Ahmedabad: શાંતિગ્રામમાં સાતમામેળે આગની ઘટના: બે લોકોનું રેસ્ક્યૂ

અમદાવાદના પોશ વિસ્તાર અદાણી શાંતિગ્રામમાં આવેલી એક હાઈરાઈઝ બિલ્ડિંગમાં ગઈકાલે મોડી રાત્રે આગ લાગવાની ગંભીર ઘટના બની હતી. આ ઘટના બિલ્ડિંગના સાતમા માળે આવેલા એક ફ્લેટમાં બની, જેમાં આગ એટલી ઝડપથી ફેલાઈ કે ફ્લેટમાં રહેલી તમામ વસ્તુઓ અને સામગ્રી બળીને ખાખ થઈ ગઈ. જોકે, સમયસર ફાયર વિભાગની ઝડપી કાર્યવાહીને કારણે બે લોકોને સુરક્ષિત રીતે રેસ્ક્યૂ કરીને સલામત સ્થળે ખસેડવામાં આવ્યા હતા, અને સદનસીબે આ ઘટનામાં કોઈ જાનહાની થઈ નથી.   આગની જાણ થતાં જ આસપાસના રહેવાસીઓ તાત્કાલિક બિલ્ડિંગની નીચે ઉતરી ગયા હતા, જેના કારણે મોટી દુર્ઘટના ટળી. ફાયર વિભાગની ટીમે ઘટનાસ્થળે પહોંચીને આગ પર કાબૂ મેળવ્યો અને હાલમાં કૂલિંગની કામગીરી ચાલી રહી છે. પ્રાથમિક તપાસમાં ફાયર વિભાગનું માનવું છે કે આગનું કારણ શોર્ટ સર્કિટ હોઈ શકે છે, જોકે આગ લાગવાનું ચોક્કસ કારણ હજુ અકબંધ છે.   આ પણ વાંચો : Surat ડ્રગ કેસમાં ચોંકાવનારો ખુલાસો: વેપારીના ભાગીદારે રચ્યું હતું ષડયંત્ર   પોલીસે પણ ઘટનાસ્થળે પહોંચીને તપાસ શરૂ કરી છે અને ફ્લેટના માલિકનું નિવેદન નોંધ્યું છે. આ ઘટનાએ અદાણી શાંતિગ્રામ જેવા પોશ વિસ્તારમાં રહેતા લોકોમાં ચિંતા ફેલાવી છે, પરંતુ ફાયર વિભાગ અને પોલીસની સમયસર કાર્યવાહીથી રહેવાસીઓએ રાહતનો શ્વાસ લીધો છે.   અદાણી શાંતિગ્રામની આ હાઈરાઈઝ બિલ્ડિંગ આધુનિક સુવિધાઓથી સજ્જ છે, અને આવી ઘટનાઓ રહેવાસીઓ માટે ચેતવણીરૂપ છે. ફાયર વિભાગે લોકોને ઇલેક્ટ્રિકલ ઉપકરણોનો ઉપયોગ કાળજીપૂર્વક કરવા અને નિયમિત સુરક્ષા તપાસ કરાવવાની સલાહ આપી છે. આ ઘટના બાદ પોલીસ અને ફાયર વિભાગ દ્વારા વધુ તપાસ ચાલુ છે, જેથી આગનું ચોક્કસ કારણ જાણી શકાય અને ભવિષ્યમાં આવી ઘટનાઓને અટકાવી શકાય.