'જે બન્યું તેને સ્વીકારી આગળ વધવું પડશે'

Ahmedabad plan crash : અમદાવાદમાં એક વર્ષ અગાઉ બનેલી પ્લેન ક્રેશની ઘટનાએ માત્ર ગુજરાત જ નહીં પરંતુ સમગ્ર દેશને આઘાતમાં મૂકી દીધો હતો. આ દુર્ઘટનામાં અનેક લોકોએ પોતાના સ્વજનો ગુમાવ્યા હતા.ગુજરાતના પૂર્વ મુખ્યમંત્રી સ્વર્ગસ્થ વિજય રૂપાણી પણ આ કરૂણ ઘટનાનો ભોગ બન્યા હતા.ઘટનાના એક વર્ષ પૂર્ણ થતાં તેમના પરિવાર દ્વારા પિતાની યાદોને લઈને વ્યક્ત કરાયેલા ભાવુક શબ્દોએ અનેક લોકોને ભાવવિભોર કરી દીધા છે.

સેવાકીય કાર્યો આગળ વધારવા એ જ પિતાને સાચી શ્રદ્ધાંજલિ
સ્વ. વિજય રૂપાણીના પુત્રએ મીડિયાને આપેલી પ્રતિક્રિયામાં જણાવ્યું કે,"એક વર્ષ વીતી ગયું છે, પરંતુ પરિવાર માટે સમય જાણે થંભી ગયો હોય એવી લાગણી થાય છે. પિતાજીની ખોટ આજે પણ દરેક ક્ષણે અનુભવાય છે. પરંતુ અમે હંમેશા એ જ માનીએ છીએ કે વાતોને વહેતી મૂકીને ચોરીને ચીકણું ન કરવું જોઈએ. જે બની ગયું છે તેને લઈને બિનજરૂરી ચર્ચાઓ કે વિવાદો ઉભા કરવાના બદલે સત્યને સ્વીકારીને આગળ વધવું જોઈએ."તેમણે કહ્યું કે, તેમના પિતા માત્ર રાજકારણી જ નહોતા પરંતુ પરિવાર માટે એક માર્ગદર્શક અને સમાજ માટે સમર્પિત વ્યક્તિત્વ હતા. તેમણે જીવનભર લોકોની સેવા કરી અને સામાન્ય માણસની સમસ્યાઓને પોતાની સમસ્યા સમજીને ઉકેલવાનો પ્રયત્ન કર્યો હતો. આજે પણ રાજ્યના અનેક લોકો તેમને પ્રેમ અને આદરથી યાદ કરે છે.

પુત્રએ જણાવ્યું કે, છેલ્લા એક વર્ષ દરમિયાન પરિવાર અનેક મુશ્કેલ પરિસ્થિતિઓમાંથી પસાર થયો છે. શરૂઆતના દિવસોમાં આઘાતમાંથી બહાર આવવું ખૂબ મુશ્કેલ હતું.પરિવારના દરેક સભ્યને લાગતું હતું કે જાણે તેઓ ફરી એકવાર ઘરના દરવાજેથી અંદર પ્રવેશ કરશે. પરંતુ સમય જતાં પરિવારને હકીકત સ્વીકારવી પડી.તેમણે જણાવ્યું કે, "પિતાજી હંમેશા સકારાત્મક વિચારસરણી રાખતા હતા. તેઓ મુશ્કેલ સમયમાં પણ ધીરજ અને સંયમ રાખવાની સલાહ આપતા હતા. આજે પણ અમે તેમના વિચારો અને મૂલ્યોને અનુસરવાનો પ્રયત્ન કરીએ છીએ.

સ્વ. વિજય રૂપાણીના રાજકીય જીવન
સ્વ. વિજય રૂપાણીના રાજકીય જીવનની વાત કરીએ તો તેમણે ગુજરાતના મુખ્યમંત્રી તરીકે રાજ્યના વિકાસ માટે અનેક મહત્વપૂર્ણ નિર્ણયો લીધા હતા. તેમના કાર્યકાળ દરમિયાન ઔદ્યોગિક વિકાસ, રોકાણ, ઇન્ફ્રાસ્ટ્રક્ચર અને જનકલ્યાણના ક્ષેત્રોમાં અનેક યોજનાઓ અમલમાં મૂકવામાં આવી હતી.રાજકીય વિરોધીઓ પણ તેમના સરળ સ્વભાવ અને સૌમ્ય વ્યક્તિત્વના વખાણ કરતા હતા.ઘટનાને એક વર્ષ પૂર્ણ થતાં રાજ્યના વિવિધ વિસ્તારોમાં તેમને શ્રદ્ધાંજલિ અર્પણ કરવામાં આવી હતી. ભાજપના નેતાઓ, કાર્યકરો અને સામાન્ય લોકોએ તેમના યોગદાનને યાદ કરીને શ્રદ્ધાસુમન અર્પણ કર્યા હતા. અનેક સ્થળોએ પ્રાર્થના સભાઓ અને સ્મૃતિ કાર્યક્રમોનું આયોજન કરવામાં આવ્યું હતું.

પરિવારના સભ્યોએ જણાવ્યું કે, તેઓ ઇચ્છે છે કે લોકો સ્વ.વિજય રૂપાણીને માત્ર એક રાજકારણી તરીકે નહીં પરંતુ માનવીય મૂલ્યોને પ્રાધાન્ય આપનાર વ્યક્તિ તરીકે યાદ રાખે. તેમના જીવનમાંથી પ્રેરણા લઈને સમાજ માટે કંઈક સારું કરવાની ભાવના જાળવી રાખવી એ જ તેમના માટે સાચી શ્રદ્ધાંજલિ બની શકે.પુત્રએ અંતમાં કહ્યું કે,"અમે દુઃખમાંથી બહાર આવવાનો પ્રયત્ન કરી રહ્યા છીએ. પિતાજીની યાદો અમારું સૌથી મોટું બળ છે. તેમની શીખ, તેમના વિચારો અને લોકો માટેની તેમની નિષ્ઠા હંમેશા અમને માર્ગદર્શન આપતી રહેશે. સમય બધું બદલતો હોય છે, પરંતુ માતા-પિતા માટેનો પ્રેમ અને તેમની યાદો ક્યારેય ઓછી થતી નથી."

તપાસ એજન્સીઓ પર પૂરો ભરોસો
પ્લેન ક્રેશની તપાસ અને એરલાઇન્સ સાથેના સંપર્ક અંગે વાત કરતા ઋષભ રૂપાણીએ કેટલાંક મહત્વના મુદ્દાઓ સ્પષ્ટ કર્યા હતા. તેમણે જણાવ્યું કે, "મારી બહેન રાધિકાબેન દ્વારા એર ઇન્ડિયા અને ટાટા ગ્રૂપ સાથે સતત ઇમેઇલ કમ્યુનિકેશન કરવામાં આવી રહ્યું છે. તેમણે મોકલેલા ઇ-મેઇલનો એરલાઇન્સ તરફથી યોગ્ય જવાબ પણ આપવામાં આવ્યો છે. આ દુર્ઘટનાનો ભોગ બનેલા દરેક પીડિત પરિવારો પણ પોતાની રીતે કંપની સાથે ઇમેઇલ દ્વારા સંપર્કમાં છે."

અકસ્માતની તપાસ અંગે પૂછવામાં આવતા ઋષભે પરિપક્વતા દર્શાવતા કહ્યું કે, "હાલ આ મામલે ઓફિશિયલ ઇન્વેસ્ટિગેશન (તપાસ) ચાલી રહી છે, તેથી તેના પર કોઈ બિનજરૂરી ટિપ્પણી કરવી યોગ્ય નથી. વાર્તાને વહેતી મૂકીને 'ચોરીને ચીકણું ન કરવું જોઈએ'. મને અને મારા પરિવારને તપાસ એજન્સીઓ પર સંપૂર્ણ વિશ્વાસ છે." તેમણે ઉમેર્યું કે, ભારત હોય કે ભારત બહાર, પ્લેન ક્રેશ જેવી મોટી ઘટનાઓની તપાસ પ્રક્રિયા ખૂબ લાંબી ચાલતી હોય છે કારણ કે તેમાં ટેકનિકલ કોમ્પ્લિકેશન્સ (જટિલતાઓ) આવતી હોય છે.

પીડિત પરિવારોને ધીરજ રાખવા અપીલ
ઋષભ રૂપાણીએ જણાવ્યું હતું કે, હું આ દુર્ઘટનામાં પોતાના સ્વજનો ગુમાવનારા તમામ પીડિત પરિવારોને નમ્ર વિનંતી કરું છું કે આપણે સૌ તમામ તપાસ એજન્સીઓ પર વિશ્વાસ રાખીએ. દેશના પ્રધાનમંત્રી સહિતના તમામ વરિષ્ઠ નેતાઓ પર ભરોસો રાખીએ. તપાસનો સચોટ નિષ્કર્ષ ચોક્કસ આવશે, બસ આપણે તપાસ એજન્સીઓને પૂરતો સાથ અને સહકાર આપવો જોઈએ." અમદાવાદ પ્લેન ક્રેશની આ વરસીએ જ્યાં એકતરફ પરિવારો પોતાના વહાલાઓને યાદ કરીને આંસુ સારી રહ્યા છે, ત્યારે બીજી તરફ વિજય રૂપાણીના પરિવારે પિતાના પગલે ચાલીને પીડિતોને ધૈર્ય રાખવા અને સમાજસેવા તરફ વળવા પ્રેરણા આપી છે.

અમદાવાદ પ્લેન ક્રેશની ઘટનાને આજે એક વર્ષ પૂર્ણ
અમદાવાદ પ્લેન ક્રેશની ઘટનાને આજે એક વર્ષ પૂર્ણ થયું છે, પરંતુ તે દિવસની યાદો હજુ પણ અનેક પરિવારો માટે તાજી છે. આ દુર્ઘટનાએ લોકોને જીવનની અનિશ્ચિતતા અને સંબંધોના મહત્વની ફરી એકવાર અનુભૂતિ કરાવી છે. સ્વ. વિજય રૂપાણીના પરિવાર દ્વારા વ્યક્ત કરાયેલા આ ભાવુક શબ્દો માત્ર તેમના વ્યક્તિગત દુઃખની અભિવ્યક્તિ નથી, પરંતુ સમાજને સંવેદના, ધીરજ અને સકારાત્મકતા સાથે આગળ વધવાનો સંદેશ પણ આપે છે.