અમદાવાદ: પોલીસની ‘જનરક્ષક’ ગાડી બની રીલનું સાધન

Ahmedabad News: સામાન્ય રીતે પોલીસની ગાડીઓ નાગરિકોની સુરક્ષા, સલામતી અને રાત્રિ પેટ્રોલિંગ માટે હોય છે, પરંતુ અમદાવાદમાં કાયદો અને વ્યવસ્થાના રક્ષણ માટે ફાળવવામાં આવેલી સરકારી ગાડીનો દુરુપયોગ થયો હોવાની ચોંકાવનારી ઘટના સામે આવી છે. અમદાવાદ પોલીસની '112 જનરક્ષક' ગાડી પર બેસીને રીલ બનાવી હોવાનો વીડિયો સોશિયલ મીડિયામાં વાયરલ થતાં પોલીસ તંત્રની કામગીરી અને શિસ્ત સામે ગંભીર સવાલો ઊભા થયા છે.

'તું ખીચ મેરી ફોટો' ગીત પર રીલ બનાવી
વાયરલ થયેલા વીડિયોમાં જોઈ શકાય છે કે સાબરમતી રિવરફ્રન્ટના લોઅર પ્રોમિનાડ વિસ્તારમાં રાત્રિના સમયે પોલીસની 112 નંબરની જનરક્ષક ગાડી ઊભી છે. આ સરકારી ગાડીના આગળના બોનેટના ભાગે બેસીને ફિલ્મી સ્ટાઈલમાં પોઝ આપી વીડિયો બનાવવામાં આવ્યો છે. આ વીડિયોના બેકગ્રાઉન્ડમાં 'તું ખીચ મેરી ફોટો' ગીત વાગી રહ્યું છે. આ વીડિયો સોશિયલ મીડિયામાં વાયરલ થતા જ લોકોમાં રોષ જોવા મળી રહ્યો છે અને ચર્ચાઈ રહ્યું છે કે શું પોલીસની ગાડીઓ હવે માત્ર સ્ટંટ અને સોશિયલ મીડિયાના રોલા પાડવા માટે જ રહી ગઈ છે?

લોકેશન અને પોલીસ તપાસ
આ વીડિયો સાબરમતી રિવરફ્રન્ટ વિસ્તારનો હોવાનું સ્પષ્ટ જણાય છે. પ્રાથમિક દ્રષ્ટિએ આ વીડિયો રિવરફ્રન્ટ પૂર્વ (ઈસ્ટ) તરફનો હોવાનું માનવામાં આવી રહ્યું છે. ઘટનાની ગંભીરતાને જોતા રિવરફ્રન્ટ પોલીસ હરકતમાં આવી છે. પોલીસે જણાવ્યું હતું કે, "અમે સોશિયલ મીડિયામાં વાયરલ થયેલા વીડિયોની તપાસ કરાવી રહ્યા છીએ. વીડિયોમાં લોકેશન અને ગાડીનો નંબર સ્પષ્ટ દેખાતો નથી, તેથી વ્યક્તિગત રીતે તપાસ ચાલુ છે. આ વીડિયો જૂનો છે કે તાજેતરનો, તેની પણ ખરાઈ કરવામાં આવશે."

પોલીસની કામગીરી સામે સવાલો
જનરક્ષક ગાડીઓ નાગરિકોની મદદ માટે 24 કલાક તૈનાત રહેતી હોય છે. એવામાં રિવરફ્રન્ટ જેવા સંવેદનશીલ વિસ્તારમાં પોલીસ કર્મચારીઓની હાજરીમાં અથવા તેમની મંજૂરી વિના કોઈ ગાડીના બોનેટ પર બેસીને વીડિયો કેવી રીતે બનાવી શકે? રાત્રિના સમયે પેટ્રોલિંગ કરવાને બદલે શું પોલીસ કર્મચારીઓ આવા લોકોને રીલ બનાવવા માટે ગાડી આપે છે? તેવા પ્રશ્નો હાલ ચર્ચાનું કેન્દ્ર બન્યા છે. જો પોલીસ આ મામલે કડક કાર્યવાહી નહીં કરે તો સરકારી મિલકતોનો આ પ્રકારે દુરુપયોગ વધવાની શક્યતા છે.