અમદાવાદમાં મિત્રએ મિત્રની જાહેરમાં કરી હત્યા, છરીના ઘા ઝીંકી રવિ ખટિકની કરી હત્યા

અમદાવાદ શહેરના ખોખરા વિસ્તારમાં એક શૈતાની અદાવતના કારણે ભયાનક હત્યાકાંડ બન્યો છે. સંજીવની હોસ્પિટલની બહાર કારમાં બેઠેલા રવિ ખટિક પર તેમના 3 મિત્રો હાર્દિક ઉર્ફે મોદી શુક્લ, નિખિલ બીસ્ટ અને સાગર રાજાવતે છરીથી હુમલો કર્યો હતો. આ હુમલામાં ગંભીર ઈજા થતાં રવિનું ઘટનાસ્થળે જ મોત થયું હતું.

મૃતક રવિ વસ્ત્રાલ ગામનો રહેવાસી હતો અને તેની પત્ની પ્રસૂતિ માટે ખોખરા સ્થિત સંજીવની હોસ્પિટલમાં દાખલ હતી. 1 જુલાઈના રોજ રવિના ઘરમાં દીકરાનો જન્મ થયો હતો અને તે પોતાના બાળકને મળવા હોસ્પિટલ આવ્યો હતો. પરિવારને મળ્યા બાદ જ્યારે તે કારમાં બેઠો અને ઘરે જવા નીકળ્યો, ત્યારે ત્રણેય આરોપીઓએ તેની કાર નજીક આવી છરીના ઘા ઝીંકી દઈ હત્યા કરી નાંખી હતી.

પોલીસ તપાસમાં ખુલ્યું છે કે, રવિ અને આરોપીઓ ગાડીના લેવાયા વેચાયા સાથે જોડાયેલા હતા અને અગાઉ દારૂના ધંધા સાથે સંકળાયેલા હતાં. એક વર્ષ પહેલાં જ્યારે નિખિલના ઘરે દીકરીનો જન્મ થયો ત્યારે રવિએ કટાક્ષ કર્યો હતો કે દીકરી તેની નથી. ત્યારથી શરૂ થયેલી અદાવત હવે હત્યામાં ફેરવાઈ ગઈ.

રવિના ઘરમાં દીકરાનો જન્મ થતા જ નિખિલે ત્રણેય મિત્રોને સાથે લઈને રિવેન્જ મર્ડર કર્યું હતું. હત્યા બાદ આરોપીઓ ઈકોસ્પોર્ટ કારમાં ફરાર થઈ ગયા છે. હાલ પોલીસે સમગ્ર વિસ્તારમાં CCTV ફૂટેજ અને ટેકનિકલ એનાલિસિસના આધારે તપાસ શરૂ કરી છે અને જુદી-જુદી ટીમો બનાવી આરોપીઓની શોધખોળ ચાલી રહી છે.