મધ્યપ્રદેશના રતલામ જિલ્લામાં દિલ્હી-મુંબઈ એક્સપ્રેસ હાઈવે પર એક ગંભીર માર્ગ અકસ્માત સર્જાયો હતો. એક XUV કાર ખીણમાં ખાબકતાં તેમાં સવાર ગુજરાતના વડોદરાના બે સભ્યો સહિત કુલ પાંચ લોકોના કરુણ મોત થયા છે. કારમાં સવાર તમામ મુસાફરો ઉત્તર પ્રદેશના સાદુલ્લાહનગરમાં એક લગ્ન સમારંભ પૂર્ણ કરીને મુંબઈ અને વડોદરા પરત ફરી રહ્યા હતા.
આ ઘટનામાં કારનો સંપૂર્ણ કચ્ચરઘાણ નીકળી ગયો હતો. અકસ્માતની ભયાનકતા એટલી હતી કે, અંદર ફસાયેલા મૃતદેહોને બહાર કાઢવા માટે પોલીસ અને બચાવ ટીમે કલાકો સુધી ભારે જહેમત ઉઠાવી પડી હતી.
મૃતકોની ઓળખ:&nbsp;
પોલીસના જણાવ્યા અનુસાર, મૃતકોમાં મુંબઈના 70 વર્ષીય ગુલામ રસૂલ, તેમના 30 વર્ષીય પુત્ર ખાલિદ ઉર્ફે પપ્પૂ, મુંબઈના જ સંબંધી 30 વર્ષીય દુરેશ, તથા ગુજરાતના વડોદરામાં રહેતા 35 વર્ષીય દાનિશ અને તેમનો 8 વર્ષીય પુત્ર સામેલ છે. લગ્ન સમારંભ પતાવી આ તમામ લોકો 13 નવેમ્બરે સવારે કારમાં પરત યાત્રા શરૂ કરી હતી.
અકસ્માતનું કારણ:&nbsp;
આ ટ્રીપ દરમિયાન દાનિશ અને ગુલામ મોઈનુદ્દીનને વડોદરામાં ઉતારવાના હતા, ત્યારબાદ અન્ય લોકો મુંબઈ જવાના હતા. જોકે, તેઓ ગંતવ્ય સ્થાન પર પહોંચે તે પહેલાં મધ્ય પ્રદેશના રતલામ પાસે દિલ્હી-મુંબઈ એક્સપ્રેસ હાઈવે પર અકસ્માતનો ભોગ બન્યા હતા. પોલીસના પ્રાથમિક અંદાજ મુજબ, 70 વર્ષીય ગુલામ રસૂલ પૂરઝડપે કાર ચલાવી રહ્યા હતા, જેના કારણે કાર પરનો કાબૂ ગુમાવ્યો હતો અને કાર ઊંડી ખીણમાં પટકાઈ હતી. આ અકસ્માતમાં કારમાં સવાર તમામ પાંચેય વ્યક્તિઓએ પોતાનો જીવ ગુમાવ્યો હતો.
&nbsp;

દિલ્હી-મુંબઈ એક્સપ્રેસ હાઈવે અકસ્માત

રતલામ નજીક SUV ખીણમાં ખાબકી, વડોદરાના પિતા-પુત્ર સહિત 5 લોકોએ જીવ ગુમાવ્યો

November 15, 2025 | 01:41 IST