ગુજરાત રાજ્યના અમદાવાદ શહેરના ઘાટલોડિયા વિસ્તારમાં આવેલી સ્નેહાંજલિ કો-ઓપરેટિવ સોસાયટીના રહીશો હાલમાં મોટા સંકટનો સામનો કરી રહ્યા છે. આ સોસાયટીના 25 પરિવારો છેલ્લા 35 વર્ષથી શાંતિપૂર્વક અહીં વસવાટ કરે છે, પરંતુ આજે તેમને ઘર ગુમાવવાની ભીતિ સતાવી રહી છે. આ રહીશો પાસે વર્ષો જૂના તમામ રજિસ્ટર્ડ દસ્તાવેજો અને બેંક લોનના કાગળો હોવા છતાં, અમદાવાદ મ્યુનિસિપલ કોર્પોરેશન દ્વારા આ સોસાયટીને ગેરકાયદેસર જાહેર કરવામાં આવી છે અને ડિમોલિશનની તલવાર લટકી રહી છે.
ONGCના કર્મચારીઓને મકાનો વેચ્યા
આ સમગ્ર વિવાદનું મૂળ વર્ષ 1986માં છે, જ્યારે અંજના બિલ્ડર દ્વારા ONGCના કર્મચારીઓને આ મકાનો વેચવામાં આવ્યા હતા. જોકે, મૂળ બિલ્ડર કાંતિભાઈએ જે પ્લોટ ફાળવ્યો હતો, તેના બદલે અન્ય બિલ્ડરના પ્લોટ પર સોસાયટીનું બાંધકામ કરી દીધું હતું. આ ગેરકાયદેસર બાંધકામની જાણ રહીશોને વર્ષ 2006માં એક સમાચારપત્ર મારફતે થઈ હતી. મૂળ પ્લોટ માલિકે પોતાનો પ્લોટ પાછો માંગતા આ મામલો કોર્ટ સુધી પહોંચ્યો, અને ત્યાંથી વિવાદનો પાયો નખાયો.
AMCને 3.71 કરોડ ભરવાનો આદેશ 
આ કાયદાકીય લડાઈમાં નીચલી કોર્ટે AMCને 3.71 કરોડ ભરવાનો આદેશ આપ્યો હતો, જે રકમ બિલ્ડરે ભરી પણ હતી. પરંતુ મૂળ પ્લોટ માલિકને વૈકલ્પિક પ્લોટ ન મળતાં વિવાદ યથાવત રહ્યો. હવે આ ગંભીર મામલો સુપ્રીમ કોર્ટ સુધી પહોંચ્યો છે, જ્યાં રહીશોના જણાવ્યા મુજબ, AMCને 41 કરોડ ચૂકવવાનો નિર્દેશ મળ્યો છે. કાયદાકીય જંગની વચ્ચે AMC દ્વારા રહીશોને સતત ડિમોલિશનની નોટિસો મોકલાઈ રહી છે. તાજેતરમાં પણ AMCની ટીમ ડિમોલિશન માટે પહોંચી હતી, પરંતુ રહીશોના ઉગ્ર વિરોધ બાદ કાર્યવાહી અટકાવવામાં આવી હતી. જોકે, તંત્ર દ્વારા આ રહીશોને 16 ડિસેમ્બરની છેલ્લી તારીખ આપવામાં આવી છે અને ત્યારબાદ પાણી તથા વીજળી કાપી નાખવાની નોટિસ પણ આપવામાં આવી છે, જે વૃદ્ધો માટે ચિંતાનો વિષય છે.
બિલ્ડરની ભૂલની સજા સામાન્ય નાગરિકોને મળી
આ સોસાયટીમાં વસતા 25 પરિવારોમાંથી 23 સભ્યો વૃદ્ધો છે. જીવનના આ પડાવે ઘર ગુમાવવાનો ડર અને કોર્ટ-કચેરીના ચક્કરોએ તેમને માનસિક રીતે તોડી નાખ્યા છે. રહીશોએ મુખ્યમંત્રી સુધી રજૂઆત કરી હતી, જ્યાં તેમને એકતા ફ્લેટમાં 3BHK આપવાનું આશ્વાસન મળ્યું હતું, પરંતુ હજી સુધી કોઈ સત્તાવાર ફાળવણી થઈ નથી. સ્નેહાંજલિ સોસાયટીના રહીશોની એક જ વાત છે: "અમારી કોઈ ભૂલ નથી. બિલ્ડરે ગેરમાર્ગે દોરીને પ્લોટ બદલ્યો. તમામ જવાબદારી બિલ્ડરની છે, છતાં સજા અમને મળી રહી છે." આ સમગ્ર મામલો બિલ્ડરની ભૂલની સજા સામાન્ય અને નિર્દોષ નાગરિકોને મળી રહી હોવાની ગંભીરતા દર્શાવે છે.

35 વર્ષ જૂની સોસાયટી પર ડિમોલિશનની તલવાર ચાલી

અમદાવાદના ઘાટલોડિયા વિસ્તારની સ્નેહાંજલિ કો-ઓપરેટિવ સોસાયટીને AMC દ્વારા ગેરકાયદેસર જાહેર

December 15, 2025 | 22:45 IST