ગુજરાતમાં કાળઝાળ ગરમીથી આંશિક રાહત

Gujarat Heatwave: લાંબા સમયથી અસહ્ય ગરમીનો સામનો કરી રહેલા ગુજરાતવાસીઓ માટે રાહતના સમાચાર આવ્યા છે. છેલ્લા 24 કલાકમાં રાજ્યના મહત્તમ તાપમાનમાં દોઢથી બે ડિગ્રી સેલ્સિયસનો ઘટાડો નોંધાયો છે. 15 મેના રોજ નોંધાયેલા આંકડા મુજબ, ગરમીનો પારો 44°Cથી ઘટીને 42°Cની અંદર આવી ગયો છે. શુક્રવારે રાજ્યમાં સૌથી વધુ તાપમાન અમદાવાદ અને રાજકોટમાં 41.7°C નોંધાયું હતું, જ્યારે રાજ્યના 6 મુખ્ય શહેરોમાં પારો હજુ પણ 40°Cને પાર રહ્યો છે. હવામાન વિભાગના જણાવ્યા અનુસાર, પવનની દિશા બદલાવાના કારણે ગરમીના પ્રકોપમાંથી સામાન્ય જનતાને આ આંશિક રાહત મળી છે.

હીટવેવની સ્થિતિ અને આગામી 7 દિવસની આગાહી
હવામાન વિભાગના જણાવ્યા અનુસાર, હાલમાં વેસ્ટર્ન ડિસ્ટર્બન્સ સક્રિય થવાને કારણે પશ્ચિમ અને ઉત્તર-પશ્ચિમ દિશાના પવનો ફૂંકાઈ રહ્યા છે. આગામી 2 દિવસમાં તાપમાનમાં હજુ 2થી 3 ડિગ્રીનો ક્રમિક ઘટાડો થઈ શકે છે. જો કે, આગામી 5 દિવસ દરમિયાન કેટલાક વિસ્તારોમાં તાપમાન 40°Cથી વધુ અને વાતાવરણ મુખ્યત્વે સૂકું રહેશે. ચેતવણીની વાત કરીએ તો, 16 મેના રોજ સૌરાષ્ટ્ર-કચ્છના ભાવનગર, દ્વારકા, ગીર સોમનાથ, કચ્છ અને દીવના છૂટાછવાયા વિસ્તારોમાં હીટવેવની સ્થિતિ યથાવત્ રહી શકે છે, પરંતુ 17થી 22 મે દરમિયાન હીટવેવની કોઈ ખાસ ચેતવણી આપવામાં આવી નથી.

અમદાવાદમાં વાતાવરણ ચોખ્ખું રહેશે, ગરમી નિયંત્રણમાં
રાજ્યના પાટનગર સમાન અમદાવાદ શહેરમાં શનિવારે મુખ્યત્વે આકાશ ચોખ્ખું રહેવાની સંભાવના છે અને મહત્તમ તાપમાન 42°Cની આસપાસ રહે અંદાજ છે. ગત 24 કલાકમાં અમદાવાદના તાપમાનમાં બે ડિગ્રીનો ઘટાડો થયો છે. શહેરમાં શુક્રવારે સવારે ભેજનું પ્રમાણ 67% અને સાંજે ઘટીને 20% નોંધાયું હતું. અગાઉના દિવસોમાં ઓરેન્જ અને યેલો એલર્ટના કારણે પ્રચંડ ગરમીનો સામનો કરી રહેલા અમદાવાદીઓને હવે આગામી દિવસોમાં પારો વધુ બે ડિગ્રી ગગડવાના સંકેતોથી મોટી રાહત મળશે.

ચોમાસાના વહેલા આગમનના સંકેત: 26 મેના રોજ કેરળ બેસશે
ઉનાળાની આ ગરમી વચ્ચે ચોમાસાને લઈને ખૂબ જ સારા સમાચાર આવ્યા છે. ભારતીય હવામાન વિભાગ (IMD)ના જણાવ્યા અનુસાર, આ વર્ષે નૈઋત્યનું ચોમાસું તેના નિર્ધારિત સમય (1 જૂન) કરતાં 5 દિવસ વહેલું એટલે કે 26 મે 2026ના રોજ કેરળના દરિયાકિનારે દસ્તક આપી શકે છે. હાલમાં આંદામાન સમુદ્ર અને બંગાળની ખાડીમાં ચોમાસું આગળ વધવા માટે સાનુકૂળ સંજોગો બનેલા છે. ઉલ્લેખનીય છે કે ગત વર્ષે 2025માં પણ ચોમાસું 24 મેના રોજ વહેલું આવી ગયું હતું અને દેશમાં સામાન્ય કરતાં 8% વધુ વરસાદ નોંધાયો હતો, જે કૃષિ અને જળ સંચય માટે અત્યંત ફાયદાકારક સાબિત થયો હતો.