કુબેરનગરમાં AMCની મોટી કાર્યવાહી અમદાવાદ મહાનગરપાલિકાએ શહેરમાં ગેરકાયદેસર બાંધકામો વિરુદ્ધ પોતાની ઝુંબેશ તેજ કરી છે. આજે વહેલી સવારથી ઉત્તર ઝોનના એસ્ટેટ વિભાગની ટીમે કુબેરનગર ITI રોડ પર આવેલા કમલ (ઉમલા) તળાવ પાસે મેગા ડિમોલિશન હાથ ધર્યું હતું. પોલીસના ચુસ્ત બંદોબસ્ત વચ્ચે તંત્રએ તળાવની જમીન પર વર્ષોથી ખડકાયેલા અંદાજે 150 જેટલા ગેરકાયદેસર મકાનો અને દબાણો તોડી પાડ્યા છે.
કરોડોનો બંગલો તોડવા પડી મહેનત આ ડિમોલિશન દરમિયાન તળાવના પટમાં બનેલો એક ભવ્ય બે માળનો બંગલો આકર્ષણનું કેન્દ્ર બન્યો હતો. આ વિસ્તારનું સૌથી મોટું ગેરકાયદે બાંધકામ ગણાતા આ આલીશાન બંગલાને તોડવા માટે મ્યુનિસિપલ કોર્પોરેશનની ટીમે ભારે જહેમત ઉઠાવવી પડી હતી. કરોડોના ખર્ચે તૈયાર થયેલું આ બાંધકામ અંતે તંત્રએ જમીનદોસ્ત કરી દીધું હતું. જોકે, સ્થાનિક લોકોની આસ્થાને ધ્યાને રાખીને વિસ્તારમાં આવેલું ખોડિયાર માતાનું મંદિર હાલ પૂરતું તોડવામાં આવ્યું નથી.
પરિવારો બેઘર થતા આક્રંદ ભારે પોલીસ કાફલાની હાજરીમાં જ્યારે બુલડોઝર ફરવાનું શરૂ થયું ત્યારે સ્થાનિક રહીશોમાં ગમગીની છવાઈ ગઈ હતી. વર્ષોથી રહેતા પરિવારોના ઘર છીનવાતા મહિલાઓ, વૃદ્ધો અને બાળકો ચોધાર આંસુએ રડી પડ્યા હતા. અનેક લોકોએ આક્ષેપ કર્યો હતો કે વૈકલ્પિક આશ્રયની વ્યવસ્થા કર્યા વિના જ તેમના ઘર તોડી પાડવામાં આવ્યા છે. અસરગ્રસ્તોએ સરકાર પાસે તાત્કાલિક પુનર્વસનની માંગ કરી છે.
તણાવપૂર્ણ સ્થિતિ વચ્ચે શાંતિ જાળવવા પ્રયાસ ઘર ગુમાવનારા લોકોના આક્રોશને પગલે વિસ્તારમાં તણાવભર્યો માહોલ સર્જાયો હતો. પરિસ્થિતિને કાબૂમાં લેવા માટે સ્થાનિક પોલીસે રહીશોને સમજાવવાનો પ્રયાસ કર્યો હતો. AMCના અધિકારીઓના જણાવ્યા મુજબ, આ જમીન તળાવની હોવાથી અને ગેરકાયદે દબાણ હોવાથી નિયમ મુજબ આ કાર્યવાહી કરવામાં આવી છે.

AMC મેગા ડિમોલિશન

કુબેરનગરમાં 150 ગેરકાયદે દબાણો દૂર, કરોડોનો બંગલો તોડાયો, પરિવારોમાં ભારે આક્રોશ

December 16, 2025 | 15:08 IST