CMO, AMC અને RSS કાર્યાલયને બોમ્બની ધમકી

Gujarat Bomb Threat: ગુજરાતના વહીવટી અને રાજકીય કેન્દ્રો પર બોમ્બ બ્લાસ્ટ કરવાની ગંભીર ધમકી મળતાં જ સમગ્ર રાજ્યના સુરક્ષા તંત્રમાં ભારે ચકચાર મચી ગઈ છે. બુધવારે 10 જૂનના રોજ મુખ્યમંત્રી કાર્યાલય (CMO), અમદાવાદ મ્યુનિસિપલ કોર્પોરેશન (AMC)ની દાણાપીઠ સ્થિત મુખ્ય કચેરી અને રાષ્ટ્રીય સ્વયંસેવક સંઘ (RSS)ના કાર્યાલયને બોમ્બથી ઉડાવી દેવાના ધમકીભર્યા ઈ-મેઇલ મળ્યા હતા. આ ઘટનાની ગંભીરતાને ધ્યાનમાં લઈને રાજ્ય પોલીસ, બોમ્બ ડિટેક્શન એન્ડ ડિસ્પોઝલ સ્ક્વોડ (BDDS), ફાયર બ્રિગેડ અને સાયબર ક્રાઈમની ટીમો તાત્કાલિક એક્શનમાં આવી ગઈ હતી અને સંવેદનશીલ સ્થળો પર ચુસ્ત બંદોબસ્ત ગોઠવી દેવામાં આવ્યો હતો.

10 જૂનથી 30 સપ્ટેમ્બર સુધી એલર્ટ
મળતી માહિતી મુજબ, સુરક્ષા એજન્સીઓને જુદા-જુદા ઈ-મેઇલ આઈડી પરથી આ ધમકીભર્યા સંદેશાઓ મળ્યા છે. આ ઈ-મેઇલમાં ચોંકાવનારો દાવો કરવામાં આવ્યો છે કે 10 જૂનથી લઈને 30 સપ્ટેમ્બર દરમિયાન અમદાવાદ અને ગાંધીનગરના અલગ-અલગ મહત્વના સ્થળોએ બોમ્બ બ્લાસ્ટ કરવામાં આવશે. આ ઈ-મેઇલમાં ચોક્કસ સમયનો ઉલ્લેખ કરીને સુરક્ષા તંત્રને ખુલ્લો પડકાર ફેંકવામાં આવ્યો હતો. જેમાં મુખ્યમંત્રી કાર્યાલય (CMO) ને બપોરે 1:11 વાગ્યે, AMC ઓફિસને બપોરે 3:11 વાગ્યે અને RSS કાર્યાલયને સાંજે 5:11 વાગ્યે બોમ્બથી ઉડાવી દેવાની ધમકી આપવામાં આવી હતી.

AMC મુખ્ય કચેરી ખાલી કરાવાઈ
ધમકીભર્યો ઈ-મેઇલ મળ્યાની પુષ્ટિ થતાં જ અમદાવાદના દાણાપીઠ વિસ્તારમાં આવેલી અમદાવાદ મ્યુનિસિપલ કોર્પોરેશન (AMC)ની મુખ્ય ઓફિસમાં ભારે દોડધામ મચી ગઈ હતી. સુરક્ષાના પગલારૂપે તાત્કાલિક ધોરણે આખી બિલ્ડિંગને ખાલી કરાવવાનો આદેશ આપવામાં આવ્યો હતો. ખાનગી સિક્યુરિટી અને પોલીસ સ્ટાફે સંયુક્ત રીતે ઓપરેશન હાથ ધરીને બિલ્ડિંગ પરિસરમાંથી તમામ લોકોને બહાર કાઢ્યા હતા. આ સમયે ઓફિસમાં હાજર મેયર, ડેપ્યુટી મેયર, સ્ટેન્ડિંગ કમિટીના ચેરમેન, શાસક પક્ષના નેતા અને દંડક સહિતના તમામ ઉચ્ચ હોદ્દેદારો તેમજ સેંકડો કર્મચારીઓ તાત્કાલિક બિલ્ડિંગની બહાર આવી ગયા હતા.

 

          View this post on Instagram                      

A post shared by Benefit News (@benefitnews)

 

B અને C બ્લોક સહિત કોર્ટ પરિસરમાં સઘન ચેકિંગ
દાણાપીઠ સ્થિત આ મુખ્ય કચેરીમાં 3 મોટા બ્લોક આવેલા છે. જેમાંથી B અને C બ્લોકમાં કોર્પોરેશનના અલગ-અલગ વહીવટી વિભાગોની ઓફિસો આવેલી છે, જેને સંપૂર્ણપણે ખાલી કરાવવામાં આવી હતી. આ ઉપરાંત, આ જ પરિસરમાં આવેલી ફૂડ વિભાગની ઓફિસ અને જન્મ-મરણની કોર્ટને પણ ખાલી કરાવીને લોકોને સુરક્ષિત સ્થળે ખસેડાયા હતા. ઘટનાની જાણ થતાં જ પોલીસ અને ફાયર બ્રિગેડની ગાડીઓ કાફલા સાથે ઘટનાસ્થળે પહોંચી ગઈ હતી. BDDS (બોમ્બ સ્ક્વોડ) ની ટીમે સ્નિફર ડોગ્સ અને આધુનિક ડિટેક્ટરની મદદથી C બ્લોકના સરદાર પટેલ ભવન સહિત સમગ્ર પરિસરમાં ખૂણે-ખૂણે સઘન સર્ચ ઓપરેશન શરૂ કર્યું હતું.

મુખ્યમંત્રી દિલ્હી પ્રવાસે, CMO બહાર ચુસ્ત બંદોબસ્ત
આ ગંભીર ધમકી મળી તે સમયે રાજ્યના મુખ્યમંત્રી ભૂપેન્દ્ર પટેલ વડાપ્રધાન નરેન્દ્ર મોદી સાથેની એક મહત્વની બેઠકમાં ભાગ લેવા માટે નવી દિલ્હીના પ્રવાસે હતા. મુખ્યમંત્રીની ગેરહાજરી વચ્ચે ગાંધીનગરમાં આવેલા મુખ્યમંત્રી કાર્યાલય (CMO) ખાતે સુરક્ષા વ્યવસ્થા અભેદ્ય કરી દેવામાં આવી છે. સચિવાલય અને CMO બહાર વધારાની પોલીસ ફોર્સ તૈનાત કરીને દરેક આવતા-જતા વાહનો અને શંકાસ્પદ વ્યક્તિઓનું સઘન ચેકિંગ કરવામાં આવી રહ્યું છે.

સાયબર ક્રાઈમ દ્વારા ઈ-મેઇલના સોર્સની ટેક્નિકલ તપાસ
ગુજરાતના અતિસંવેદનશીલ સરકારી અને સામાજિક કાર્યાલયોને નિશાન બનાવતા આ ઈ-મેઇલ પાછળ કોનો હાથ છે તેની તપાસ સાયબર ક્રાઈમ વિભાગને સોંપવામાં આવી છે. સાયબર એક્સપર્ટ્સની ટીમ દ્વારા આ જુદા-જુદા ઈ-મેઇલ આઈડીના IP એડ્રેસ અને લોકેશન ટ્રેસ કરવા માટે વૈજ્ઞાનિક તપાસ શરૂ કરવામાં આવી છે. પોલીસ અધિકારીઓના જણાવ્યા મુજબ, આ કોઈ આતંકી સંગઠનનું કૃત્ય છે કે કોઈ અસામાજિક તત્વોએ અફવા ફેલાવવા માટે આ ઈ-મેઇલ કર્યા છે, તે તપાસ બાદ જ સ્પષ્ટ થશે. હાલમાં બંને શહેરોના તમામ જાહેર સ્થળો, બસ સ્ટેન્ડ અને રેલવે સ્ટેશનો પર હાઈ-એલર્ટ જાહેર કરીને પેટ્રોલિંગ વધારી દેવામાં આવ્યું છે.