અમદાવાદના રોડ-ગટર પ્રશ્ને કોંગ્રેસનો હલ્લાબોલ, પાટા-પિંડી બાંધી અનોખો વિરોધ

અમદાવાદ શહેરમાં સતત વરસતા વરસાદ બાદ શહેરના અનેક વિસ્તારમાં ખાડા, ઉખડેલા રસ્તા અને ઉભરાતી ગટરના પ્રશ્નો ગંભીર બની ગયા છે. રસ્તાની બિસમાર હાલતને કારણે લોકો રોજ વાહન અકસ્માતનો ભોગ બની રહ્યા છે. આ સમસ્યાને લઈને અમદાવાદ શહેર કોંગ્રેસ દ્વારા પીપળજ રોડ ટોરેન્ટ પાવર પાસે અનોખો હલ્લાબોલ વિરોધ નોંધવામાં આવ્યો હતો. વિરોધ દરમિયાન કોંગ્રેસ કાર્યકર્તાઓએ પાટા-પિંડી બાંધીને રસ્તાની હાલત દર્શાવી હતી અને તેમને પ્રતિકાત્મક રૂપે 'ડૉક્ટર દ્વારા સારવાર' પણ આપવામાં આવી હતી.

આ વિરોધ કાર્યક્રમમાં અમદાવાદ શહેર કોંગ્રેસ પ્રમુખ સોનલબેન પટેલ, રાજેશ સોની, ઘનશ્યામસિંહ પરમાર અને લાંભાના સ્થાનિક લોકો મોટી સંખ્યામાં હાજર રહ્યા હતા. શહેરની પ્રિ-મોન્સૂન કામગીરી પૂર્ણ રીતે નિષ્ફળ ગઈ હોવાના કારણે આજે કોંગ્રેસ દ્વારા શહેરના વિવિધ વિસ્તારોમાં વિરોધ કાર્યક્રમ યોજવાનો આરંભ થયો છે.

વિશેષમાં તેવું જણાવાય છે કે, આ પ્રકારના વિરોધ કાર્યક્રમો દ્વારા કોંગ્રેસ શહેરમાં રોડ, પાણી અને ગટરના મુદ્દે લોકોને જગાડવા અને તંત્રના અવ્યવસ્થિત કાર્ય પ્રત્યે જવાબદારી નક્કી કરવા માંગે છે. પાટા પિંડીને કારણે શહેરવાસીઓની અસહાયતા વ્યક્ત કરી એ તંત્રને કડક સંદેશ આપવાનો પ્રયાસ હતો.

વિરોધ બાદ, સ્થાનિક પોલીસે કોંગ્રેસના કેટલાક કાર્યકર્તાઓને ડિટેઈન પણ કર્યા હતા. તેમ છતાં કાર્યકર્તાઓએ કહ્યું કે, તેઓ લોકોના પ્રશ્નો ઉકેલાય ત્યાં સુધી આવાં શાંતિપૂર્ણ વિરોધ કાર્યક્રમો ચાલુ રાખશે.