Ahmedabad : ₹5 લાખની લાંચ લેતા DILR સર્વેયર અને બે દલાલ જેલભેગા... 

ગુજરાતમાં ભ્રષ્ટાચારને નાથવા માટે કાર્યરત એન્ટી કરપ્શન બ્યુરો (ACB) એ વધુ એક સફળ છટકું ગોઠવી, લાંચ લેતા ત્રણ આરોપીઓને રંગે હાથે ઝડપી પાડ્યા છે. અમદાવાદ (Ahmedabad)ના બોપલ-આંબલી ચાર રસ્તા પાસે, હોન્ડા શોરૂમ સામે ગોઠવવામાં આવેલા આ છટકામાં, DILR કચેરીના સરકાર માન્ય લાયસન્સી સર્વેયર સહિત બે જમીન દલાલો ₹5,00,000/- (પાંચ લાખ રૂપિયા) ની લાંચ સ્વીકારતા પકડાયા હતા. આ ઘટનાએ સરકારી કામકાજમાં પ્રવર્તતા ભ્રષ્ટાચારનું વધુ એક કદરૂપું ચિત્ર રજૂ કર્યું છે.

કેસની વિગતો અને લાંચની માગણી...

આ કેસના ફરિયાદી, એક જાગૃત નાગરિક, તેમના બહેનની જમીનમાં KJP (કાયમી જમાબંધી પત્રક) દુરસ્તી સુધારો કરાવવા માંગતા હતા. આ કામ માટે તેમણે આરોપી નંબર (1) ગૌતમ ભરતભાઈ યાજ્ઞિક (સરકાર માન્ય લાયસન્સી સર્વેયર, DILR કચેરી, ભીમજીપુરા, વાડજ, અમદાવાદ) નો સંપર્ક કર્યો હતો. ભ્રષ્ટાચારની પરંપરાને અનુસરતા, યાજ્ઞિકે ફરિયાદીને જણાવ્યું કે KJP દુરસ્તી સુધારો કરાવવા માટે DILR કચેરી ખાતે "વ્યવહાર" કરવો પડશે. લાંબી રકઝકના અંતે, આ "વ્યવહાર" પેટે ₹5,00,000/- (પાંચ લાખ રૂપિયા) ની મોટી રકમની લાંચની માગણી કરવામાં આવી હતી. જોકે, ફરિયાદી આ લાંચ આપવા માંગતા ન હોવાથી, તેમણે તુરંત જ ACB નો સંપર્ક કર્યો અને આ ભ્રષ્ટ સિન્ડિકેટને પકડવા માટે મદદ માંગી.

ACB નું સફળ છટકું અને આરોપીઓની ધરપકડ...

ACB ટીમે, ટ્રેપીંગ અધિકારી શ્રી એમ.એમ.સોલંકી, પોલીસ ઈન્સ્પેક્ટર, ગાંધીનગર ACB પો. સ્ટે. ના નેતૃત્વ હેઠળ, સુપરવિઝન અધિકારી શ્રી એ.કે.પરમાર, મદદનીશ નિયામક, ગાંધીનગર ACB એકમના માર્ગદર્શન અને શ્રી ડી.એ.ચૌધરી, પોલીસ ઈન્સ્પેક્ટરના સહયોગથી, તા. 21/06/2025 ના રોજ બોપલ-આંબલી ચાર રસ્તા પાસે એક હોન્ડા શોરૂમની આગળ સફળતાપૂર્વક છટકું ગોઠવ્યું.

આ પણ વાંચો : Jamnagar: જી.જી. હોસ્પિટલની સફાઈકર્મીએ આત્મહત્યાનો પ્રયાસ કર્યો, બે મહિલાઓ સામે ગુનો નોંધાયો!

લાંચના છટકા દરમિયાન, આરોપી નંબર (1) ગૌતમ ભરતભાઈ યાજ્ઞિકે લાંચની રકમ ફરિયાદીને આરોપી નંબર (2) નવગણસિંહ ખુમાનસિંહ ડોડીયા (જમીન દલાલ, ખાનગી વ્યક્તિ) ને આપવા જણાવ્યું. ફરિયાદીએ નવગણસિંહ ડોડીયાને મળતા, આરોપી નંબર (2) અને આરોપી નંબર (3) મનીષ ધીરુભાઈ પગી (જમીન દલાલ, ખાનગી વ્યક્તિ) એ ફરિયાદી સાથે હેતુલક્ષી વાતચીત કરી લાંચના ₹5,00,000/- (પાંચ લાખ રૂપિયા) રોકડા સ્વીકાર્યા. લાંચ સ્વીકારતાની સાથે જ, ત્રણેય આરોપીઓ એકબીજાના મેળાપીપણામાં ગુનો આચરતા રંગે હાથે ઝડપાઈ ગયા હતા. ACB દ્વારા લાંચની સ્વીકારેલ રકમ તુરંત જ પરત મેળવી લેવામાં આવી હતી.

આ પણ વાંચો : મતદાન કરવા જતા લોકોને નડ્યો અકસ્માત, બે લોકોના મોત

આ સફળ ઓપરેશન દર્શાવે છે કે, ગુજરાતમાં ભ્રષ્ટાચારને કોઈ સ્થાન નથી અને ભ્રષ્ટ અધિકારીઓ તેમજ તેમના મળતીયાઓને કાયદાના કઠેડામાં લાવવા માટે ACB કટિબદ્ધ છે. આ ઘટના ભ્રષ્ટાચારીઓ માટે એક કડક ચેતવણી સમાન છે.

આ પણ વાંચો : Gujarat Rain: સાબરકાંઠાના વડાલીમાં 24 કલાકમાં 12 ઇંચ વરસાદ