Ahmedabad News: શહેરમાં કાયદો અને વ્યવસ્થાના રક્ષક ગણાતી ખાખી વર્દીને શર્મસાર કરતી એક ગંભીર ઘટના સામે આવી છે. અમદાવાદના નવરંગપુરા વિસ્તારમાં આવેલા પ્રખ્યાત ગુજરાત યુનિવર્સિટી પોલીસ સ્ટેશનની અંદર જ એક દિવ્યાંગ (પ્રજ્ઞાચક્ષુ) આધેડ વેપારીને નિર્દયતાપૂર્વક માર મારવામાં આવ્યો હોવાનો ચોંકાવનારો આક્ષેપ થયો છે. કેબિન ચલાવીને પોતાનું ગુજરાન ચલાવતા પ્રજ્ઞાચક્ષુ આધેડને પોલીસ સ્ટેશન પરિસરની અંદર જ લાફા, લાતો અને દંડા વડે ફટકારવામાં આવ્યા હોવાની વિગતો બહાર આવતા સમગ્ર પોલીસ બેડા સહિત શહેરમાં ચકચાર મચી ગઈ છે. ઈજાગ્રસ્ત દિવ્યાંગ આધેડને હાલ સારવાર અર્થે હોસ્પિટલમાં દાખલ કરવામાં આવ્યા છે. સૌથી વધુ આશ્ચર્યની વાત એ છે કે, જે પોલીસ સ્ટેશનમાં આ આખી ઘટના ઘટી, ત્યાંના ઉચ્ચ અધિકારીઓ શરૂઆતમાં આ મામલે સંપૂર્ણ અજ્ઞાનતા હોવાનો દાવો કરી રહ્યા હતા, પરંતુ બાદમાં મામલો ગરમાતા આંતરિક વિગતો સ્વીકારવાની ફરજ પડી હતી.
કેબિન ચલાવી ગુજરાન ચલાવતા દિવ્યાંગ પર અચાનક આવી આફત મળતી વિગતો અનુસાર, પંચવટી વિસ્તાર નજીક રહેતા અને સરકાર તરફથી ફાળવવામાં આવેલી નાની કેબિનમાં પીસીઓ (PCO) તેમજ ખાણી-પીણીના નાના પેકેટો વેચીને જીવનનિર્વાહ ચલાવતા ગોપાલભાઈ દરજી બંને આંખે જોઈ શકતા નથી. ગોપાલભાઈના જણાવ્યા મુજબ, અગાઉ ગુલબાઈ ટેકરા વિસ્તારના કેટલાક સ્થાનિક છોકરાઓ તેમની કેબિન પર આવીને પેકેટો તોડી નાખતા અથવા ચોરી જતા હતા. સોમવારે બપોરના સમયે તેઓ કેબિન પર હાજર હતા ત્યારે અચાનક પેકેટ તૂટવાનો અવાજ આવ્યો હતો. પોતે પ્રજ્ઞાચક્ષુ હોવાથી અવાજની દિશામાં તેમણે માત્ર શંકાના આધારે હાથ લાંબો કર્યો હતો, જેમાં ત્યાં ઉભેલા એક સગીર વયના બાળકનો હાથ પકડાઈ ગયો હતો. દિવ્યાંગ હોવાના કારણે પકડ મજબૂત થતાં સગીર બાળકને સામાન્ય ઈજા પહોંચી હતી. આ ઘટનાથી ગભરાયેલા સગીરે તાત્કાલિક તેના પિતાને જાણ કરી હતી.
'મેં માફી માંગી છતાં પોલીસ કંટ્રોલ રૂમ બોલાવાયો' બાળકના પિતા તાત્કાલિક કેબિન પર આવી પહોંચ્યા હતા અને ગોપાલભાઈને બેફામ ગાળો આપવાનું શરૂ કર્યું હતું. પીડિત ગોપાલભાઈએ પોતાની અંધત્વની મર્યાદા જણાવીને બાળકના પિતા સામે હાથ જોડીને માફી પણ માંગી હતી અને ભૂલ સ્વીકારી હતી. તેમ છતાં, ઉશ્કેરાયેલા પિતાએ મામલો થાળે પાડવાને બદલે તેમની પત્નીને તેમજ પોલીસ કંટ્રોલ રૂમને (100 નંબર પર) ફોન કરીને વર્ધી આપી દીધી હતી. કંટ્રોલ રૂમનો મેસેજ મળતા જ ગુજરાત યુનિવર્સિટી પોલીસ સ્ટેશનનો કાફલો ઘટનાસ્થળે દોડી આવ્યો હતો અને પ્રજ્ઞાચક્ષુ ગોપાલભાઈને પકડીને પોલીસ સ્ટેશન લઈ ગયો હતો.
'બહારથી આવેલા મહિલા PSIએ કોઈની પણ રોકટોક વગર લાકડીઓ ફટકારી' પોલીસ સ્ટેશનની અંદર બનેલી ઘટના અંગે પીડિત ગોપાલભાઈ દરજીએ અત્યંત ગંભીર અને હૃદયદ્રાવક આપવીતી વર્ણવી છે. તેમણે જણાવ્યું કે, "મને પોલીસ સ્ટેશન લાવીને એક જગ્યાએ બેસાડવામાં આવ્યો હતો. ત્યાં મેં ફરીથી બાળકના પિતા સામે ભૂલ સ્વીકારી માફી માંગી હતી. આ દરમિયાન અમદાવાદ ગ્રામ્ય પોલીસ વિભાગના એક મહિલા PSI ત્યાં બહારથી આવ્યા હતા. તેમને પોલીસ સ્ટેશનના કોઈ સ્ટાફે રોક્યા નહીં. તે સીધા મારી પાસે આવ્યા અને કશું જ પૂછ્યા વિના મારા પર તૂટી પડ્યા હતા." ગોપાલભાઈએ વધુમાં ઉમેર્યું કે, "તેમણે મને મોઢા પર ઉપરાઉપરી લાફા અને લાતો મારી જેના કારણે હું નીચે જમીન પર પડી ગયો હતો. મેં દિવ્યાંગ હોવાની વિનંતી કરી તો પણ તેમણે દંડા (લાકડી) વડે મને નિર્દયતાપૂર્વક ફટકાર્યો હતો. આ અમાનવીય વર્તન બાદ જ્યારે મેં સ્થાનિક પોલીસને મારી ફરિયાદ નોંધવા કહ્યું, ત્યારે તેમણે ગુનો દાખલ કરવાનો પણ સ્પષ્ટ ઈનકાર કરી દીધો હતો. પોલીસના આ આંધળા કાનૂની મારના કારણે અત્યારે મારા બરડા અને થાપાના ભાગે ગંભીર કાળા ડાઘ પડી ગયા છે અને અસહ્ય દુખાવો થાય છે. કાનમાંથી પાણી નીકળે છે અને આંખમાં પણ ભારે ઈજા થઈ છે."
સ્થાનિક PIએ આપી વિચિત્ર સફાઈ: 'માતા તરીકે ગુસ્સામાં ઝાપટ મારી દીધી' આ ચકચારી મામલે જ્યારે ગુજરાત યુનિવર્સિટી પોલીસ સ્ટેશનના પોલીસ ઈન્સ્પેક્ટર (PI) એસ.આર. બાવા સમક્ષ સવાલો ઉઠાવવામાં આવ્યા, ત્યારે શરૂઆતમાં તેમણે ગ્રામ્યના કોઈ મહિલા પીએસઆઈ આવ્યા હોવાની વાત સ્વીકારી પરંતુ માર મારવાની ઘટનાથી અજાણ હોવાનો દાવો કર્યો હતો. જો કે, બાદમાં મીડિયા અને માનવાધિકારના દબાણ વચ્ચે PI એસ.આર. બાવાએ સમગ્ર ઘટના સ્વીકારતા અત્યંત આશ્ચર્યજનક બચાવ કર્યો હતો. PI એસ.આર. બાવાએ સફાઈ આપતા જણાવ્યું કે, "આ ઘટનામાં હકીકત એ છે કે પેલા સૂરદાસ દાદાના ગલ્લે કોઈ પડીકું તોડવા બાબતે વિવાદ થયો હતો. દાદાને આંખે દેખાતું ન હોવાથી તેમણે ભૂલથી અમદાવાદ ગ્રામ્યના મહિલા પીએસઆઈ રાઠોડના નાના દીકરાને કાન પર લાફો મારી દીધો હતો. બાળકના કાનમાં વાગવાથી અને લોહી નીકળવાના કારણે એક માતા તરીકે ઉપરાણું લઈને ગુસ્સામાં આવેલી મહિલા પીએસઆઈએ ત્યાં જઈને દાદાને ઝાપટ મારી દીધી હતી."
'મેડમને ખબર નહોતી કે દાદા પ્રજ્ઞાચક્ષુ છે' તેમણે વધુમાં જણાવ્યું કે, "શરૂઆતમાં તે મેડમને પણ ખબર નહોતી કે આ દાદા પ્રજ્ઞાચક્ષુ (અંધ) છે, પરંતુ જ્યારે અમારા સ્ટાફે તેમને વાસ્તવિકતા જણાવી ત્યારે મામલો શાંત પડ્યો હતો. બંને પક્ષે કોઈ વળતી કાયદેસરની ફરિયાદ નોંધી નહોતી. રાત્રે દાદાએ માત્ર એક સાદી અરજી આપી હતી અને તેઓ ફરિયાદ કરવા માંગતા નહોતા. તેમ છતાં, કાયદાની રૂએ અમે દાદાને ફરીથી પોલીસ સ્ટેશને બોલાવ્યા છે. જો તેઓ ખરેખર કાયદેસરની ફરિયાદ નોંધાવવા માંગતા હશે, તો અમે 100 ટકા ગુનો નોંધીને કડક કાર્યવાહી કરીશું."
કાયદાના રક્ષક જ ભક્ષક બન્યાની ચર્ચાએ પકડ્યું જોર એક તરફ પીડિત પ્રજ્ઞાચક્ષુ આધેડ પોલીસ સ્ટેશનમાં કલાકો સુધી ગોંધી રાખીને થર્ડ ડિગ્રી ટોર્ચર જેવો ઢોર માર મારવામાં આવ્યો હોવાની અને પોલીસે ન્યાય આપવાને બદલે હાંકી કાઢ્યા હોવાની બૂમો પાડી રહ્યા છે. જ્યારે બીજી તરફ, સ્થાનિક પોલીસ તંત્ર પોતાના જ વિભાગના ઉચ્ચ પદ પર બેઠેલા અધિકારીને બચાવવા માટે આ સમગ્ર સંવેદનશીલ મામલાને માત્ર 'માતા તરીકે ગુસ્સામાં મારેલી એક સામાન્ય ઝાપટ' અને 'આંતરિક સમાધાન'નું રૂપ આપીને દબાવવાનો પ્રયાસ કરી રહ્યું હોવાનો ગણગણાટ વ્યાપારી મંડળો અને દિવ્યાંગ સંગઠનોમાં શરૂ થયો છે. ગુજરાત જેવા શાંત અને કાયદાના શાસનવાળા રાજ્યમાં, પોલીસ સ્ટેશનની ચાર દીવાલોની અંદર જ એક અસહાય દિવ્યાંગ નાગરિક સાથે કાયદાના રક્ષકો દ્વારા કરવામાં આવેલું આ પ્રકારનું ક્રૂર અને અમાનવીય વર્તન હવે ઉચ્ચ પોલીસ વડાઓ સુધી પહોંચ્યું છે અને તપાસનો વિષય બન્યું છે.

અમદાવાદમાં ખાખીનું શરમજનક કૃત્ય

યુનિવર્સિટી પોલીસ સ્ટેશનમાં પ્રજ્ઞાચક્ષુને ઢોર માર માર્યાનો આક્ષેપ, મહિલા PSI વિવાદમાં

June 2, 2026 | 11:37 IST