અમદાવાદ વિમાન દુર્ઘટનાઃ સિવિલ હોસ્પિટલમાં પરિવારજનોને મૃતદેહો સોંપવાનું શરૂ

અમદાવાદ વિમાન દુર્ઘટનામાં મરણ પામેલા લોકોના DNA રિપોર્ટ આવવાના શરૂ થતાં સિવિલ હોસ્પિટલ તંત્ર દ્વારા પરિવારજનોને મૃતદેહ સોંપવાના શરૂ કરાયા છે. સિવિલ હોસ્પિટલના સૂત્રોના જણાવ્યા અનુસાર 9 DNA મેચ થયા છે. જે તબક્કાવાર મૃતદેહો પરિજનોને સોંપવામાં આવશે. વિદેશી નાગરિકોના મૃતદેહો મોકલવાનો ખર્ચ સરકાર દ્વારા ઉઠાવવાનો નિર્ણય કરાયો છે. વડોદરાથી એક ટ્રક ભરીને કોફિન લાવવામાં આવ્યા હતા. રાજ્ય સરકારના આરોગ્ય મંત્રી ઋષિકેશ પટેલ અને સહકાર રાજ્ય મંત્રી જગદીશ વિશ્વકર્માની નિગરાની હેઠળ સમગ્ર પ્રક્રિયા પૂર્ણ કરવામાં આવી રહી છે.

અમદાવાદ સિવિલ હોસ્પિટલમાં DNA માટે બ્લડ સેમ્પલ આપવા અને મૃતદેહો સ્વીકારવા આવતાં પરિવારજનો માટે સરકાર દ્વારા વિશેષ સુવિધાઓ કરવામાં આવી છે. ખેડાના પૂર્ણિમાબેન પટેલનું દુર્ઘટનામાં મોત થયું હતું. પૂર્ણિમાબેનનો પાર્થિવદેહ તેમના પરિવારજનોને સોંપવામાં આવ્યો હતો. આ ઉપરાંત અન્ય મૃતદેહો પણ પરિવારજનોને સોંપવામાં આવી રહ્યાં છે. મૃતકોના પરિવારજનોને તકલીફ ન પડે તે માટે રાજ્ય સરકારે પરિવાર દીઠ એક અધિકારી, કર્મચારી તેમજ પોલીસ કર્મચારીને મદદ માટે મૂકવામાં આવ્યા છે. પરિવારજનોને મદદ મળી રહે તે માટે અન્ય સુવિધાઓ પણ કરવામાં આવી છે. બહારથી આવતા મૃતકોના પરિવારજનોના રહેવા-જમવાની વ્યવસ્થા પણ રાજ્ય સરકાર દ્વારા કરવામાં આવી છે.  

વિમાન દુર્ઘટનામાં મરણ પામેલા વિદેશી નાગરિકોના મૃતદેહોને મોકલવા રાજ્ય સરકારે વ્યવસ્થા કરી આપી છે. વિદેશી નાગરિકોના મૃતદેહો મોકલવાનો ખર્ચ રાજ્ય સરકારે ઉઠાવવવાનો નિર્ણય કર્યો છે. જ્યારે સ્થાનિક લોકોના મૃતદેહોને વતન લઈ જવા સરકારે વાહન અને અંતિમ સંસ્કારના સ્થળની વ્યવસ્થા કરી આપી છે. સગા સંબંધીઓને તકલીફ ન પડે તે માટે શબ વાહિની ઉપરાંત પરિવારજનોને કારની સુવિધા આપીને પરિવારની કારને પોલીસ પાઈલોટિંગ પૂરૂ પાડવા સૂચના આપવામાં આવી છે.

દુર્ઘટનામાં મરણ પામનાર લોકોના મૃતદેહોને લઈ જવા વડોદરામાં કોફિન બનાવવામાં આવ્યા છે. એર ઈન્ડિયા કંપનીએ વડોદરાની કોફિન બોક્સ સર્વિસને કામ સોંપ્યું છે. રાજ્ય સરકારે 120 કોફિન બનાવવા ઓર્ડર આપ્યો છે. વડોદરાના ફતેગંજમાં આવેલા મેથોડિસ્ટ બોયઝ હોસ્ટેલમાં કોફિન બનાવવામાં આવી રહ્યાં હોવાનું જાણવા મળ્યું છે. 

મૃતકોના પરિવારજનોના ડીએનએ સેમ્પલિંગ અંગે FSLના ડિરેક્ટર એચ.પી. સંઘવીએ માહિતી આપતા જણાવ્યું કે, પ્લેન ક્રેશ બાદ ભીષણ આગ લાગી હતી. ઊંચા તાપમાનની આગમાં કોઈ વ્યક્તિની ઓળખ કરવી અશક્ય બની જાય છે. તેથી ડીએનએ પરીક્ષણ અનિવાર્ય બને છે. આગની જ્વાળાઓ શરીરમાં રહેલા ડીએનએને પણ અસર કરે છે. પોસ્ટમોર્ટમ દરમિયાન શરીરના ભાગની ઓળખ કરી ડીએનએ માટે નમૂનાઓ લેવાં જરૂરી હોય છે. મૃતકો તથા તેમના પરિવારજનોના તમામ ડીએનએ સેમ્પલ્સ એફએસએલમાં સબમિટ કરવામાં આવ્યા છે. આ જટિલ પ્રક્રિયા છે.

એક ટેસ્ટ પૂરો થવામાં અંદાજે 36 થી 48 કલાક લાગે છે. ટેસ્ટ્સ અલગ અલગ બેચમાં કરવામાં આવી રહ્યાં છે અને ઘણા ટેસ્ટ્સ એક સાથે ચાલી રહ્યા છે. પ્રોફાઇલ મેચિંગ શરૂ થઈ ગયું છે અને પરિણામો મળવા લાગ્યા છે. ડૉક્ટરો અને પોલીસ એજન્સીઓ મૃતદેહોને પરિવારજનોને સોંપવાની પ્રક્રિયામાં છે. આ કામ ટૂંક સમયમાં પૂરું થશે. આ કાર્ય માટે ગુજરાત ફોરેન્સિક લેબોરેટરીની 36 ટીમો તૈનાત કરવામાં આવી છે.

વિમાન દુર્ઘટનામાં 260 થી વધુ લોકોએ પોતાના જીવ ગુમાવ્યા છે. સ્વજનોનું અકાળે અવસાન થતા પરિવારજનો ભારે શોકમગ્ન છે. તેઓ જલ્દીથી સ્વજનોના મૃતદેહો મળે તેવી માંગ કરી રહ્યાં છે. મૃતદેહો નહી મળવાના કારણે એક એક ક્ષણ તેમના કાળજા પર પત્થરના ઘાની જેમ વીતી રહી છે. પ્લેન ક્રેશ દુર્ઘટનામાં સ્વજન ગુમાવનાર પરિવારજનો અમદાવાદ સિવિલ હોસ્પિટલ ખાતે છે. ત્યાં DNA ઓળખ પ્રક્રિયાનું કામ ચાલી રહ્યું છે. પોલીસ આ તમામ પરિવારજનોની ખાસ સંભાળ રાખી તેમની સેવા કરી રહી છે. મુશ્કેલ સમયમાં પરિવારજનો માટે પોલીસ દ્વારા વિવિધ વ્યવસ્થા કરવામાં આવી છે.