાર ઉમેદવારો આવી જઇએ. અમે સરકારને ડેમેજ કરવા નથી માંગતા. પરંતુ દરેક યુવાન માટે છે જે GPSC જેવી સંસ્થામાં ન્યાય અને સમાનતા પર વિશ્વાસ રાખે છે. હસમુખ પટેલ કે GPSC સામે આક્ષેપોના નિરાકરણ માટે સરકાર તરફથી ગંભીર પગલાં ભરાય તે જરૂરી છે. હવે આ લોકો ઇન્ટરવ્યુના 100 માંથી 150 માર્ક કરવા જઇ રહ્યા છે. જો આવું થશે તો લેખિતમાં સારા માર્કસ લાવ્યા હશે તો પણ ઇન્ટરવ્યુમાં ઓછા માર્કસ આપશે તો ક્યારેય પાસ નહીં થાય.

વિપુલ ચૌધરીને અન્યાયથી મામલો ગરમાયો હતો

યુનિયન પબ્લિક સર્વિસ કમિશન (UPSC) એ 22 એપ્રિલ 2025ના રોજ સિવિલ સર્વિસીસ પરીક્ષા (CSE) 2024 નું અંતિમ પરિણામ જાહેર કર્યુ હતું. જેમાં પાટણ જિલ્લાના સાંતલપુર તાલુકાના હમીરપુરા ગામના વિપુલ ચૌધરીએ 348મો રેન્ક મેળવ્યો હતો. GPSC દ્વારા લેવાયેલી વર્ગ-1 અને 2ની ભરતી પ્રક્રિયામાં વિપુલ ચૌધરીએ મુખ્ય પરીક્ષામાં 429.25 ગુણ મેળવ્યા હતા. પરંતુ, મૌખિક ઈન્ટરવ્યુમાં માત્ર 20 ગુણ આપી નાપાસ કરવામાં આવ્યો હતો. વિપુલ ચૌધરીએ UPSCની પરીક્ષામાં 348મો ક્રમાંક મેળવતાં GPSC અને તેના ચેરમેન હસમુખ પટેલની કામગીરી સામે જે તે સમયે સવાલ ઉઠ્યા હતા.

કેવી રીતે GPSC શંકાના ઘેરામાં આવી?
જાહેરાત ક્રમાંક 20/ 2024માં લેખિત પરીક્ષા પાસ કર્યા પછી મૌખિક ઇન્ટરવ્યુમાં 82 ગુણના ગેપિંગને લઈને સ્પર્ધાત્મક પરીક્ષાઓની તૈયારીઓ કરનારા ઉમેદવારોએ સવાલ ઉઠાવ્યા હતા. 20/2024ની જાહેરાતમાં અગાઉની એક ભરતીમાં ગેરરીતિ આચરવા બદલ ઉમેદવાર ઉપર પ્રતિબંધ મૂકાયો હતો. તે ઉમેદવારને મૌખિક ઈન્ટરવ્યુમાં 92 ગુણ આપીને સિલેક્ટ કરી દેવાયો હતો. જેના કારણે લેખિત પરીક્ષામાં માત્ર 371 ગુણ ધરાવતા ઉમેદવારો વર્ગ-1, 2 માં સિલેક્ટ થઈ ગયા હતા.

જ્યારે વિપુલ ચૌધરી જેવા ઘણાં ઉમેદવારોનું લેખિત પરીક્ષાનું મેરિટ 427 થી લઈ 429.25 હોવા છતાં મૌખિક ઈન્ટરવ્યુમાં 10-20 સુધી ગુણ આપીને નાપાસ જાહેર કરાયા હતા. ભૂતકાળમાં GPSCની જાહેરાત ક્રમાંક 10/2020, 26/2021, 30/2022 સહિતની અનેક સ્પર્ધાત્મક પરીક્ષાઓમાં મૌખિક ઈન્ટરવ્યુમાં સૌથી વધુ અને ઓછા ગુણની વચ્ચેનો તફાવત 30 થી 40 ગુણ વચ્ચેનો રહ્યો હતો. જ્યારે જાહેરાત ક્રમાંક 20/2024 હેઠળની ભરતીમાં મહત્તમ 92 અને લઘુત્તમ 10 જેટલુ અંતર એટલે કે 82 માર્ક્સનુ ગેપિંગ પહેલી વાર જોવા મળ્યુ હતું. જેના કારણે સ્પર્ધાત્મક પરીક્ષાઓની તૈયારીઓ કરતા ઉમેદવારો સાથે રમત થઈ રહ્યાની લાગણી પ્રસરી હતી.