સ્કૂલ બાદ હવે હોટલને બોમ્બથી ઉડાવી દેવાની ધમકી

વડોદરામાં બોમ્બની ધમકીઓનો સિલસિલો યથાવત છે. સ્કૂલો બાદ હવે હોટલને નિશાન બનાવવામાં આવી છે. શહેરના પ્રતાપગંજ વિસ્તારમાં આવેલી લોર્ડ્સ ઇન હોટલને બોમ્બથી ઉડાવી દેવાની ધમકી મળતાં ભારે ખળભળાટ મચી ગયો છે.

ઘટનાની જાણ થતાં જ સયાજીગંજ પોલીસ તાત્કાલિક ઘટનાસ્થળે પહોંચી હતી. બોમ્બ સ્ક્વોડ અને ડોગ સ્ક્વોડની ટીમો દ્વારા હોટલ પરિસરમાં સઘન સર્ચ ઓપરેશન હાથ ધરવામાં આવ્યું છે. સલામતીના ભાગરૂપે પોલીસે તાત્કાલિક હોટલ ખાલી કરાવવાની કાર્યવાહી શરૂ કરી દીધી છે.

વડોદરામાં ધમકીભર્યા ઈ-મેલનો સિલસિલો

નોંધનીય છે કે, વડોદરા શહેરમાં છેલ્લા કેટલાક સમયથી ધમકીભર્યા ઈ-મેલ મળવાની ઘટનાઓ વધી રહી છે. ગઈકાલે (4 જુલાઈ) જ શહેરના હરણી વિસ્તારમાં આવેલી સિગ્નસ સ્કૂલ અને અકોટા વિસ્તારની ડી.આર. અમીન સ્કૂલને RDXથી ઉડાવી દેવાની ધમકીનો ઇ-મેલ મળ્યો હતો. આ ધમકીભર્યા ઈ-મેલનું કન્ટેન્ટ અગાઉ મોકલેલા ઈ-મેલ જેવું જ હોવાનું DCP ઝોન 2એ જણાવ્યું હતું.

ઉલ્લેખનીય છે કે, વડોદરા શહેરમાં છેલ્લા 12 દિવસમાં 4 સ્કૂલોને બોમ્બથી ઉડાવી દેવાની ધમકી મળી ચૂકી છે, અને હવે હોટલને ધમકી મળતાં પોલીસ તંત્ર હાઈ એલર્ટ પર છે. આ ઘટનાઓને પગલે શહેરમાં ભય અને તણાવનો માહોલ જોવા મળી રહ્યો છે.

 

આ સમાચાર અમે અપડેટ કરી રહ્યા છીએ...