ફિલ્મી સેટ પર એક્ટિંગ કરતો રિયલ લાઇફનો ખૂની

Ahmedabad Crime Branch Arrests Actor: રૂપેરી પડદા પર નાના-મોટા રોલ ભજવતો, જાણીતા નાટકોમાં અભિનય કરતો અને બોલિવૂડના દિગ્ગજો સાથે કામ કરીને પોતાની ઓળખ ઊભી કરનાર એક કલાકાર હકીકતમાં કાયદાની નજરમાંથી ભાગતો ફરેલો એક ખૂની નીકળ્યો છે. છેલ્લા એક દાયકા કરતાં વધુ સમયથી મુંબઈની ચમકદમક ભરેલી ગ્લેમર દુનિયામાં સક્રિય હોવા છતાં કોઈને તેની અસલી ઓળખનો અંદાજ પણ આવ્યો નહોતો. જોકે, અમદાવાદ ક્રાઇમ બ્રાન્ચને મળેલી એક સચોટ અને ગુપ્ત બાતમીના આધારે ફિલ્મી ચહેરા પાછળ છુપાયેલા આ રીઢા ગુનેગારની વર્ષો જૂની પોલ આખરે ખુલી ગઈ છે.

ઘી કાંટા મેટ્રો સ્ટેશન પાસેથી થઈ ધરપકડ
અમદાવાદ ક્રાઇમ બ્રાન્ચની ટીમે ટેક્નિકલ સર્વેલન્સ અને બાતમીદારોના નેટવર્કનો ઉપયોગ કરીને ઘી કાંટા મેટ્રો સ્ટેશન પાસે વોચ ગોઠવી હતી. જ્યાંથી હત્યાના ગુનામાં વર્ષોથી ફરાર આજીવન કેદની સજા ભોગવી રહેલા આરોપી હેમંત નગીનદાસ મોદીની ધરપકડ કરવામાં આવી છે. ધરપકડના પ્રારંભિક તબક્કે આરોપીએ પોલીસને ગેરમાર્ગે દોરવા અને પોતાની અસલી ઓળખ છુપાવવા માટે ભારે ધમપછાડા કર્યા હતા. પરંતુ ક્રાઇમ બ્રાન્ચની આગવી શૈલીમાં થયેલી કડક પૂછપરછ સામે તે વધુ સમય ટકી શક્યો નહીં અને આખરે તેણે પોતાનો ગુનો અને અસલી ઓળખ કબૂલી લીધી હતી.

વર્ષ 2005નો હત્યાનો ગુનો અને પેરોલ જમ્પ
આ ચોંકાવનારી ઘટનાની વિગત એવી છે કે હેમંત મોદીએ વર્ષ 2005માં અમદાવાદના નરોડા વિસ્તારમાં એક ઘાતકી હત્યાનો ગુનો આચર્યો હતો. કોર્ટમાં કેસ ચાલ્યા બાદ તમામ પુરાવાઓને આધારે અદાલતે તેને કસૂરવાર ઠેરવી આજીવન કેદની સખત સજા ફટકારી હતી. ત્યારબાદ તેને મહેસાણા જેલમાં મોકલી આપવામાં આવ્યો હતો. જેલવાસ દરમિયાન માનસિક રીતે તૂટી ગયેલા હેમંતે પોતાની પત્નીને કહી દીધું હતું કે હવે તેનું આખું જીવન જેલના સળિયા પાછળ જ વિતશે અને આ જ કારણે તેણે પત્નીને છૂટાછેડા પણ આપી દીધા હતા. જોકે, વર્ષ ૨૦૧૪માં જ્યારે તે નિયમ મુજબ પેરોલ પર જેલની બહાર આવ્યો, ત્યારે જેલમાં પરત જવાને બદલે તેણે કાયદાની આંખમાં ધૂળ નાખી પેરોલ જમ્પ કર્યો અને ત્યાંથી સીધો ફરાર થઈ ગયો.

બોલિવૂડ અને ગુજરાતી ફિલ્મોમાં સફર
જેલમાંથી ભાગ્યા બાદ હેમંત મોદી સીધો માયાનગરી મુંબઈ પહોંચી ગયો હતો. ત્યાં તેણે પોતાનું અતીત અને અસલી નામ છુપાવીને ફિલ્મ અને નાટ્ય જગતમાં એક સંઘર્ષ કરનાર (સ્ટ્રગલિંગ) કલાકાર તરીકે કામ મેળવવાનું શરૂ કર્યું. ધીમે-ધીમે તેની એક્ટિંગ કુશળતાના કારણે તેને મોટી ફિલ્મોમાં કામ મળવા લાગ્યું. તેણે અમિતાભ બચ્ચન અને આમિર ખાન સ્ટારર ‘ઠગ્સ ઓફ હિન્દુસ્તાન’ તેમજ રણવીરસિંહ સ્ટારર ‘જયેશભાઈ જોરદાર’ જેવી બિગ બેનર ફિલ્મોમાં નાના-મોટા રોલ ભજવ્યા હતા. આ ઉપરાંત, તેણે સની દેઓલ, હિતુ કનોડિયા અને હિતેન કુમાર જેવા દિગ્ગજ કલાકારો સાથે પણ સ્ક્રીન શેર કરી હતી. તે દિવસ દરમિયાન ફિલ્મી સેટ પર કેમેરા સામે કેરેક્ટર રોલ ભજવતો હતો અને રાત્રે પોલીસ રેકોર્ડનો એક મોટો વોન્ટેડ ગુનેગાર બનીને ફરતો હતો.

કલાકારની ‘ફિલ્મ’ આખરે પુરી થઈ
છેલ્લા 12 વર્ષથી પોલીસને થાપ આપીને ફરતા આ એક્ટરની ફિલ્મી પ્રોફાઈલ જોઈને ક્રાઇમ બ્રાન્ચના ઉચ્ચ અધિકારીઓ પણ સ્તબ્ધ થઈ ગયા છે. કોઈ ગુનેગાર આટલી હદે પોતાની ઓળખ બદલીને સિનેમાના પડદા સુધી પહોંચી જાય તે કદાચ કોઈ ફિલ્મી સ્ક્રિપ્ટ જેવું જ ભાસે છે. ગુનો ગમે તેટલો સાતિર કેમ ન હોય, કાયદાના હાથ લાંબા હોય છે તે વાત આ કિસ્સામાં ફરી સાબિત થઈ છે. વર્ષો સુધી કાયદાથી ભાગતો અને અલગ-અલગ પાત્રો પાછળ પોતાનો અસલી ચહેરો છુપાવતો આ કલાકાર આખરે કાયદાના સકંજામાં આવી ગયો છે અને ક્રાઇમ બ્રાન્ચે તેને ફરી એકવાર જેલના સળિયા પાછળ ધકેલી દેવાની કાયદેસરની પ્રક્રિયા હાથ ધરી છે.