Ahmedabad Pakodi Controversy: શહેરમાં સ્ટ્રીટ ફૂડની ગુણવત્તા અને સ્વચ્છતા સામે ફરી એકવાર ગંભીર સવાલો ઉભા થયા છે. અમદાવાદના રાણીપ વિસ્તારમાં આવેલી એક જાણીતી પકોડીની લારી પર નાસ્તો કરવા ગયેલી યુવતીની પકોડીમાંથી હાડકું નીકળ્યું હોવાનો એક ચોંકાવનારો વીડિયો સોશિયલ મીડિયામાં વાયરલ થયો છે. આ ઘટના બાદ સમગ્ર શહેરમાં ચર્ચા જાગી છે અને લોકોમાં રસ્તા પર મળતી ખાણીપીણીની વસ્તુઓ પ્રત્યે ચિંતા અને રોષ જોવા મળી રહ્યો છે. આ મામલો વણસતાં અમદાવાદ મ્યુનિસિપલ કોર્પોરેશન (AMC)નું ફૂડ વિભાગ તાત્કાલિક હરકતમાં આવ્યું છે અને વાયરલ વીડિયોની ખરાઈ સહિત લારી પર તપાસની પ્રક્રિયા હાથ ધરી છે.
પકોડીમાંથી પહેલા વાળ અને પછી હાડકું નીકળ્યું મળતી માહિતી મુજબ, ગત 15 મે, શુક્રવારના રોજ સાંજે આશરે 6:30 વાગ્યે એક યુવતી તેની માતા સાથે રાણીપ વિસ્તારમાં આવેલા ડી-માર્ટ મોલ પાસે ઊભા રહેતા 'ક્રિષ્ના ભેળ પકોડી' સેન્ટર પર નાસ્તો કરવા માટે ગઈ હતી. યુવતીના જણાવ્યા અનુસાર, જ્યારે તેઓ પકોડી ખાઈ રહ્યા હતા ત્યારે શરૂઆતમાં એક પકોડીમાંથી વાળ નીકળ્યો હતો. જોકે, તે સમયે કોઈ મોટો વિવાદ ન થાય તે હેતુથી તેમણે આ બાબતને અવગણી દીધી હતી, જેને યુવતીએ પોતાની મોટી ભૂલ ગણાવી હતી. પરંતુ આઘાતજનક બાબત ત્યારે બની જ્યારે છેલ્લી પકોડી ખાતી વખતે યુવતીના મોંમાં કોઈ અત્યંત કઠણ વસ્તુ આવી હતી. બહાર કાઢીને જોતાં તે પકોડીની અંદરથી હાડકાનો ટુકડો નીકળ્યો હતો, જેને જોઈને માતા-પુત્રી બંને ચોંકી ગયા હતા.
લારીચાલકે બહાના બતાવ્યા બાદ માફી માંગી પકોડીમાંથી હાડકું નીકળતા જ યુવતીએ લારીચાલક સામે કડક વાંધો ઉઠાવ્યો હતો. શરૂઆતમાં પોતાની ભૂલ છુપાવવા માટે લારીચાલકે દાવો કર્યો હતો કે આ હાડકું નથી પરંતુ લાકડાનો ટુકડો છે. જોકે, ત્યાં હાજર અન્ય ચાર ગ્રાહકોને પણ જ્યારે તે વસ્તુ બતાવવામાં આવી, ત્યારે તેમણે પણ તે હાડકું હોવાની જ પુષ્ટિ કરી હતી. ત્યારબાદ, સત્ય સાબિત કરવા માટે લારીચાલકે તે ટુકડાને કાપવાનો પ્રયત્ન કર્યો, પરંતુ તે કઠણ હોવાના લીધે કપાયો નહોતો. આખરે પકડાઈ જતાં લારીચાલકે પોતાની ભૂલ સ્વીકારી લીધી હતી અને ગ્રાહકની માફી માંગતા જણાવ્યું હતું કે, 'ભૂલ થઈ ગઈ છે, આ હાડકું ક્યાંકથી ઉડીને આવી ગયું હશે.' યુવતીએ આ સમગ્ર ઘટનાક્રમનો વીડિયો કેમેરામાં કેદ કરી સોશિયલ મીડિયા પર શેર કરી દીધો હતો.
AMC ફૂડ વિભાગ દ્વારા કડક તપાસના આદેશ આ વિડીયો વાયરલ થતાં જ અમદાવાદ મ્યુનિસિપલ કોર્પોરેશનના ફૂડ વિભાગના અધિકારીઓ દ્વારા ઘટનાસ્થળે તપાસ શરૂ કરવામાં આવી છે. અધિકારીઓના જણાવ્યા અનુસાર, વાયરલ વીડિયોની સત્યતા તપાસવામાં આવી રહી છે અને લારી પર વપરાતા મસાલા, પાણી અને સ્વચ્છતાના ધોરણોની ચકાસણી કરીને કાયદેસરની કડક કાર્યવાહી કરવામાં આવશે. ઉલ્લેખનીય છે કે, થોડા મહિના પહેલાં પણ કોર્પોરેશન દ્વારા શહેરભરમાં પાણીપુરી અને સ્ટ્રીટ ફૂડના વેપારીઓ સામે મોટું ચેકિંગ અભિયાન ચલાવવામાં આવ્યું હતું. તે સમયે લેવાયેલા હજારો સેમ્પલમાંથી અનેક જગ્યાએ પ્રતિબંધિત કૃત્રિમ રંગો અને જોખમી બેક્ટેરિયા મળી આવ્યા હતા, જે જાહેર આરોગ્ય માટે ઘાતક સાબિત થઈ શકે છે.
સ્વાદના શોખીનો માટે લાલબત્તી સમાન કિસ્સો હાલ ઉનાળાની ઋતુ ચાલી રહી છે, જેમાં અસ્વચ્છ ખોરાક અને દૂષિત પાણીના કારણે ટાઈફોઈડ, કમળો અને ઝાડા-ઉલ્ટી જેવા પાણીજન્ય તેમજ ખોરાકજન્ય રોગોચાળો ફેલાવવાનો ભય સૌથી વધુ રહે છે. આવા સમયે રાણીપની આ ઘટનાએ લોકોને વિચારતા કરી દીધા છે કે રસ્તા પર મળતો તેમનો મનપસંદ નાસ્તો કેટલો સુરક્ષિત છે. ફૂડ વિભાગે પણ નાગરિકોને અપીલ કરી છે કે સ્ટ્રીટ ફૂડ ખાતી વખતે આસપાસની સફાઈ અને ગુણવત્તા પ્રત્યે જાગૃત રહેવું અત્યંત જરૂરી છે, કારણ કે સ્વાદ કરતાં આરોગ્ય હંમેશા પ્રથમ હોવું જોઈએ.

ફૂડ વિભાગ એક્શનમાં

May 16, 2026 | 15:47 IST