Ahmedabad : મકરબા બનશે દબાણમુક્ત, AMC ની 'ઝીરો ટોલરન્સ' નીતિ, રસ્તા નિર્માણનો માર્ગ મોકળો!

અમદાવાદ શહેરના મકરબા વિસ્તારમાં અમદાવાદ મ્યુનિસિપલ કોર્પોરેશન (AMC) દ્વારા દબાણ હટાવવાની મેગા ઝુંબેશ હાથ ધરવામાં આવી છે. AMC ની જમીન પર થયેલા 292 ગેરકાયદે મકાનો પર આજે (શુક્રવારે) બુલડોઝર ફેરવી દેવામાં આવ્યું છે, અને આ મકાનો તોડી પાડવાની કામગીરી પૂરજોશમાં શરૂ કરી દેવાઈ છે. આ દબાણો દૂર કરીને અહીં નવો રસ્તો બનાવવામાં આવશે.

AMCની જમીન પર વર્ષો જૂના દબાણો...

મકરબામાં AMC ની માલિકીની જમીન પર વર્ષોથી આ ગેરકાયદે બાંધકામો ઊભા હતા. આ દબાણોના કારણે ટ્રાફિક અને અન્ય સાર્વજનિક સુવિધાઓમાં અવરોધ ઊભો થતો હતો. AMC દ્વારા દબાણકારોને અગાઉ નોટિસ આપવામાં આવી હોવા છતાં, દબાણો દૂર ન થતાં આખરે કડક કાર્યવાહી કરવાનો નિર્ણય લેવાયો હતો.

રસ્તા નિર્માણ માટે દબાણમુક્તિ અનિવાર્ય...

આ દબાણમુક્તિ અભિયાનનો મુખ્ય ઉદ્દેશ્ય મકરબા વિસ્તારમાં વિકાસ કાર્યોને વેગ આપવાનો અને નવા રસ્તાનું નિર્માણ કરવાનો છે. આ રસ્તો બનવાથી સ્થાનિકોને ટ્રાફિકની સમસ્યામાંથી મુક્તિ મળશે અને અવરજવર વધુ સરળ બનશે. AMC દ્વારા શહેરના અન્ય વિસ્તારોમાં પણ આવા ગેરકાયદે દબાણો સામે કાર્યવાહી ચાલુ રાખવામાં આવશે તેમ જાણવા મળ્યું છે. આ કાર્યવાહી દર્શાવે છે કે AMC શહેરમાં ગેરકાયદેસર દબાણો સામે ઝીરો ટોલરન્સની નીતિ અપનાવી રહી છે.