Ahmedabad Murder Mystery Solved: કહેવાય છે કે 'પાપ ગમે તેટલું જૂનું હોય, એક દિવસ બહાર ચોક્કસ આવે છે.' અમદાવાદ ક્રાઇમ બ્રાન્ચે આ કહેવતને સાચી સાબિત કરી બતાવી છે. શહેરના વટવા વિસ્તારમાં આવેલા કુતુબનગરમાં 34 વર્ષ પહેલાં આચરાયેલા એક જઘન્ય હત્યાકાંડનો ભેદ અત્યાધુનિક વિજ્ઞાન અને સચોટ બાતમીના આધારે ઉકેલાઈ ગયો છે. વર્ષ 1992માં ગુમ થયેલી ફરજાના નામની મહિલાની હત્યા તેના જ પતિ અને સાસરી પક્ષના સભ્યોએ કરી હોવાનું હવે વૈજ્ઞાનિક પુરાવા સાથે સાબિત થયું છે.
20 ફૂટની ઊંડાઈએથી માનવ હાડપિંજરના અવશેષો મળી આવ્યા ઘટનાની વિગત મુજબ, વટવા કુતુબનગરના પ્લોટ નંબર 10માં એક મહિલાની હત્યા કરી તેની લાશ દાટી દેવામાં આવી હોવાની બાતમી ક્રાઇમ બ્રાન્ચના ACP ભરત પટેલ અને PI એ.પી. જેબલિયાને મળી હતી. આ બાતમીના આધારે પોલીસે જે-તે સ્થળે જેસીબીની મદદથી ઊંડું ખોદકામ શરૂ કર્યું હતું. 20 ફૂટની ઊંડાઈએથી પોલીસને માનવ હાડપિંજરના અવશેષો મળી આવ્યા હતા. આ અવશેષો ફરજાનાના હોવાની શંકા સાથે પોલીસે તેના ભાઈના ડીએનએ (DNA) સેમ્પલ મેળવી એફએસએલ (FSL)માં પરીક્ષણ માટે મોકલ્યા હતા. તાજેતરમાં આવેલા ડીએનએ રિપોર્ટમાં હાડપિંજરના સેમ્પલ ફરજાનાના ભાઈ સાથે મેચ થતાં, આ મૃતદેહ ફરજાનાનો જ હોવાનું વૈજ્ઞાનિક રીતે સ્પષ્ટ થયું છે.
મૃતદેહ દાટી પાકું બાંધકામ કર્યું તપાસમાં સામે આવ્યું છે કે, વર્ષ 1992માં કૌટુંબિક ઝઘડા અથવા અન્ય કોઈ અદાવતમાં ફરજાનાના પતિ સમસુદ્દીન, જેઠ ઇકબાલ, મિત્ર અબ્દુલ કરીમ અને સાલીયાબીબીએ મળીને ફરજાનાની નિર્મમ હત્યા કરી હતી. હત્યા કર્યા બાદ ગુનાના પુરાવા મિટાવવા માટે આરોપીઓએ સાલીયાબીબીના ઘરમાં જ 20 ફૂટ ઊંડો ખાડો ખોદ્યો હતો અને તેમાં મૃતદેહને દાટી દઈ ઉપર પાકું બાંધકામ કરી દીધું હતું. દાયકાઓ સુધી આ રહસ્ય ધરબાયેલું રહ્યું હતું, પરંતુ ક્રાઇમ બ્રાન્ચની સતર્કતાએ આ ઠંડા પડી ગયેલા કેસમાં ફરી જીવ ફૂંક્યો હતો.
હત્યારાઓ 34 વર્ષ સુધી સતત ડરમાં જીવતા હતા આ કેસમાં સૌથી ચોંકાવનારો વળાંક ત્યારે આવ્યો જ્યારે પોલીસને જાણવા મળ્યું કે હત્યારાઓ 34 વર્ષ સુધી સતત ડરમાં જીવતા હતા. લાશ દાટી હતી તે મકાન વેચી દીધા પછી પણ આરોપીઓને ફરજાનાનો 'આત્મા' પરેશાન કરતો હોવાનો ભય સતાવતો હતો. આ ડરને કારણે તેઓ વારંવાર તાંત્રિક વિધિઓ કરાવતા હતા. સ્થાનિક ચર્ચા મુજબ, દર શુક્રવારે આ ઘરની બહાર કોઈ અજાણ્યું વ્યક્તિ દીવો કરી જતું હતું. આ વિચિત્ર હિલચાલ અને વહેમે જ પોલીસનું ધ્યાન ખેંચ્યું હતું. વળી, ઘટના સમયે એક નજીકના સ્વજને આખી કરતૂત જોઈ લીધી હતી, પરંતુ હત્યારાઓની જાનથી મારી નાખવાની ધમકીને કારણે તે ત્રણ દાયકા સુધી મૌન રહ્યો હતો.
પોલીસે કરી હત્યારાઓની ધરપકડ ક્રાઇમ બ્રાન્ચે આ મામલે મુખ્ય આરોપી પતિ સમસુદ્દીન અને તેના ભાઈ ઇકબાલની ધરપકડ કરી લીધી છે. અન્ય બે આરોપીઓ, અબ્દુલ કરીમ અને સાલીયાબીબીનું અગાઉ મૃત્યુ થઈ ચૂક્યું હોવાનું તપાસમાં ખુલ્યું છે. 34 વર્ષ બાદ પણ કાયદાના લાંબા હાથ આરોપીઓ સુધી પહોંચી શક્યા છે, જેમાં ડીએનએ ટેકનોલોજી સૌથી મજબૂત કડી સાબિત થઈ છે. આ કેસ સાબિત કરે છે કે ગુનેગાર ગમે તેટલી સાવચેતી રાખે, વિજ્ઞાન અને સત્યના માર્ગે પોલીસ તેને શોધી જ કાઢે છે. વટવાના આ કિસ્સાએ સમગ્ર અમદાવાદમાં ચર્ચા જગાવી છે અને વર્ષોથી ન્યાયની રાહ જોઈ રહેલા પીડિત પરિવારને આખરે સંતોષ મળ્યો છે. હાલમાં પોલીસ પકડાયેલા આરોપીઓની વધુ પૂછપરછ કરી રહી છે જેથી ઘટનાના અન્ય પાસાઓ પણ સ્પષ્ટ થઈ શકે.

અમદાવાદ: 34 વર્ષ જૂના હત્યાકાંડનો ભેદ ઉકેલાયો

20 ફૂટ ઊંડા ખાડામાંથી મળેલા અવશેષો ફરજાનાના નીકળ્યા, હત્યારા પતિ અને તેના ભાઈની ધરપકડ

May 9, 2026 | 11:08 IST